Matthew 22
22
Uuktuun Katitirrusiqiruani Niqinaqiruanik
(Luke 14.15-24)
1Tavra Jesus uqarraqsitqiŋaruq uuktuutitigun iñuŋnun uqaqłuni, 2Atanniqsimmataa Taavruma qiḷaŋmiittuam arriliñaġumiñaqtuq umialiŋmun katirrusiqutikun niqinaqipkairuamun iġñiġmiñik. 3Aasii tiliŋagai ilaan kivgani aiyugaaqtauŋaruat qaitquvlugich katirrusiqutikun niqinaqiruanun, aasii qaisuŋiñŋarut. 4Tilisivsaaŋaruq allanik kivganik uqaqłuni, Uqallautiyumagisi tamatkua aiyugaaqtauruat, Uvva, itqanaiganikkiga niqinaqusiaġa, qimuktitka quiñiruallu tuttuqpaiyaagutitka tuqutaniktut, suli supayaaq itqanaiqsuq. Niqinaqiyyaġitchi katirrusiqiruanun. 5Tavra aiyugaaqtauruat suliqutigiŋaitkaat aasii aullaqsiññaqłutiŋ, iḷaŋich nunamiŋnun, allattauq tauqsiġñiaġviŋmiŋnun. 6Iḷaŋisuli tigguġluŋagaich kivgaŋi, anaumikł̣ugich, suli tuquġaqługich. 7Umialik qinnaliŋaruq, aasii tilivḷugich aŋuyaktini tuquġaŋagaich taapkua iñuaqtit ikipkaqługulu iniqpaŋat. 8Tavrani uqallautilgitkai kivgani, katirrusiqutiksraq itqanaiqsuq, aglaan taipkua aiyugaaqtauŋagaluaqtuat nalliummatiŋitchut. 9Aullaġitchi apqutinun aasii aiyugaaqłiiḷusi katirrusiqutikun niqinaqunmun iñugiaktilaaŋisitun kasukkasi. 10Tavra taapkua kivgat aullaŋarut apqutinun aasii katitchiaqsivḷutiŋ iluqaiññik kasukkaġmiŋnik, piḷuktuallu nakuuruallu ativlugich, tavraasi katirrusiqivik igluqpak inaiŋaruq aiyuġaaqtauruanik.
11Tavra umialgum isiqami qiñiġiaqługich aiyugaaqtauruat, tautuŋagaa iñuk tavrani katirrusiqutinik annuġaaŋaitchuaq. 12Aasii ilaan uqallautiŋagaa, Avilaitqaan, qanuqłutin isiqpich uvuŋa katirrusiqunmik annuġaaġaluaġnak. Tavra iñuum kiuŋiḷḷakkaa. 13#Mt 8.12; 25.30; Lk 13.28.Tavrani umialik uqallaŋaruq kivganun, Qiḷiqsruqsiuŋ argaŋigun isigaŋigullu, aasii anillugu taaġniqsrauruamun. Tavrani taaġniqsrauruami iñuich qianiaqtut suli tiriqtinniaġaich kigutitiŋ. 14Tavraasii Jesus uqallavsaaŋaruq iñugiaktuat aiyugaaqtaugaluaqtut atanniqsimatquvlugich Taavrumuŋa qiḷaŋmiittuamun, aglaan iñukitchuat piksraqtaagurut.
Apiqqun Akiḷiiñikun Taxes-nik
(Mark 12.13-17; Luke 20.20-26)
15Tavrani Pharisees aullaqłutiŋ sivunniuŋarut uuktuġukługu Jesus apiqqutinik. 16Tavra tilisiŋarut iḷaŋiññik iḷitchitquramiŋ ilaanun, piqasiqł̣ugich Herod-kuayaanik uqaqłutiŋ, Iḷisaurrii, iḷisimarugut pitqiksiġautaisilaaġnik, suli iḷisaurrirutin iḷumun ittuamik God-im pitqutaanik iñuŋmun suliqutigiugasuŋaġnagu qanuq iñuich isumaniaqtilaaŋat, qanuq piqutigiŋitkiñ iñuum surautilaaŋa. 17Uqallauttutigut qanuq isumatilaaġnik. Paaqsaaŋava uvagut pitquraptiŋni naagga nalaunŋava akiḷiiruni taxes-nik Caesar-mun Rome-miut umialgannun? 18Tavra Jesus, iḷisimavlugu pigiitchuakun sivunniuġutaat uqallaŋaruq, Summan uuktuqpisiŋa? Ukpiŋŋuaqtuasii. 19Tautuktitchiŋa maniŋmik tax-iutiksramik. Tavra qaġġirriŋagaat maniuramik. 20Tavra Jesus apiġiŋagai, Kiñauna maniurami, atqalu? 21Iliŋisa kiuŋagaat, Caesar. Tavrali Jesus uqallautiŋagai, aitchuutigisigik Caesar-mun sut pigikkaŋi Caesar-m aasii God-mun sut pigikkaŋi God-im. 22Tusaakamirruŋ taamna, aliuŋarut, aasii qimakługu aullaŋarut.
