Okuma 16
16
Mulugu onowaavaha manaa ni dhibuudhi
1Mulogo waatene wa aEzarayeli wahivenyaga oElimi wahifiyaga mwiiddeddereni ya oSini, ogali vaari va Elimi ni Sinayi. Ela yeereyile egamalile malabo kumi ni malabo matanu a mweeri wa nabiili, wambeela vevale vamaruwiligiiwa wEgubuddu.
2Mulogo waatene wa aEzarayeli womwaabaga Mozezi ni Aroni mwiiddeddereni, 3wiiraga: <<Yaali pama Nabwiya ahaanipe wEgubuddu; wewule wakaraatiliihu, nitakunaga nyama ni mikaathe dhedho dharubaliihu. Mbwenye nyoovo munidhiilena mwiiddeddereni mu wi mwaape dala athu ala aatene>>. 4Vevale Nabwiya ahimwaaddelaga Mozezi, wiira: <<Ginoodha gimorihe mikaathe dhodheela odhulu. Athu eddoddelege malabo maatene, dhowaakwana nlabo ni nlabo wi gaweehe gawoone akala enoweedda mmasuuzihoni mwaaga. 5Nlabo na neetanu ni nimohi etugumanege ni osasanyedha mikaathe dha malabo meenddi>>.
6Vevale Mozezi ni Aroni yahawaaddelaga aEzarayeli, yiiraga: <<Ciguwo muneere munone wi Nabwiya duuvenyihileni elabo ya wEgubuddu, 7vano obebehini muneerege woona nthithimiho na Nabwiya. Oliye owuwiiwani waaba weenyu. Hiyo nili aani wi munaabege?>> 8Mozezi ahawaaddelaga teto, eeraga: <<Ciguwo Nabwiya onoodha oovahegeni nyama wi mutakunege, vano obebehini onoovahegeni mikaathe ofiyedha dhuuhabalegeni. Nabwiya owuwiiwani waaba weenyu. Hiyo nili aani wi munaabege? Kamwanaaba hiyo, mbwenye mwamwaaba Nabwiya>>.
9Mozezi ahimwaaddelaga Aroni, wiira: <<Waaddele mulogo waatene wa aEzarayeli, wiire: <Mmwaaddamele Nabwiya vowi ohiiwa waaba weenyu> >>. 10Aroni ahiwogaga ni mulogo wa aEzarayeli, wahisugwaga wiiddeddereni, vevale yahoonaga nthithimiho na Nabwiya nigali vamuraboni.
11 Nabwiya ahimwaaddelaga Mozezi, wiira: 12<<Ginowiiwa waaba wa aEzarayeli. Wawaaddele wi: <Waasiguwaga munatakunege nyama, vano obebehini dhinoohabalegeni mikaathe. Munoodha munone wi miyo gili Nabwiya Mulugu eenyu> >>.
13Ociguwoni dhahidhaaga dhibuudhi vaade vaatevene, vano obebehini mowaapeelela, noovahavo ningame. 14Nommaga, dhoohalavo dhego dhing'onong'ono dhoovevuwa wona koko yoorala yamorela vati. 15Vowoona aEzarayeli yookohanaga, yiiraga: <<Elaya ddi?>> Vowi kayanonile. Mozezi ahawaaddelaga, wiira: <<Ola mukaathe oyene Nabwiya wuuvahiliiyeni wi mutakunege. 16Siilena Nabwiya yuulamuleliiyeni, <Mwaaguddelege mmohi ni mmohi wona majelo aaye, wona teto ni wiinjiva wa athu a vaade vaaye, maniituru meenddi kadda muthu> >>.
17AEzarayeli yahiirana ndale, vano yowaaguddela, amohi majinji, amohi vang'ono. 18Vevale yaapima, oyene aaguddela majinji kayahala, ole aaguddela vang'ono yowaakwanela. Kadda muthu aaguddela wona majelo aaye. 19Mozezi ahawaaddelaga, wiira: <<Ahikalevo oneere aalogolelege ofiyedha omenseloni wiwa>>. 20Naari ndala amohi kayamwiiwelela Mozezi, yoologolela nde ofiyedha mmenseloni mwiwa. Dhoosadduwa miingu onukwaga dhabure. Mwa ela Mozezi ahitakaleliwaga. 21Bebehi ni bebehi yooguddela, kadda muthu wona majelo aaye. Wadha oviha dhoonyenyeya.
22Nlabo na neetanu nammohi yooguddela dhooja dila biili, kadda muthu maniituru mannayi. Apogo yahidhaaga wa Mozezi omwaaddela elena. 23Oliye ahawaakulaga, wiira: <<Ela si eyene Nabwiya yawogiliiye, eera: <Menselo nlabo noovuma, nlabo noweela na Nabwiya. Dhooja munaafunigiinyu woosa, naari munaafunigiinyu opiya mwiiregena, eyene enaahale mulogolelege wi ekalege ya omenseloni wiwa> >>. 24Yahilogolela ya omenseloni wiwa wona Mozezi mwalamuleliiye, mbwenye kayanukwa naari okalana miingu. 25Mozezi ahiiraga: <<Jani peeno vowi nlabo noovuma na Nabwiya, peeno kamuddoddele dhooja. 26Malabo matanu nammohi muddoddelege dhooja dhoomora odhulu, mbwenye nlabo na neetanu ni meenddi thi nlabo na Nabwiya, muhuddoddelege dhooja>>.
27Nlabo na neetanu ni meenddi amohi yahivenyaga wi yaddoddele, mbwenye kayafwanyilege. 28Vevale Nabwiya ahiwogaga ni Mozezi, wiira: <<Munaahiye alini okoodda okameela malamulo aaga ni masuuziho aaga? 29Muubuwelege wi Nabwiya ohuuvahani nlabo noovuma, mowindala ohuuvahani yooja ya malabo meenddi nlabo na neetanu nammohi. Kadda muthu akalege vevale viliiye nlabo na neetanu nabiili>>. 30Vevale athu yahivuma nlabo na neetanu nabiili.
31AEzarayeli yahithwa ndina na yooja ele mukaathe, <<manaa>>.#16.31 Manaamu ewogelo ya eHeberi nnatapulela Elaya ddi? Yaali wona namuranga, yoweela, yatidelana odhivawa wona mikaathe dhoosasanyiwa ni enwi. 32Mozezi ahiiraga: <<Nabwiya dalamulele ela, eera: <Mulogolelege maniituru meenddi a manaa wi aniinyu a musogolo yoone yooja eyene gooleliiminaani mugali mwiiddeddereni, goovenyihiliimini wEgubuddu> >>. 33Mozezi teto ahiiraga wa Aroni: <<Othukule manaa maniituru meenddi, ohele mbiyani, ohiye vamburoni voweela va Nabwiya wi ekale oologoleleya wa anamabaliwelamo eenyu a musogolo>>. 34Wona mwemo Nabwiya mwamulamuleliiye Mozezi, ndala teto Aroni ahihela vamburoni noweela wi elogoleleye. 35AEzarayeli yaaja manaa yaaka makumi mannayi, ofiyedha oddemulela mmavade. Yowaaja ofiyedha oKanani. 36(Mpimo mwaaheliiwa weethiwa dila kumi wi ofiyedhe lanta nimohi.)#16.36 Lanta nimohi Elena yeethaniwa efa mu eHeberi. Yaneekumi yeewa yeethaniwa omeri.
Currently Selected:
Okuma 16: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
