Okuma 14

Farawo onowaathamagela aEzarayeli

1 Nabwiya ahiwogaga ni Mozezi, wiira: 2<<Wawaaddele aEzarayeli wi ewelele mundduli, yamage misasa dheewa osogolo wa Pi-Hayiroti vaari ni vaari va Migidoli ni nyaza, waaddamela wa Bahala-Zefomi. 3Vano Farawo onoodha oobuwele dha aEzarayeli, eerege: <Ehiholowa mwiiddeddereni>. 4Ginoodha gimummihe murima Farawo wi oothamagelegeni, vevale fineeriimi githithimihiwe mwa Farawo ni anyakoddo aaye aatene. AEgubuddu enoodha enone wi miyo gili Nabwiya>>. AEzarayeli yahiiragana ndale. 5Vaaddeliwiiye mwene a wEgubuddu wi mulogo ohuthawa, yahicenja moobuwelelo mamohi a Farawo ni wa anamalaga aaye, wiira: <<Elaya niiriliihu ddi? Waarumeedhela aEzarayeli, naahiya odhowa; kaninna oonilabela?>>

6Vevale Farawo ahisasanyedhaga gareeta dha koddo dhaaye vamohi ni anyakoddo aaye. 7Ahithukulaga magareeta a koddo oororomeleya mazana matanu nammohi (600), vamohi ni magareeta mamohi a koddo a wEgubuddu. Magareeta eli maatene yalamuliwa ni mpogo a anyakoddo. 8Nabwiya ahimummihaga murima Farawo, mwene a wEgubuddu, wi aathamagele aEzarayeli, yeedda moogonjiha. 9Anyakoddo a wEgubuddu ni akavalo eewa yowaathamagihaga aEzarayeli ni magareeta a koddo maatene a Farawo. Yahaafwanyaga aEzarayeli egakaraatile seresere ya nyaza waaddamela o Pi-Hayiroti osogolo wa Bahala-Zefomi. 10Farawo agawaaddamele, aEzarayeli yahawoonaga aEgubuddu yaathamagelaga. Vevale yahoovaga ebaribareene, wambeela okuwa wa Nabwiya. 11Yahiwogaga ni Mozezi, wiira: <<WEgubuddu yeere ohukalawo masiye owaakwana oologohiwawo hiyo, onidheelana okwela mwiiddeddereni mu? Ki elaya eniireliiwe ddi, onivenyiha wEgubuddu? 12Kahuwo elena nawogesiihu wEgubuddu, niiraga: <Onihiye naalabege aEgubuddu>? Yaali yapama waalaba aEgubuddu ohiya okwela mwiiddeddereni mu>>.

13Mozezi ahaakulaga mulogo, wiira: <<Kamoove. Mukurumule mirima, moone ovulumusa wa Nabwiya oneeriiye owiireleni peenova. AEgubuddu alene munawooniinyu kamudha teto mwawoona. 14Nabwiya onoodha awane ni aliwa vamburoni veenyu, mbwenye nyo mwiirege woonela baahi>>.

Ovira wa aEzarayeli vaari va Nyaza Yoofiila

15 Nabwiya ahimukohaga Mozezi, wiira: <<Mwaha bwaddi onagikuweliiwe miyo? Wawaaddele aEzarayeli yambeele weedda. 16Weevo wogoole moono ni mukumbuzo waawo otoonye nyaza, eneere ogawanyeya wi aEzarayeli evire vaari va nyaza vowummavene. 17Ginowummiha mirima dha aEgubuddu wi yuuthamagihegeni ofiyedha evolowe munyaza. Ginoodha githithimihiwe mwa Farawo ni anyakoddo aatene, ni magareeta a koddo eewa ni akavalo eewa. 18AEgubuddu enoodha enone wi miyo gili Nabwiya, gathithimihiwa mwa Farawo vamohi ni magareeta a koddo aaye ni akavalo aaye>>.

19Vevale mungero a Mulugu oyene eedda osogolo wa mulogo wa Ezarayeli ahiviraga okala mundduli mweewa; vano teto murabo oyene waali osogolo weewa, wahiviraga okala mundduli mweewa. 20Waali vaari va misasa dha aEgubuddu ni aEzarayeli. Wa aEgubuddu murabo wahisadduwaga epipi, mbwenye wa aEzarayeli wahikala waara. Vevale mahiyu maatene aEgubuddu kayaandile waafwanya aEzarayeli.

21Mozezi ahogoolaga moono waaye otoonya nyaza, vano Nabwiya ahisusihaga nyaza ni pevo yowuuba, yadheelaga wewo onakuma nduwa, eyene yavireliwe mahiyu maatene yoobaga, yahiiriha wi nyaza erugunuse theya yowumma. 22AEzarayeli yahivolowaga munyaza, oviraga mowumma-mwene, vano mahinje yaali wona nsiri, omoononi wooja ni woong'oto.

23AEgubuddu yowaathamagelaga mundduli, ofiyedha ovolowa teto munyaza. Akavalo aatene a Farawo, ni magareeta a koddo aaye ni aliba weeddiha aaye yahifiyaga vaari va nyaza. 24Oyaaga omaselo Nabwiya mmuraboni ni munddo wowiimela dhooloolo ahawoona aEgubuddu, ahaasimwelihaga, 25ahaaddorihaga mapera a magareeta eewa kayaandaga weedda. AEgubuddu yahiiraga: <<Naathawe aEzarayeli! Nabwiya onowaakamihedha owana ni hiyo>>.

26 Nabwiya ahiwogaga ni Mozezi, wiira: <<Wogoole moono waawo otoonye nyaza wi mahinje ewelele mumburoni mweewa, yaamire aEgubuddu ni magareeta eewa ni aliba weeddiha eewa>>.

27Bebeheene Mozezi ahogoolaga moono waaye otoonya nyaza, vano mahinje yahiwelelaga mumburoni mweewa. AEgubuddu efunaga othawa yahidhowihiwaga ni mahinje, vevale Nabwiya ahaapa aEgubuddu mu nyaza. 28Mahinje yahaamiraga anyakoddo a Farawo, vamohi ni magareeta a koddo eewa ni akavalo eewa. Kaahalileve naari mmohi mwa ayene yavolowile mu nyaza yaathamagelaga aEzarayeli. 29Mbwenye aEzarayeli yahivolowaga mu nyaza oviraga mowumma-mwene, vano mahinje yaali wona nsiri nowiimela moono weewa wooja ni woong'oto.

30Nlabo nendde Nabwiya ahaavulumusa aEzarayeli mwa kopolo dha aEgubuddu. AEzarayeli yahawoonaga aEgubuddu egakwele seresere ya nyaza. 31AEzarayeli yahoonaga kopolo dhuulubale dha Nabwiya dhaagonjihiliiyena aEgubuddu. Athu egoonile nde yoomoova Nabwiya, yoomuroromela oliye vamohi ni Mozezi, namalaba aaye.

Currently Selected:

Okuma 14: tke

Highlight

Copy

Compare