Proverbs 7
7
1Miqłiqtuuŋ, itqaumalugich uqalutka suli piññaġilugich iliŋnun tiliuġutitka. 2Kamagiluŋa, aasii iñuuniaqtutin. Qaunakłaaġutin maliġuallaisa iḷisaurrutitka irrakiñ qaunagimmaġiksaaġmatun. 3Iḷisaurrutitka nimmaaługich argagnun; agliutilugich uummatignun. 4Aŋalallugu isumattun aniqatiktun, suli kaŋiqsiumatiqaqtuatun avilaitqatilluataqtun. 5Piisiññiaġaatin aġnaniñ allatuqtuaniñ, ikł̣igusaaġutinik uqaluligniñ.
Allatuqti Aġnaq
6Iḷaanni itchuaqtuqtuami igalaurakun iglumni, 7aasii tautuŋaruŋa nukatpianik iñuuniaġniġmik iḷisimapiaŋitchuanik, aglaan iḷaŋat nalunaił̣haaġniqsuq asiḷiqiruaq. 8Pisuaġniqsuq apqunmi qaniŋani aġnam iñuuniaġviata. Saniġatqunniġaa aġnam iglua 9unnuksraaqtuami taaqsianiŋaruami. 10Aasii aġnam kasuġniġaa; annuġaaqaġniqsuq akiitchutun suli isummianiŋavluni. 11Taamna aġnaq taluqsraiñŋaruq suli kanŋusuutaitchuq pisuaġaġikami apqutini 12naaggaunnii utaqqikami apqutit kaŋiġalluŋanni, iḷaanni apqunmi, iḷaanni iñuich katirvianni sumiliqaa. 13Iqiviñaŋagaa nukatpiaq, kunikługu, kanŋuighuni qiñiŋagaa aasii uqallaghuni, 14“Uvlupak aitchuiruaŋa aasii niqautiqaqtuŋa ikipkaamniñ. 15Tavraasii aniruaŋaa ivaġiaqłutin. Paqitchuktaqpiñ, aasii uvva tavraniittutin! 16Tuŋiusiuŋaruŋa qiññaġiksuanik kalikunik Egypt-miŋŋaqtanik. 17Tivraġiksaŋagitka tivraġiksautinik myrrh-mik, aloes-nik, suli cinnamon-mik. 18Qaiñ! Siñiqatigiigiaġluk unnuapak. Quviasugniaqtuguk atautchimiinniptigni. 19Tuvaaqatiga aimmiŋitchuq; uŋasiksuamun aullaŋaruq. 20Maniligaapaluŋaruq utiġniaŋił̣ł̣uni malġuugni savaiññigni.” 21Piyumisaaŋagaa uqalugmigun aasii uqayutiłłuni. 22Tavrauvvaa maliksauraŋagaa qimuktitun tuqutauyyaqsaqtuatun, qunŋitun qargisaunmuktuqtuatun 23tavrani pisiksim qaġruata kapiniaġmigaa uummataa. Qupałuuratun inŋaruq matutamun tiŋmiruatun—naluŋaruq iñuggutini navianniuqtilaaŋanik.
24Tavraasii, iġñiġutiimaaŋ, naalaġnisiñŋa. Naalaktuaqsigik uqalutka. 25Tainnasimun aġnamun qaiññak; maliksugnagu. 26Maqutchiŋaruq iñugiaktuanik aŋutinik suli patchisauvluni tuqutaummata kisiñaitchuat iñugiakłutik. 27Igluanukkuvich, tavra iglaurutin tuqquŋaruat irviannun. Sivikitchuq tuqunmun.
Currently Selected:
Proverbs 7: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
