Okuma 15

Njibo na Mozezi

1Ndala Mozezi ni aEzarayeli yahiibaga njibo ndda wa Nabwiya, yiiraga:

<<Ginomwiibela Nabwiya

vowi ohuvuwa,

ohaavokedha munyaza akavalo

ni aliba weeddiha.

2 Nabwiya dili kopolo dhaaga

ni wiiba waaga,

oliye digivulumuse.

Oliye di Mulugu aaga,

ndala miyo gineerege omuthithimiha,

oliye di Mulugu a baba aaga,

vowindala gineerege omvuwiha.>>

3<<Nabwiya di muliba koddo,

Nabwiya thi ndina naaye.

4Ohuvokedha munyaza

magareeta a Farawo ni anyakoddo aaye;

asogoleli aaye akoddo oororomeleya

yahimiriwa muNyaza Yoofiila.

5Karo dheewa dhahibundamuwa,

obwina vati wona mabwe.>>

6<<Aa! Nabwiya, moono weenyu

bwa nthithimiho ni wa kopolo,

moono weenyu onowaasanya amwiiddani.

7Munowaapideedhela vati amwiiddani eenyu

ni wunnuwa wa opogo weenyu.

Owali weenyu onohidda,

onowaapaha wona manasi.

8Mahinje yahitugumana

ni mvumelo wa owali weenyu.

Othamaga wa mahinje

wahiimela wona nsiri,

mahinje a vati va nyaza

yahisadduwa nibwe.

9Mwiiddani ahiniharaga, eeraga:

<Ginowawiigara, gaafwanye,

gawaake dhooreela dheewa,

gigawe.

Murima waaga onoodha orubale.

Ginoodha githukule mwaalago waaga,

ni moono waaga ginoodha gaatolose>.

10Mwahaatongwihedha mu nyaza

ni pevo yeenyu, Nabwiya,

mahinje waahuruwedha,

omireya wona nsilo#15.10 Nsilo Naari wi: Xumbu.

mmahinjeni ooddiiha.

11Aa! Nabwiya, amilugu baani

enafwanafwana ni nyo?

Oli wona nyo baani?

Muli ootikiniha moweela weenyu,

owoopiha mwa nthithimiho neenyu,

mwihiirana dha malavi!

12Muhogoola moono weenyu,

elabo yahaamira amwiiddani eenyu.

13Mwa ororomeleya weenyu

mwahaasogolela athu eenyu mwawooboliinyu.

Muhaafiyiha omburoni weenyu woweela

ni kopolo dheenyu.

14Malogo yahiiwaga, ogurumelaga.

Woova wahaamorelaga aFilisti.

15Mamwene a wEdomu yahukuuwaga,

apogo oMowabe yahirenjeyaga,

aKanani yakulege weekwe.

16Wahaamorela otikina ni woova.

Yahimaala wona nibwe

ni kopolo dha moono weenyu

ofiyedha ovira mulogo weenyu,

Nabwiya, ofiyedha ovira

mulogo weenyu wooboliinyu.

17Nyo munoodha mwaavolosihe

ni waakaraatiha omwaangoni weenyu,

mburo musasanyedhiinyu, Nabwiya,

wi mukalegevo,

mburo woweela, Nabwiya,

madada eenyu ekaraatihiiwa.

18 Nabwiya dinalamula okala ni okala>>.

Njibo na Miriyamu ni ahiyana aatene

19Vevale akavalo a Farawo, ni magareeta aaye a koddo ni aliba weeddihaya vamoreligiiwa munyaza, Nabwiya ahaawelihedha mahinje mumburoni mwiwa. Mbwenye aEzarayeli yahiviraga vaari vanyaza manyalo eewa ehinyethile.

20Miriyamu, namavuhulela, murogora a Aroni, ahithukulaga ng'oma yaaye; vano ahiyana aatene yahimuharaga egathukule teto ng'oma dheewa yiinaga. 21Miriyamu owawaakulelaga, eeraga:

<<Mwiibeleni Nabwiya

mwaha ohuvuwa,

ohaathathilela munyaza akavalo

ni aliba weeddiha>>.

Mahinje oowaawa

22AEzarayeli egalabuwile Nyaza Yoofiila, Mozezi ahaasogolela mwiiddeddereni ya oXuri. Mwemo yaheeddaga malabo maraaru ehawoonile mahinje. 23Yahifiyaga oMara, mbwenye kayaandile ong'wa mahinje a oMara vowi yaali oowaawa. (Va mwaha olena fineethaniwiiwa Mara, sowi owaawa.)

24Athu yoomwaabaga Mozezi, yiiraga: <<Nneere ning'we ddi?>> 25Ndala Mozezi ahikuwelaga wa Nabwiya, vano Nabwiya ahimoonihaga muthanko. Okothola ovokedha mmahinjeni, vevale mahinje yahikala oodhiva. Vevale Nabwiya ahaavahaga magano owaweeha, wiira: 26<<Mweera wi mvuruwanaga pama owoga wa Nabwiya Mulugu eenyu, mwiiragana ofuna waaye, ni wiiwelela malamulo aaye ni oharihamo magano aaye maatene, kagidha guudheelihani maredda wona ale gaadhiiheliimi aEgubuddu. Miyo gili Nabwiya, ginayiliha dhoovoreya dheenyu>>. 27Ndala yahifiyaga oElimi, wewo waali ceela kumi nabiili dha mahinje, ni akanjesa wiinjiva wiwa yaali makumi matanu nameenddi (70). Yahimaga misasa dheewa vevale.

Currently Selected:

Okuma 15: tke

Highlight

Copy

Compare