Apiqqun Aŋŋisikun Tuqqunmiñ
(Mark 12.18-27; Luke 20.27-40)
23 #
Ac 23.8. Taavrumani suli uvlumi Sadducees qaiŋarut Jesus-mun, uqaġuuruat aŋŋisaiññivḷugu, aasii apiġivlugu apiqqunmik. 24#Dt 25.5.Iḷisaurrii, Moses iḷisaurriŋaruq inna, Iñuk tuqukpan miqłiqsigaluaġnani, aniqataanun tuvaaqasiutitquvlugu uiḷgaqtuaq, aasii qitunġiuġluni aniqatini pisilugu. 25Tavra tallimat malġuuŋarut aniqatigiich iñuuŋaruat akunnaptiŋni. Aŋayukłiq nuliaŋaruq aasii tuquvluni miqłiqsigaluaġnani, qimaŋagaa nuliani aniqanmiñun. 26Tuquŋammiuq suli tuglia, piŋayuaglu, kiisaimma tallimat malġuk aniqatigiich tuquvut. 27Taapkua iluqaġmiŋ kiŋuatigun aġnaq tuquŋaruq. 28Aŋŋiviŋmi, nallianun tallimat malġuuruat tuvaaqasiutiniaqpa? Iluqaġmiŋ tuvaaqatigianiŋagaat.
29Tavra Jesus kiuŋagai, Qanutun killukuaqtigirusi. Killukuaġutigigiksi naluvlugich Bible uqaluŋich, God-tivlu suaŋŋataa. 30Aŋigumiŋ tuqqunmiñ, aŋutillu aġnallu katitinniaŋitchut, aglaan inniaqtut isaġuliktitun qiḷaŋmiittuatun. 31Aasii sivuniġilugu uqaqta tuquŋaruat aŋiñiaġniŋat. Taiguaŋaitpisi qaŋaunnii qanuq God-im uqaluanik ilivsiññun? Ilaa uqallaŋaruq, 32#Ex 3.6.Uvaŋa God-igigaaŋa Abraham, God-igigaaŋalu Isaac-gum, God-igimmigaaŋasuli Jacob-gum. Taapkua iñuich iñuurut suli. Ilaa God-auŋitchuq tuquruanun, aglaan God-igigaat iñuuruat. 33Tavra iñusalaich tusaakamirruŋ taamna kamasuuttaqaŋarut iḷisaurrutiŋiñik.
Qaukłiat Pitqurat
(Mark 12.28-34; Luke 10.25-28)
34Tavra Pharisees tusaakamiŋ Jesus-mun nipaiġiñivḷugich Sadducees, kasimaŋarut. 35Aasii iḷaŋata iḷisaurrauruam pitquranik apiġiŋagaa apiqqunmik uuktuaqsaqługu. 36Iḷisaurrii, nalliat qaukłiuva pitqurat iluqaiññiñ? 37#Dt 6.5.Jesus kiuŋagaa, Piviuttaġipiaqsaġiñ Ataniq God-igikkan, piviuttaġilugu iḷuŋniñ, iluqaaniḷu iñuuniaġniġni, iluqaaniḷu isumaniġni. 38Taamna tavra kamanaġniqsraq pitquraq. 39#Lv 19.18.Suli igḷua tainnainmiuq, Piviuttaġisaġiñ siḷalliñ iliktun iḷiḷugu. 40#Lk 10.25-28.Iluqaġmiŋ pitqurat qaisauruat Moses-kun, iḷisaurrutiŋiḷḷu uqaqtiŋisa God-im kaŋiqaqtut taapkuŋniŋa malġugnik pitquragnik.
Apiqqun Messiah-kun
(Mark 12.35-37; Luke 20.41-44)
41Tavra kasimapkaqługich Pharisees atautchimi, Jesus apiġiŋagai apiqqunmik. 42Qanuq isummatigivisiuŋ Christ? Kia kiŋuniġivauŋ? Ilaisa kiuŋagaat, kiŋuniġigaa David-gum. 43Ilaan apiġiŋagai, Qanuqłunimi David, puttuqsripkaġmani ilitqusiġiksuam, tuqłuŋavauŋ Ataniġmiñik, uqaqłuni,
44 #
Ps 110.1. “Ataniq uqallaŋaruq uvaŋa Atanimnun:
Aquvittin taliqpiŋma tuŋaanun,
uumigiritin uvamnun akiiḷitchiaġilugich.”
45Tavra tainna David ilaata taigaa Ataniġmiñik. Qanuqłuni Christ-guruaq David-gum taikkaŋa Ataniġmiñik kiŋuniġiyumiñaqpauŋ? 46Tavra nalliataunnii kiusausiiñŋagaa uqaluŋmikunnii, naaggaunnii taavrumaŋŋa uvlumiñ kialiqaa apiġisausiiŋagaa qanusipayaamik apiqqunmik.
Currently Selected:
Matthew 22: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
