Romans 2
2
God-im Tatavsautaa
1 #
Mt 7.1; Lk 6.37. Tavrali ilivich, kiugaluaġuvich, tainnatuttauq piḷuksiŋarutin taipkunatun iñuktun, aasii pasiraksraummiutin. Isivġiqapkich taipkua iñuich piḷuusiqirualivḷugich, iliŋnun isivġiġmiutin, qanuq piḷuksimmiutin tainnatun. 2Iḷisimarugut God isivġiisuuruq nalaunŋaruakun tamatkuniŋa piḷuksiruanik. 3Isumanak God-mun isivġiġñiaġasugalugich allat kisiisa, piḷuksiruat tamatkunuuna, aasii isivġiŋiḷḷutin tamatkuniŋaptauq piḷuksisiqaqavich. 4Isumaruksrauŋitchutin God suaŋaiññasugalugu qanutun manimmiḷgutigimmatin tatavsalaisaaqłutin. God-im qiñuirrutigaatin piaqłuktaŋitkaatillu isumalitqiquvlutin. 5Aglaan sivunmuuguvich suli uqaqsiġiirrutiŋni isumalitqiguŋiḷḷutin God-mun qinnaliqsaiññautipkaqtutin. Ilaan qinnautaa salapqiġumaaqtuq uvlumi ilaan nalaunŋaruakun isivġiqpagich iñupayaat. 6#Ps 62.12; Pr 24.12.Qanuq God-im paaqłiġñiaġaa iñupayaaq qanuq iñuuŋaniŋagun. 7Tamatkua qiñuiqł̣utiŋ nalautchiruat God-im pisuutaanik, ilaan aitchuġniaġai iñuggunmik isuitchuamik, tamatkua niġiuktuat kamanaqsipkaqtauniksramik God-miñ. 8Aglaan God-im qinnautipiaġataġniaġai iñuuruat isummaatuuqłutiŋ piḷuusiqirauvlutiŋ, iñuusuŋaġnatiŋ God-im iñuutqutiŋigun. 9Isumaaġutiqpaqaġniaqtut nagliksaaġlutiglu iñupayaat piḷuusiqiugaqtuat, Jew-guruallu Jew-guŋitchuallu atunim. 10Aglaalli iñupayaat kamaksriruat God-mik, Jew-gugaluaqpata Jew-guŋitkaluaqpatalu, aitchuġniaġai tutqiunmik kamanaqsipkaunmiglu qiḷaŋmi. 11#Dt 10.17.Qanuq God atiruq iñupayaanun.
12Iñuich iluqaġmiŋ piḷuksiŋarut naluvlugich God-im pitquraŋi Moses-mun qaisaŋi, suksrauniaqtut. Aglaan God-im isivġiġñiaŋitkai taapkua pitqurat uqaluatigun. Aasiiḷi iluqaġmiŋ piḷuksiruat iḷisimallaisa God-im pitquraŋi, isivġiqsauniaqtut pitqurat uqaluatigun. 13Tamatkua kamaksriruat God-im pitquraŋiñik nalaunŋanirauniaqtut, aglaan tusaaruat kamagigaluaġnagich pitqurat God-im nalaunŋarualiñiaŋitkai. 14Jew-guŋitchuat naluruat God-im pitquraŋiñik nalaunniġmatigik taapkua pitqurat iñuuniaqłutiŋ isumamiŋni nalaunŋanasugikkaġmikkun, inmiŋnun pitquraliuġmatun piut, 15aglaan salapqiŋagaat puttuqsrisilaaqtiŋ God-im pitquraŋiñik, iḷitchuġipkairuanik nalautilaaŋanik naagga pigiitchualiqitilaaŋannik, suli isumaalutchaktiłługich, naagga patchisaiññialavlutiŋ. 16Iñupayaat isivġiqsauniaqtut taivrumani uvlumi, God-im tilikpagu Christ Jesus isivġiqulugich iluqaisa nalunautchiaŋich iñuich. Tavra taapkua iḷagigaich tusaayugaaġiksuam alġaqsruutigikkaġama.
