Matthew 23

Jesus Kiliktuutigigai Iḷisaurrit Pitquranik Pharisees-lu

(Mark 12.38-39; Luke 11.43, 46; 20.45-46)

1Tavra Jesus uqallaŋaruq iñusalaŋnun iḷitchitquramiñullu, 2Iḷisaurrit pitquranik Pharisees-lu ataniġnaqutiqaqtut iḷisaurriyumiñaqłutiŋ pitquranik qaisauruanik Moses-kun, 3tavraasii kamagiraksraġigisi tuvraġlugiḷḷu supayaanik iḷisautikpasi. Aglaan pisuŋaġnasi piraŋiññik, qanuq alġaqsruisuugaluaqtut tuvralaitkaich alġaqsruutitiŋ. 4Iḷisaurrisuurut God-im pitquraŋiñik siġḷiġnaqsivḷugich iñuŋnun kamaksriñiksraŋat iluqaiññik, ikayuġniaġnagich suuramikunnii kamagitqulugich God-im pitquraŋi. Ikayulaitkaich. 5#Mt 6.1; Dt 6.8; Nu 15.38.Iliŋich piut iluqaiññik tautuqusaaqsiññaqłutiŋ iñuŋnun. Tautuksigik qanutun aŋitigirut qauġmiutaŋich taliġmiutaŋiḷḷu kiguunnaurat imaqaqtuat Bible uqaluuraŋiññik. Qanutun niviŋaniqtutigimmiut nigraŋich akuŋiññi tautuqusaaqłutiŋ kamaginiḷugich God-im pitquraŋi. 6Suli inigillatugaich kamanaqtuat aquppiutat niqinaqimmata, salliġñiglu aquppiutaksrallatummiut aŋaiyyuviŋñi. 7Suli paġlatquturullu kasimmaviŋñi inini, suli taitqusuurut iḷisaurriñik iñuŋnun. 8Aglaan ilivsi inniaŋitchusi iliŋisitun. Tairauniaŋitchusi iḷisaurriñik, qanuq atautchimik iḷisaurriqaqtusi, aasii ilivsi iluqasi aniqatigiiksusi. 9Suli tuqłuġnagu iñupayaaq aapavsiññik nunami, qanuq atautchimik Aapaqaqtusi, qiḷaŋmiittuamik. 10Naaggaunnii tairaunasi aullarriñik, qanuq atausiuruq aullarriksi, Christ-guruaq. 11#Mt 20.26, 27; Mk 9.35; 10.43, 44; Lk 22.26.Iñuk kamanaġniqsrauruaq akunnavsiññi kivgaġiniaġiksi. 12#Lk 14.11; 18.14.Kiñaliqaa kamanaqsiḷiqtuaq inmiñik kamanaiqsauniaqtuq, suli kiñaliqaa kamasaaŋitchuaq inmiñi kamanaqsiḷiqtauniaqtuq.

Jesus Suakkai Ukpiŋŋuaġniŋatigun

(Mark 12.40; Luke 11.39-42, 44, 52; 20.47)

13Qanutun naglignaqtigirusi ilivsi, iḷisaurriich pitquranik Pharisees-lu, ukpiŋŋuaqtuasii. Ittusi pitchiġiiyaqsimammatun upkuaŋa atanniqsimaviata Taavruma qiḷaŋmiittuam, qanuq ilivsi atanniqsimatquŋitchusi God-mun, suli iñuich atanniqsimatqugaluaqtuat pitchaiḷiraġisi.

14[Qanutun naglignaqtigirusi ilivsi iḷisaurriich pitquranik, Pharisees-lu, ukpiŋŋuaqtuasii. Qanuq ivayaqtuġuugisi uiḷgaŋaruat, tigligaivḷugiḷḷu igluŋiññik, aasii taimma maniugaqsivḷusi nakuurualivḷusi takiruanik aŋaiyyuvlusi. Taamna pisigilugu, tatavsausiaksraqsi pigiił̣haaġniaqtuq.]

