Okuma 13

Oveleeliwa wa ahima owambeela obaliwa

1 Nabwiya ahiwogaga ni Mozezi, wiira: 2<<Mugiveleelele ahima a aEzarayeli aatene anapongwe owambeela obaliwa, baaga. Teto aneenyama apogo aatene owambeela obaliwa, baaga>>.

3Mozezi ahiwogaga ni athu, wiira: <<Muubuwelelege nlabo nenddi, mmaruwiliinyu wEgubuddu wewo mwaaliinyu adhaari. Vowi Nabwiya ahuuvenyihani mwiilaboni mule ni moono wa kopolo, ndala muhujege mukaathe wooheliwa emela. 4Peeno veva munakumiinyu mu Egubuddu thi nlabo na mweeri wa Abibi.#13.4 Mweeri wa Abibi wambeela vakukuuve omagomelo wa mweeri wa Marusu ni omambeelelo wa mweeri wa Abirili, mudhidhi woohadda dhilo waaddamelaga. 5Nabwiya onowuufiyihani mwiilaboni ya aKanani, aHeti, aAmori, aHevi ni aZhebusi. Eyene Nabwiya yaalibeleliiye waavaha makolo eenyu. Elabo eyene eli yowiinjiva mukaka ni enwi wona mihinje, mwafiya mwathabele mathanga ootamaala mweeri olena. 6Malabo matanu nameenddi mutakunege mikaathe dhihiheliwe emela. Nlabo na neetanu nameenddi musasanyege mathanga oomuthithimihana Nabwiya. 7Malabo alena matanu nameenddi mutakunege mikaathe dhihiheliwe emela; mwiilaboni mweenyu mwaatemwene ehifwanyeyemo emela. 8Nlabo nendde mwawaaddelihege aniinyu, mwiiraga: <Nnowiirana nda mwaha wa eyene Nabwiya yaniireliiye nikumaga mu Egubuddu>. 9Mabasa ala enoodha ekale wona etoonyihedho eli mmadani mwaawo naari vayuuji vaawo wi muwogege malamulo a Nabwiya malabo maatene, vowi ni moono wakopolo Nabwiya ahuuvenyihawoni wEgubuddu. 10Ndala mulogolelege magano ala mwa mudhidhiya wi muthabelege yaaka ni yaaka.

11<<Nabwiya oofiyihani elabo ya aKanani yalibeleliiye wuuvahani nyoovo vamohi ni makolo eenyu, 12mwaaveleelege ahima aatene owambeela obaliwa wa Nabwiya. Dhowambeela obaliwa dhaatedhene dhapogo dhoofuwa dheenyu sa Nabwiya. 13Wa mwanamwaana owambeela obaliwa a buuru, mmoobolege ni nibila. Mwahiirana ndala mmukotholege nikohi. Mwawoobolege teto aniinyu anapongwe aatene owambeela obaliwa. 14Musogolo aniinyu yuukohagani, yiiraga: <Dhedhi dhinatapulela ddi?> munoodha mwawaakulege, mwiirege: <Nabwiya ni moono waaye wakopolo danivenyihile wEgubuddu, wewo waaliihu adhaari. 15Wahooneya wi Farawo ahummiha murima waaye kaafuna onihiya wi nivenyemo mwiilaboni mule, Nabwiya ahaapa ahima aatene owambeela obaliwa a elabo ya wEgubuddu, ahaapa owambeela obaliwa aatene athu ni aneenyama. Va mwaha olena nneerege okutha mukutho#13.15 Mukutho Mukutho ola yaali yoofwanafwaniha baahi, kahuwo wi yoompa mwaana emukutha, mwaha wowi Mulugu ahikooddiha ofiyedha waalaga aKanani. Moone Deteronomiyo 12.29-31; Samuweli Owambeela 57.5; Zheremiya 19.5. wa Nabwiya wa alobwana owambeela obaliwa aatene teto nneerege wawoobola ahima eehu aatene owambeela obaliwa>. 16Mabasa ala enoodha ekale wona etoonyihedho eli mmadani mwaawo, naari va yuuji vaawo wi Nabwiya ni moono wakopolo, danivenyihile wEgubuddu>>.

Mulugu onowaasogolela athu aaye

17Farawo agahiyile mulogo wi odhowege, Mulugu kaavirihile dila yavira wa aFilisti, naari yaalive yavakuukuvi, oliye ahuubuwelaga wi athu enoopopiheye ni koddo ewelele wEgubuddu. 18Vevale Mulugu ahaaviriha dila ya mwiiddeddereni yoogoromba yoodhowa Nyaza Yoofiila. Mulogo wa Ezarayeli ovenyaga wEgubuddu wahitadaana wowiisasanyedheleene owana. 19Mozezi ahaathukulaga makuva a Zhuuze, vowi Zhuuze ahaalibeliha aEzarayeli wi yiirena ndo. Zhuuze teto ahiwoga, wiira: <<Ebaribareene Mulugu onoodha ookamihedheni. Eera ndo, mwaadhowaga mwaathukule makuva aaga>>.

20Vavenyiliiwa oSukoti yahimaga misasa dheewa wEtamu, waaddamela mwiiddeddereni. 21Nabwiya owaasogolela aliwa mutana ni murabo wowiimela dhololo, vano mahiyu owaasogolela ni munddo wowiimela dhololo wi yeeddege mutana ni mahiyu. 22Murabo ni munddo kawaahiyave moweedda mweewa, mutana ni mahiyu.

Currently Selected:

Okuma 13: tke

Highlight

Copy

Compare