Jew-guruallu Pitqurallu
17Tavra ilivsi, Jew-guniraġaaqtuasii, naamarualirusi piqaqavsi God-im pitquraŋiñik qaisaŋiñik Moses-mun. Uqavigaaqtusi God God-iginivḷugu. 18Iḷisimaniqsusi qanuq God-mun iñuutqutilaavsiññik, God-ivlu nakuułhaaqtuanik iñuutqutiŋiñik iḷisausiaqaŋavlusi ilaan pitquraŋiñik. 19Nalupqisuŋipiaqtusi iḷisimanivḷusi God-im pitquraŋiñik, iḷisautiyumiñaqługich kaŋiqsisaitchuat pitquranun, aasii iḷisautilugich kaŋiqsipkaġlugich. 20Iḷisautiyumiñaġniġisi naluruat God-im pitquraŋiñik, tamatkualu miqłiqtutun ittuat kaŋiqsisimiŋni pitquraŋiñik God-im. Tavra piginiqavsigik God-im pitquraŋi kaŋiqsiŋapiaġniqsusi qanuq God-mun iñuutqupiaġataqtilaaŋannik iñuich. 21Iḷisaurriyumiñaqsiŋaniġuvsi allanik iñuŋnik, summan iḷisautisuŋitpisi ilivsiññun? Uqallaurrisuuruasii iñuŋnik, Tiglignak. Ilivsi tigliguuvisi? 22Uqallaurrisuuruasii iñuŋnik, Allatuġnak, allatuġuuvisi? Uqaqtuasii piḷuutaunivḷugu aŋaiyyuruni iñuuraqpaŋnun, aŋaiyyuvianniñ iñuuraqpaich tigliguuvisi? 23Uqavigaaqtusi iḷisimanivḷugich God-im pitquraŋi qaisaŋi Moses-mun naaggauvva kanŋunaqsiḷiġaġigiksi God, kamagiŋiññavsigik pitquraŋi. 24#Is 52.5.“Taamna pisigivlugu nunam iñuŋisa uqamaqłuutigigaat God.” Tainna aglausimaruq Bible-ni.
25Nalunaiñŋutchiqsauŋaguvsi God-im iñuksraqtaaŋiñun iḷaliutilusi Jew-guruasii, aasii kamagivlugich God-im pitquraŋi, anniqsuusiaqaqtusi. Aglaan kamagiŋitkuvsigik God-im pitquraŋi, nalunaiñŋutchiusiaqsi iḷautilaavsiññik God-im iñuksraqtaaŋiñun anniqsuutauŋitchuq, Jew-guŋitchuatun iḷimmiusi. 26Allaaguttauq, Jew-guŋitchuaġli iñuuniqpan God-im pitquraŋi kamagilugich, ilaa kisiuqatauniaqtuq God-im iñuksraqtaaŋiñun, nalunaiñŋutaitkaluaŋŋaġmi Jew-guruat nalunaiñŋutaŋannik. 27Aasii taapkua Jew-guŋitchuat, nalunaiñŋutchiqsauŋaitchuat, kamagimmatigik God-im pitquraŋi pasiñiaġaasi piḷuusiqiniḷusi nalunaiñŋutaqaqtuasii, qanuq kamagiŋiññavsigik God-im pitquraŋi aglausimaruat. 28Pisigigiññaġlugu taiguutiqaġniqsi Jew-mik Jew-gupiaġataŋitchusi. Iḷagiŋitkaasi God-im iñuksraqtaaŋisa pisigigiññaġlugu God-im nalunaiñŋutchiutaa ilivsiññun. 29#Dt 30.6.Jew-gupiaqpaalluktuq iñuk kamaksriḷḷaturuaq God-mik ataramik. Jew-gupiaqpaalluktuq iñuk God-im iñuksraqtaaġikkaŋa, qanuq iñuuruq nalaunŋaruakun sivuġaani God-im. Ilaa iñuusuktuq kamagilugu God uummanmiñiñ aglałhiñaŋiḷaatigun pitqurani, aasii nanġausiaqaġluni God-miñ iñuŋił̣aaniñ.
Currently Selected:
Romans 2: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
