Numbers 1
1
Kisitchaqqaaġmatigiŋ Israel-gum Kiŋuvaaŋich
1 #
Nu 26.1-51. Sivulliġmi uvluani tugliuruam tatqim ukiutqiutaanni iñuŋich Israel aullaġmata Egypt-miñ, Atanġum uqautigaa Moses nayuqtauvigmiñi Tupiġmi Sinai Desert-mi. Uqallaktuq, 2“Aaron-lu kisitchaġisik Israel-gum kiŋuvaaŋich iḷagiiktuatigullu qitunġaġiiksuatigullu. Agliutilugich atiŋich aŋutipayaurat 3iñuiññamiñ aglaan (20) ukiuqaqtuat aŋuyaktauyumiñaqtuat inillagviŋisigullaa. 4Ikayuqtiksrallaalusi iḷagiiguruat qaukłiŋiññik maŋŋuuqatigiiksuaniñ. 5-15Ukua aŋutit ikayuġniaġaatin:
| Maŋŋuuruat | Iḷagiiksuat qaukłiat |
|---|---|
| Reuben | Elizur iġñiŋa Shedeur-m |
| Simeon | Shelumiel iġñiŋa Zurishaddai-m |
| Judah | Nahshon iġñiŋa Amminadab-gum |
| Issachar | Nethanel iġñiŋa Zuar-m |
| Zebulun | Eliab iġñiŋa Helon-gum |
| Ephraim iġñiŋa Joseph-gum | Elishama iġñiŋa Ammihud-gum |
| Manasseh iġñiŋa Joseph-gum | Gamaliel iġñiŋa Pedahzur-m |
| Benjamin | Abidan iġñiŋa Gideoni-m |
| Dan | Ahiezer iġñiŋa Ammishaddai-m |
| Asher | Pagiel iġñiŋa Ochran-gum |
| Gad | Eliasaph iġñiŋa Deuel-gum |
| Naphtali | Ahira iġñiŋa Enan-gum |
16Tavra taapkua aŋutit tilirauruat nunaaqqimiñ, aullarrauruat maŋŋuqatigiiñiñ, qaukłiuruat Israel-gum kiŋuvaaŋiññun.”
17Ikayuqtigivlugich taapkua qulit malġuuruat (12) aŋutit Moses-lu Aaron-guvlu 18ququaŋagaich nunaaqqimiŋ iñuŋich sivulliġmi uvlumi tuglianni tatqich aasii agliutivlugich iluqaisa iñuich iḷagiiksuatigun suli qitunġaġiiksuatigun. Atiŋich iluqaisa aŋutit iñuiññamiñ aglaan (20) ukiuqaqtuat agliutiŋaniġaich suli kisirrutivlugich, 19Atanġum piraksriutaatun. Sinai Desert-mi, Moses-gum agliutiŋagai iñuich. 20-46Aŋutit iñuiññaqtun (20) ukiuqaqtuaniñaglaan aŋuyaktauyumiñaqtuat agliutiŋaniġaich atiŋisigun iḷagiiḷḷaaruat suli qitunġaġiiksuatigun, isagutisaaqługich Jacob-gum aŋayukłiŋaniñ Reuben-miñ. Ukua uvva katiłługich iñugiaktilaaġigaich:
| Maŋŋuuruat | Iñugiaktilaaŋat |
|---|---|
| Reuben | 46,500 |
| Simeon | 59,300 |
| Gad | 45,650 |
| Judah | 74,600 |
| Issachar | 54,400 |
| Zebulun | 57,400 |
| Ephraim iġñiŋa Joseph-gum | 40,500 |
| Manasseh iġñiŋa Joseph-gum | 32,200 |
| Benjamin | 35,400 |
| Dan | 62,700 |
| Asher | 41,500 |
| Naphtali | 53,400 |
| Katiłługich: | 603,550-iurut |
47Levi-m kiŋuvaaŋich agliurrauŋaitchut allatigun maŋŋuqatigiiksuatigun, 48Ataniq uqallaŋavluni Moses-mun, 49“Kisitchiguvich aŋutinik aŋuyaktaullaruanik, iḷaginagich maŋŋuqaqtuat Levi-mik. 50Aglaan, Levi-m kiŋuvaaŋich qaunaksriḷiutiyumagitin Tupiġmun nayuqtauvimñun suli iluqaiññun suġauttaŋiññun. Tigumiaġniaġaat suġautaŋiḷḷu, qaunagilugu, suli nullaġvigillaalugu avataani. 51Aullaġaġiguvsi nullaummivivsiññiñ, Levi-m kiŋuvaaŋich tupqiyallaaniaqtut aasii nappaġmiḷugu nullatqigviannun. Kiña alla iñuk qaninŋautiruaq Tupiġmun tuqutauniaqtuq. 52Israel-gum kiŋuvaaŋich nappaiñiaqtut inimignik, qavsiullaalutiŋ, iñullaa nanmiñiq piqatigiramiñun suli takuyallaamiŋnun. 53Aglaan Levi-m kiŋuvaaŋich nullaġniaqtut avataanun Tupqum munaqsrausaġlutiŋ, kia-unnii qaninŋaŋitchumagaa Tupiq qanukkii qaninŋaqpata qinnautiniaġitka Israel-gum kiŋuvaaŋich.” 54Tavraasii Israel-gum kiŋuvaaŋich savaŋaniqsut supayaamik Atanġum piraksriutaanik Moses-mun.
Currently Selected:
Numbers 1: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
