Romans 1
1
1Ukua tuyuutit qairut ilivsiññun Paul-miñ, kivgaŋaniñ Jesus Christ, piksraqtaaġiŋaraŋa tiliraġisukługu alġaqsruitquvlugu God-im tusaayugaaġiksuaŋiñik. 2Taapkua tusaayugaaġiksuat iŋiḷġaan unniqsuqłiisigiŋakkaŋich God-im uqaqtiŋisa Bible-ni. 3Taapkua tusaayugaaġiksuat quliaqtuaqaqtut God-im Iġñiŋanik aniŋaruamik David kiŋuniŋiññiñ, 4suli pisigivlugu piḷuutaitchuaq Ilitqusia nalupqinaiqsauŋapiaqtuq God-mun Iġñiġinivḷugu aliuġnaġniŋagun aŋŋisim tuqqunmiñ. 5Ataniqput Jesus Christ naglikkutiqpaqaŋaruq uvamnun tilivḷuŋa quliaqtuaġutitquvlugich iñupayaat annautiyumiñaġniḷugich ilaanun ukpiġikpanni kamagikpanniḷu. 6Ilivsivsauq ququaqtaummiusi pigitquvlusi Jesus Christ-mun. 7Paġlagivsi iluqasi Rome-miittuasii, God-im piviuttaġiraŋasi, ququaqtauŋaruasii ilaaguaqtautquvlusi ilaanun. Nagliktuusiaqpaqaġitchisuq tutqiunmiglu God-miñ Aapaptiŋniñ, Ataniptiŋniḷḷu Jesus Christ-miñ.
Aŋaiyyun Quyyavigivlugu God
8Quyyavigiqqaaġiga God-iga Jesus Christ-kun iluqavsigun, ukpiġurri quliaqtuaġimmarruŋ nunapayaani. 9God, savautikkaġa pisuqtilaaptun tusaayugaaġiksuaŋagun Iġñiŋan, iḷisimaruq ataramik itqaumatilaamnik ilivsiññik aŋaiyyutimni. 10Suli ataramik apiqsriruŋa qanuġluŋa ullagukłusi God-im pisuutigikpagu. 11Tautugumapiaġivsi ikayuġukłusi ukpiġutiksi suaŋasiḷaaġukługu. 12Taamna sivuniqaqtuq, uvagut avanmun qapiŋaisaaġutiluta ukpiġutiptigun. 13#Ac 19.21.Aniqatiit, iḷisimatqugivsi ataramik qaiyumagaluaġaqtuŋa ilivsiññun alġaqsruisukłuŋa, tautullasiḷuŋa ukpiqtuanik suaŋasiḷaaqtuanik, piḷuusiqirauruaniglu annaurrauruanik, piŋaruatuttauq allani nunani. Aglaan piñaiḷutaksraq itchuuruq tamauŋanun aglaan. 14Alġaqsruiruksraupiaqtuŋa iñupayaanun aglagnik iḷisimaruanun naluruanullu isumaturuanullu isumalluaġiitchuanullu, 15ilivsiññullu Rome-miittuanun alġaqsruiyumapiaqtuŋa tusaayugaaġiksuanik.
Tusaayugaaġiksuaq Suaŋŋatiqaqtuq
16 #
Mk 8.38. Kanŋugiŋitkiga tusaayugaaġiksuaq qanuq taavrumuuna God-im annautillagaa kiñaliqaa ukpiqtuaq tusaayugaaġiksuamik, qaiqqaaŋaruaq Jew-guruanun, aasii aquvatigun Jew-guŋitchuanun. 17#Hab 2.4.Taavrumuuna tusaayugaaġiksuakun God-im nalaunŋatqutaa salapqiŋaruq iñupayaami ukpiqtuami tusaayugaaġiksuamik, aglausimaruatun inna, “Iñuk nalaunŋasirauruaq ukpiġunmigun iñuuniaqtuq isuitchuamun.”