15Qanutun naglignaqtigirusi ilivsi iḷisaurriich pitquranik, Pharisees-lu, ukpiŋŋuaqtuasii, qanuq kukiḷuktusi immakullu nunakullu atausiuramik-unnii mumiksitchisukłusi. Aasii mumiksitanikavsiuŋ, ilivsi pasirauyumiñaqsiḷaavsaaqsiññaġiksi nagliksaaġviŋmuŋniksramun ilivsisuttauq.

16Qanutun naglignaqtigirusi ilivsi, ayauŋaruatun aullarrit. Iḷisaurrisuurusi kiñaliqaa unniqsuqłiigumi ukpiġnaqsiḷiġlugu atuġlugu uqaluk aŋaiyyuvikpak, pasiñaġumiñaiññivḷugu taŋŋiŋitpagu unniqsuqłiisini. Suli iḷisaurrimmiusi kiñaliqaa aŋiuqsiyumiñaiññivḷugu unniqsuqłiiñmiñik atuqpagu uqaluk manik kaviqsuaq suġauttaġikkaŋa aŋaiyyuvikpaum. 17Ilivsi isumalluaġiitchuasii. Sivuniqsiḷguitkisi iḷisaurrutisi. Nalliak naumałhaaqpa? Manik kaviqsuaq naagga aŋaiyyuvikpak maniŋmik kaviqsuamik ilaaguaqsiḷḷaruaq God-mun? 18Aasii iḷisaurrisuummiusisuli, Iñuk kiñaliqaa unniqsuqłiikpan ukpiġnaqsiḷiġlugu atuġlugu uqaluk ikipkaivik, pasiñaġumiñaiññivḷugu taŋŋiŋitpagu unniqsuqłiisini. Suli iḷisaurrimmiusi kiñaliqaa aŋiuqsiyumiñaiññivḷugu unniqsuqłiunmiñik atuqpagu uqaluk, aitchuutauruq ikipkaiviŋmi. 19Qanutun sivuniqsiḷguisigirusi iḷisaurrutivsiññik. Nalliak naumałhaaqpa? Aitchuun naagga ikipkaivik ilaaguaqsiḷḷaruaq aitchuunmik God-mun? 20Tavraasii iñuum atuqamiuŋ uqaluk ikipkaivik unniqsuqłiikami, tasamma taputigai aitchuutit ikipkaiviŋmiittuat. 21Suli iñuum unniqsuqłiikami atuqługu uqaluk aŋaiyyuvikpak, taputimmigaa God ittuaq tavrani. 22#Is 66.1; Mt 5.34.Suli iñuum unniqsuqłiikami atuqługu uqaluk qiḷak, unniqsuqłiiruq taputivlugu God-im aquppiutaŋa taamnalu aquppiruaq tavrani. 23#Lv 27.30.Qanutun naglignaqtigirusi ilivsi iḷisaurriich pitquranik, Pharisees-lu, ukpiŋŋuaqtuasii. Ilivsi quliŋŋuġutiŋiññik mikiniqsraqpiatchiat nauriavsi niġiñaqtuat aitchuisuurusi God-mun, aasii kamagiŋił̣ł̣ugich naumałhaaqtuat iḷisaurrutiŋich pitqurat, pitqiksiġautairrun nagliktuullu, ukpiġnaullu. Taapkua piraksraġiŋagaluaġisi, allallu tamatkua piḷugich. 24Piḷġusiqsi tainnainman, iñuktun ittusi imiksriuqtuatun qupilġuiyautituġniallaan aasii iivḷugu pikukturuaq kakakti. Iḷumun ayauŋarusi aullarrit.

25Qanutun naglignaqtigirusi ilivsi iḷisaurriich pitquranik, Pharisees-lu, ukpiŋŋuaqtuasii. Qanuq ittusi qallugauratun puggutauratullu salummaqtauruatun qaałhiñaŋich, iḷuvsiññi imaqallavsi salumaitchuamik ivayaqtuunmik piḷḷatunmiglu. 26Ilivsi ayauŋaruasii Pharisees, salummaqqaaqsiuŋ iḷua qallugauram, aasii siḷataa salumaniaġmiuq.

