Proverbs 6
6
Kiliktuutivsaat
1Miqłiqtuuŋ, unniqsuqłiiŋavich qaunaginiaġnivḷugich allam iñuum akiiḷaŋich? 2Piraġipkaŋavich uqalukkun, ilvich unniqsuqłiisiakkun? 3Tavraasii, miqłiqtuuŋ, taavsruma iñuum suaŋŋataaniittutin, aglaan inna piiġumiñaqtutin: qilamik ullaglugu, aasii katchuŋaiḷḷutin apiqsruġlugu pilitqulutin. 4Siqunak naaggaunnii nutqaġutin piḷaiŋaiqsiaġnak. 5Naktinŋaŋaiġiñ qupałuktun naagga tuttutun qimaktuatun aŋuniaqtimiñ.
6Iqiasuuturuat iḷisaqtuksraugaluaqtut iñuusiŋanniñ kiktuqsraligniñ. 7Aullarraitchut, umialgitchut, naagga aŋalataitchut, 8aglaan tutquqtuisuurut niqinik upinġaami, itqanaiyautivlugu ukiuksraq. 9Qanutun imña iqiasuuruaq nalaqhiksuaġniaqpa? Qakuguuna makinniaqpa? 10#Pr 24.33, 34.“Siqutqił̣auraġniaqtuŋa,” ilaa uqallaktuq; “Imulugich argatka aasii piḷaiŋaiqsiallagluŋa.” 11Aglaan siñiktillugu, piiḷḷiuġnam tikiññiaġaa satkuliktun tigligayuktitun.
12Iñupałłuich, piḷuusiqirit kukiḷugniaqtut sagluuġutik. 13Iriŋmigaqhutiglu, aulałługiḷḷu isigaktiŋ, naakka tikkuaqtuġhutiglu sagluqisukhutin, 14tainnasiġallaġmik sivunniuqtut pimakłuutiksramignik isumamigni, iluitchuamik siamitchivḷutik. 15Tainnaġmata tavra iluitpaktuam tikiññiaġai tavraŋŋatchiaq, aasii iluaqsiyumiñaighutiŋ iñuuniqtutilaamiktun.
16-19Tallimat malġuurut Atanġum uumigipiallaktaŋich suli akuqtuaġiyumiñaitchaŋich:
piġuqtiġhuni ilimiñik qiññaġmiñi,
sagluturuaq qaniq,
argaich tuquġairuaq patchisaitchuanik iñugnik,
isumami sivunniuġniq pigiitchuanik,
isigaich piḷuktualiqiyyaqsauraqtuat,
qiñiqqaaqhuni quliaqtuaqtuaq sagluutqigaaqhuni,
suli maqutchiñiq avilaitqatigiiksuanik.
Siḷġiqsuutit Allatuġnikun
20Iñuuŋ, kamagilugu aapan suli piiguġnagich aakakpich iḷisaurrutiŋich. 21Uqaluŋich iliŋnun piiguġnagich, uummatiġmiutaġilugich. 22Iḷisaurrutaisa aullatiniaġaatin iglauguvich, qaunagilutin unnuami, suli siḷġiqsuġutin uvlumi. 23Iḷisaurrutiŋich naniqtun ittut; natqiksruutiŋisa iḷisautiniaġaatin qanuq iñuuniaġniġmik. 24Piḷuktuaniñ aġnaniñ piisinniaġaatin, uqaluŋiññiñ ikłiguqsaaġutauruaniñ allat aŋutit tuvaaqatiŋiññiñ. 25Piyumitchaktaunak aġnaġigñilugich; akiiḷipkaġnak iriŋmigaqpatin. 26Aŋun akiḷiiḷuni akiitchumik akiŋatun punniġum, aglaan allatuqpan suġauttapayaaġiqsauniaqtuq.
27Tigumiaġumiñaqpiuŋ igniq satqagni ikigaluaġnagich annuġaatin? 28Pisuaġumiñaqpich ikumaruani aluani uutiqtitkaluaġnagich isigaktin? 29Tainnatuttauq anayanaqtigimmiuq siñiqatiqaġniaqtuni allam aŋutim tuvaaqataanik. Kiñaliqaa tainna piruaq nagliksaaġniaqtuq. 30Iñuich uumigiliyuitkaat tigligayukti tiglikpan niqimik qanukkii kaaktuq; 31tavraaglaan aŋupkaqpan, utiqtitchiruksrauruq tallimat malġuiqsuaġlugu (7x)—ataullugich suġauttapayaani. 32Aglaan aŋun allatuqtuaq isumatuipiallaktuq. Inmiñun maqusiññaqtuq. 33Suuŋiḷaġiliġñiaġaat suli piyuglugu; isuitchuamun kanŋunaqsirauniaqtuq. 34Qinnałhamaayuitchuq uiguruaq qinnagniġmiñiñ saŋiakłuni; akisaġumaniŋa isuksraitchuq. 35Akuqtuġniaŋitchuq akiḷiutikkaluanik; qanutun aitchuġaluaqpanni sunik qinnaŋaiġñiaŋitchuq.
Currently Selected:
Proverbs 6: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