Iñupayaat Piḷuksiŋarut
18Qanuq God-im qinnautaa salapqiqsuq qiḷaŋmiñ iñupayaanun god-aiḷaqtuanun piḷuktuanullu, tamatkunuŋa piñaiḷutchiqsuiruanun iḷumun ittuamik. 19Sut iḷitchuqqutiksrat God-iqaqtilaamik nalunaitkaluaqtut iliŋiññun qanuq God-im iḷitchuġipkaŋagai iliŋiññun. 20Taimaŋŋaqaŋa God-im savaŋmagich supayaat, iñuich qiñiŋagaich sut God-im savaaŋi, suli iḷisimavlugu iñuutilaaŋa suaŋŋatiqaqłuni kamanaqtuamik isuitchuamun. Tavraasii patchisiksraitchut, 21#Eph 4.17, 18.qanuq iḷisimagaluaqługu God, ukpiġilipiaġataŋaitkaat God-auniḷugu aasii nanġaġlugu quyyavigilugulu, aglaan isumalluaġiiḷiŋarut kamasuutaiqł̣utiglu. 22Uqavigaaqłutiŋ isumatunivḷutiŋ isumalluaġiiḷiŋarut, 23#Dt 4.16-18.suli aŋaiyyuniq tuqulaitchuamun God-mun simmausiqł̣ugu aŋaiyyuvigivlugich iñuuraqpaliat tuqullaruatun iñuktun, tiŋmiatullu niġrutitullu nimiġiatullu.
24Taamna pisigivlugu, God-im ilaisituuqtinŋagai pisuutaatigun. Iliŋich piḷuksiŋarut kamagivlugich pigiitchuat kipiġniuġutitiŋ aasii atuqługich timitiŋ kanŋunaqtuakun avanmun. 25Tainnatchich iñuich ukpiġiŋagaat saglun, ukpiġigaluaġnagu iḷumun ittuaq God-ikun. Tavra aŋaiyyuvigiŋagaich sut God-im savaaŋi, aasii kamagisuŋił̣ł̣ugu God savaŋaruaq supayaanik, nanġagaksrauruaq isuitchuamun, Amen. 26Taamna pisigivlugu God-im ilaisituuqtinŋagai pigiitchuanun kipiġniuġutiŋiññun. Aġnaŋisa simmausiqł̣ugu nutim piḷġusiuruaq atugaġivlugich timitiŋ aġnauqanmiŋnun. 27Tainnatuttauq aŋutit simmausiqł̣ugu nutim piḷġusiq aġnamun kipiġniupiaġatautigivlugich atugaġisukługich aŋutit timitiŋ kanŋunaqtuakun allanun aŋutinun. Aasii nalliummatiruamik paaqłiusiaqaqłutiŋ pigiitchuatigun piḷġusiġikkaġmikkun.
28Qanuq isummatigimmarruŋ kamagiraksraiññivḷugu God, ilaan ilaisituuqtinŋagai pigiitchuanun kipiġniuġutiŋiññun, piḷuusiqutinullu piḷġutchiñun. 29Iḷumiutaġiŋagaich qanusipayaat piḷuutit, allatuutillu kaviuqqutillu uumisuutiqpaiḷḷu. Suli iḷumiutaġivlugich killuqsrautit iñuaġutillu uqavaaġutillu pisaasuġmiaġutillu, pigiitchuamik irrusiqaġniġiḷḷu allanun, uqautikłiġñiġiḷḷu, 30saglutiginnigniġiḷḷu, uumikłiqsuallu God-mik, qapiġnautikun uumisaaqłiqsillu, arguaŋŋatillu uqavigaaġutillu. Isummatiqaqtuallu nutauruakun piḷuusiqutiksranik kamasuutairrutiniglu aŋayuqaanun, 31isumalluaġiirrutillu, taŋŋiiḷaiññiġiḷḷu unniqsuqłiisinun, aŋayuqaaġiiñi piviuttaqqutairrullu, nagliktairrutillu. 32Tamatkua tainnatchiñik piraġausiqaqtuat iḷisimalluataġaluaqtut God-mun uqallautiŋatilaaqtiŋ tuquruksraunivḷugich. Aasii piḷuusiqiugaŋarut tainnatchisigun kiaqsruqługiḷḷu allat tainnali pitquvlugich.
Currently Selected:
Romans 1: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