27 # Ac 23.3. Qanutun naglignaqtigirusi ilivsi iḷisaurriich pitquranik Pharisees-lu, ukpiŋŋuaqtuasii. Qanuq ittusi qatiqsaqtatun iḷuvviviksun, siḷatiŋich qiñiyunaqsaqługich, aasii iḷuanni siḷivinŋavlutiŋ iḷuvġich sauniŋiññik iluqaaniglu auruamik. 28Tavraptauq ilivsi qaałhiñavsigun qiññaqaġmiusi nalaunŋaruaguvlusi iñuŋnun, aasii iḷuvsiññi siḷivinŋarusi ukpiŋŋuaġutinik piḷuutiniglu.

Jesus Uqautigigaa Tatavsausiaksrautaat

(Luke 11.47-51)

29Qanutun naglignaqtigirusi ilivsi iḷisaurrit pitquranik, Pharisees-lu, ukpiŋŋuaqtuasii. Qanuq iḷuvviviḷiuqtusi nakuusivḷugich uqaqtiŋiñun God-im, suli qiñiyunaqsaqługich nappaqutaŋich iñuich nalaunŋaruat, 30uqaqłusi, Iñuuqatauŋagupta taimani maŋŋuuptiŋnun, piqasiqsuutiyumiñaiñŋagaluaqtugut ilaiññun tuquġaiñiġmi uqaqtiŋiñik God-im. 31Tainna uqaqavsi, ilivsiññik iḷaurualirusi maŋŋuuvsiññun iñuaqtuqtuanun uqaqtiŋiñik God-im. 32Kiasii naatitchiuŋ maŋŋuuvsi aullaġniikkaŋat. 33#Mt 3.7; 12.34; Lk 3.7.Ilivsi nimiġiat. Ilivsi piayaaŋich tuqunaqaqtuat nimiġiat. Qanuġlugu naŋaġumiñaipiaġiksi nagliksaaġviŋmuktitauniksraq. 34Tavra uqallautigivsi. Tilisiñiaqtuŋa ilivsiññun uqaqtiŋiñik God-im isumaturuaniglu iñuŋnik, iḷisaurriñiglu. Iḷaŋich tuqunniaġisi kikiaktuutilugiḷḷu aŋarrauranun, aasiisuli iḷaŋich ipiġaqtuġniaġisi aŋaiyyuvivsiññi, suli pigruqtitaġlugich nunaaqqiñiñ nunaaqqiñun. 35#Gn 4.8; 2 Ch 24.20, 21.Ilivsi iñuich tatavsaqtauyumausi iñuaqtuġnivsigun nalaunŋaruanik iñuŋnik iñuktauniŋaniñqaŋa patchisaitchuam Abel-gum iñuktauniŋanunaglaan Zechariah-m Barachiah-m iġñiŋata, iñuktaġikkavsi aŋaiyyuvikpaŋmi, akunġagni inivḷu ilaaguaqtauruam God-mun, ikipkaiviuvlu. 36Iḷumun uqallautigivsi, tamatkunuuna iluqaisigun tatavsaqtauniaqtusi ilivsi iñuuruasii paŋmapak.

Jesus Piviuttaġigaa Jerusalem

(Luke 13.34-35)

37Jerusalem-miut. Yaqhii Jerusalem-miuguruasii, tuquġairuasii uqaqtiŋiñik God-im, uyaġagniglu miḷḷuuqługich tamatkua God-im tiliraŋi ilivsiññun. Qanutun akulaisigilugu katitchumiñaġaluaġaġigivsi iluqasi atautchimun, tiŋmiatun katitchiruatun piayaamiñik isaqquŋmi ataaŋnun, aasii pisulaitchusi. 38#Jr 22.5.Uvva, iglusi suksraaqtaupiallagniaqtut suġauttaiqsaulutiglu. 39#Ps 118.26.Qanuq uqallautigivsi, taututqikkumiñaitkivsiŋa uqallakkumiñaqsiḷġataġlusi, God-im piḷḷuataqtilliuŋ iñuk qairuaq pisivlugu Ataniq.

Currently Selected:

Matthew 23: INUPIAQ

Highlight

Copy

Want to have your highlights saved across all your devices? Sign up or sign in

Iñupiatun Mumiksat Uqalugiksuat (North Slope Iñupiaq Bible) © American Bible Society.

Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:

American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)

Learn More About Iñupiatun Mumiksat Uqalugiksuat