Zabbuli 104
104
Okutendereza obukulu bwa Katonda olw'obutonzi
1Weebaze Mukama, ggwe emmeeme yange.
Ayi Mukama Katonda wange, oli mukulu nnyo;
Oyambadde ekitiibwa n'obukulu.#2 Sam 7:22, Yob 40:10, Zab 103:1,2
2Yeebikka omusana ng'ekyambalo;
Atimba eggulu ng'eweema:#Yob 9:8, Is 40:22
3Asimba empagi ez'enju ze mu mazzi;
Afuula ebire eggaali lye;
Atambulira ku biwaawaatiro by'empewo:#Zab 18:10, Is 19:1, Am 9:6
4Afuula ababaka be empewo;
N'abaweereza be omuliro ogwaka:#2 Bassek 1:10; 6:17, Beb 1:7
5Eyasimba emisingi gy'ensi,
Ereme okusagaasagananga emirembe gyonna.#Yob 38:4, Mub 1:4
6Wagibikkako ennyanja ng'ekyambalo;
Amazzi ne gaanjaala waggulu w'ensozi.#Lub 7:19
7Ggwe bwe waganenya ne gadduka;
Eddoboozi ery'okubwatuka kwo bwe lyawulirwa ne ganguwa okugenda;#Zab 18:15; 77:18
8Gaalinnya ku nsozi,
gaaserengetera mu biwonvu,
Ne gatuuka mu kifo kye wagateekerawo.#Yob 38:8
9Wagalagira ensalo gye gatayinza kusukkako;
Galeme okudda nate okubikka ku nsi.#Lub 9:11, Yob 38:11, Yer 5:22
10Aleeta enzizi mu biwonvu;
Zikulukuta mu nsozi:
11Zinywesa ensolo zonna ez'omu nsiko;
Entulege ne ziwona ennyonta.
12Ennyonyi ez'omu bbanga zizimba ebisu byazo ne zituula omwo,
Ziyimbira mu matabi g'emiti.
13Enkuba eva mu bire ogitonnyesa ku nsozi:
Ensi n'ekkuta ebibala eby'emirimu gyo.#Yob 5:10, Zab 65:9
14Amereza ente essubi,
N'ebimera ebigasa abantu;
Balyoke baggyenga emmere mu ttaka;#Lub 1:29,30, Yob 28:5, Zab 136:25; 147:8
15N'omwenge ogusanyusa omutima gw'abantu,
N'amafuta ganyirizenga amaaso ge,
N'emmere ewa omuntu amaanyi omutima gwe.#Lub 18:5, Balam 9:9,13, Nge 31:6,7, Mub 10:19
16Emiti gya Mukama enkuba egifukirira;
Emivule gya Lebanooni gye yasimba;#Kubal 24:6
17Ennyonyi gye zikoleramu ebisu byazo:
Kasida, emiberoosi ye nnyumba ye.
18Ensozi empanvu ziba za mbulabuzi;
Amayinja kye kiddukiro ky'obumyu.#Yob 39:1, Nge 30:26
19Yateekerawo omwezi ebiro:
Enjuba emanyi essaawa y'okugwa kwayo.#Lub 1:14
20Ggwe oleeta ekizikiza, ekiro ne kibaawo;
Ensolo zonna ez'omu kibira mwe zifulumira nga zisooba.#Is 45:7
21Empologoma ento ziwuluguma nga ziyigga kye zinaalya,
Era zinoonya emmere yaazo eri Katonda.#Yob 38:39
22Enjuba n'evaayo, ne zigenda,
Ne zeebaka mu mpuku zaazo.
23Abantu ne bagenda ku mulimu gwabwe
Ne bakola okutuusa akawungeezi.#Lub 3:19
24Ayi Mukama, emirimu gyo nga gya ngeri nnyingi!
Wagikola gyonna mu magezi:
Ensi ejjudde obugagga bwo.#Lub 1:20,21,24,25, Nge 3:19
25Ennyanja eri, ennene engazi,
Omuli ebyewalula ebitabalika,
Ebisolo ebitono era n'ebinene.
26Amaato gaseeyeeyerako;
Lukwata naye mwali,
gwe wakola okuzannyira omwo.#Yob 41:1, Zab 74:14, Is 27:1
27Ebyo byonna bikulindirira ggwe,
Obiwe emmere yaabyo mu ntuuko zaayo.#Zab 145:15
28Gy'obiwa gye bikuŋŋaanya;
Oyanjuluza engalo zo, ne bikkuta ebirungi.#Zab 145:16
29Okisa amaaso go, ne byeraliikirira;
Obiggyamu omukka gwabyo, ne bifa,
Ne bidda mu nfuufu mwe byava.#Yob 34:14,15, Zab 30:7
30Otuma omwoyo gwo, ne bitondebwa;
Era ensi n'ogizza buggya.#Yob 33:4, Is 32:15
31Ekitiibwa kya Mukama kibeere kya kubeerera;
Mukama asanyukire emirimu gye:#Lub 1:31, Zab 72:17
32Atunuulira ensi, n'ekankana;
Akwata ku nsozi, ne zinyooka.#Kuv 19:18, Zab 144:5, Kaab 3:10
33Nnaayimbiranga Mukama nga nkyali mulamu:
Nnaayimbanga okutendereza Katonda wange nga nkyaliwo.#Zab 63:4
34Okulowooza kwange kumusanyusenga:
Nange nnaasanyukiranga Mukama.
35Ababi bazikirire baggweewo ku nsi,
Aboonoonye baleme okubeerawo nate.
Weebaze Mukama, ggwe emmeeme yange.
Mumutendereze Mukama.#Zab 37:38; 104:1; 105:45
Currently Selected:
Zabbuli 104: LBR
Highlight
Share
Compare
Copy
Want to have your highlights saved across all your devices? Sign up or sign in
All rights are reserved to the Bible Society of Uganda.
