Proverbs 8
8
Nanġaun Isumattunmun
1 #
Pr 1.20, 21. Isumattun ququulava?
Kaŋiqsisaiłłuni nipatusiva?
2Makitaruq qaaŋanni qimiqqat qaniŋaniittuat apqutit
aasii suli apqutit kayyaaŋiññi.
3Paaŋani iniqpaum
saniġaanni upkuaqpaich, ququularuq:
4“Iluqavsiññun ququularuŋa;
Aviularuŋa iluqavsiññun nunamiittuanun.
5Qatqiñŋaitpich? Qauriiñ.
Isumalluaġiitpiñ imña? Isumatusiiñ.
6Naalaġnikkich uqalulluatatka;
iluqaġmik uqalutka iluaqtut.
7Uqalutka iḷumun ittut;
sagluuġutit uumigigitka.
8Uqalupayaatka iḷumun ittut;
piitchuq sagluuruamik naagga asivautauniaqtuamik.
9Kaŋiqsiummatiqalluataqtuanun, nalunaitchuq;
naalaġniruanun, kaŋiqsiñaqtuq.
10Piksraqtaaġikkich iḷisaurrutitka qatiqtuat maniich piŋaiġḷugich;
piksraqtaaġiuŋ iḷisimman piksraqtaaġiŋaiġḷugu nakuuniqsraq kaviksaaq manik.
11“Uvaŋa isumattutauruŋa, nakuułhaaqtuŋa qiñiyunaqutiniñ;
pigisupayaaqtaġniñ nalliummatiŋitchuŋa.
12Uvaŋa isumattutauruŋa, kaŋiqsiummatiqaqtuŋa;
Iḷisimmatiqaqtuŋa isumalaallaruŋalu.
13Qiksiginiaqtuni Ataniq uumiginaqtuq piḷuktuaq:
uumigigigitka kamasaaġniq suli arguaŋaaġniq,
pigiitchuat iñuusit suli piuŋiḷat uqaluich.
14Sivunniuġuuruŋa aasii taŋŋił̣ł̣ugich sivunniuġutitka.
Kaŋiqsimmatiqaqtuŋa, suli suaŋaruŋa.
15Suaŋŋasiqsuġitka umialgich aullarritquvlugich
suli aullarrauruat pitqurriuquvlugich iluaqtuanik.
16Aullarripayaurat aullarrirut uvamnik ikayuqtiqaqłutik,
atanaurapayaallu tainnaptauq.
17Nakuaġigitka uvamnik nakuaqsriruat;
kialiqaa uvamnik ivaqłipiaġataqtuam paqinniaġaaŋa.
18Umiallagniġlu qiksiksrautiqaġniġlu qaitchumiñaġikka,
piḷḷuataġniq suli piḷḷuatautiqaġniq.
19Uvamniñ piññaktaaksran nakuułhaaqtuq nakuuniqsramiñ kaviqsuamiñ manigmiñ,
nakuułhaaġmiuq surruutaitchuamiñ qatiqtuamiñ manigmiñ.
20Pisuaqtuŋa iluaqtuakun;
maliġivlugi tumiŋi nalaunŋaruat,
21umiallaktiłługich uvamnik nakuaqsraqtuat,
silviłługich igluŋich piññaġnaqtuanik suġauttanik.
22 #
Rev 3.14. “Atanġum pigiŋagaaŋa,
sivulliuvluŋa savaamiñiñ, qaŋasaaq.
23Nalunaiqsauŋaruŋa sivulliqpiaguvluŋa,
sivulliuvluŋa, nuna isagutiŋaiñŋaan.
24Qaiŋaruŋa sivuatigun taġiut,
piiñŋaisa maqsraluktuat imġich.
25Qaiŋaruŋa sivuatigun iġġich,
qimiqqat inillaktuaŋaiñŋaisa,
26God-gum savaŋaiñŋaan nuna naagga nautchiaqaġviŋiññik
naagga imaqqaaŋanik argaum nunamik.
27Inŋaruŋa siḷa inillagmauŋ iniksraŋanun,
isivinmauŋ siḷa taġium qulaanun,
28iḷimmagich nuviyat siḷamun,
agmaġmagich siiqsiñġich natqani taġium
29aasii tilivḷugich taġiut
qaaŋiulaaquŋił̣ł̣ugich ilaan piraksriutaagun.
Tavraniinŋaruŋa iḷimmagich nunam maŋŋuŋich.
30Saniġaaniinŋaruŋa sanaturuamigluqpaliuqtim,
quviasuutiqaqtiłługu uvlutuaġman,
quviasukłuŋa itqatigituaqapku—
31quviagivlugu nuna
suli iviġaumagivlugich iñuich.
32“Tavraasii, nutaġauruasii, naalaġnisiñŋa.
Kamagisiñŋa, aasii quviasugniaqtusi.
33Naalaġniḷugich iḷisaurrusiasi.
Isumatulusi; suuŋiḷaġinagi.
34Tamatkua naalaġniruat uvamnik quviasugniaqtut—
tamatkua uvlutuaġman upkuamniittuat,
utaqqivḷutik paaŋani aimaaġvigma.
35Iliŋisa paqinnamiñŋa tavra paqitkaat iñuggun,
aasii tavra Atanġum iviġaumaginiaġai.
36Iliŋich paqitchiŋitchuat uvamnik inmignun anniġuurut;
kialiqaa piḷuksraqtuaq uvamnik nakuaġigaa tuqqun.”
Currently Selected:
Proverbs 8: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
