Matthew 21

Jesus Isiġman Jerusalem-mun Kakaksiqł̣uni Umialiktun

(Mark 11.1-11; Luke 19.28-40; John 12.12-19)

1Tavra qallikamiŋ Jerusalem-mun tikisanikłutiŋ Bethphage-mun, Iġġiuramun atiqaqtuamun Olives, Jesus tiliŋagik malġuk iḷitchitqurak, 2uqallautivlugik, Aullaġitchik nunaaqqiñun akivsiññun, aasii tavrauvvaa paqinniaġiktik kakakti pituqaqtuak nuġġaŋalu. Pituiġḷugik qaġġisitkik uvamnun. 3Iñuum kialiqaa uqallautikpatik qanuq, uqallakkumautik, Atanġum atuġukkik. Aasii ilaan aullaqtinniaġik tavrauvvaa.

4Tavra taamna nalaunŋaruq taŋŋiutauvluni uqalugiŋaraanun uqaqtaata God-im, uqaqłuni inna,

5 # Zec 9.9. “Uqallautisigik iñuŋi Zion,

Uvva, umialivsi ullakkaasi!

Kamasaaŋitchuq, suli kakaksiqsuq kakaktimi,

nuġġaŋani kakaktim.”

6Iḷitchitqurak aullaŋaruk aasii pivḷutik Jesus pitqutaatun inmiŋnun. 7Iliŋikta qaġġisiŋagaak kakakti nuġġaŋalu, aasii ilaisa iḷianiŋmatigik annuġaatik kakaktiŋnun, Jesus kakaksirraqsiŋaruq. 8Iñugiagniqsrat isivinŋagaich annuġaatiŋ apqutinun, allalli kivluiŋarut qisiqsiutinik napaaqtuniñ aasii iḷiuqqaqługich apqutinun. 9#Ps 118.25, 26.Tavra iñusalaich pisuaqtuat sivuani tamatkualu aquaguaqtuat nipaalaŋarut, Hosanna. Nanġaqtauli Iġñiŋa David. God-im piḷḷuataqtilliuŋ qairuaq pisivlugu Ataniq. Nanġaqtauli God.

10Tavra Jesus tikiñman Jerusalem-mun, iluqatiŋ iñuŋi iniqpaum piallaŋarut, apiqsruqtuqłutiŋ, Kiñauvvauna? 11Tavra iñusalaich uqaŋarut, Tavra uqaqtiŋa God-im, Jesus Nazareth-miñ Galilee-miittuamiñ.

Jesus Aŋaiyyuvikpaŋmuktuq

(Mark 11.15-19; Luke 19.45-48; John 2.13-22)

12Tavra Jesus isiŋaruq aŋaiyyuvikpaŋmun aasii anittaqługich iluqaisa tuniuqqairuallu tauqsiqsuqtuallu aŋaiyyuvikpaŋmi. Suli ulġuġaqługich taipuŋich manniqirit aquppiutaŋiḷḷu tamatkua tuniuqqairuat tiŋmianik. 13#Is 56.7; Jr 7.11.Ilaan uqallautiŋagai, Aglausimaruq Bible-ni God uqallaŋanivḷugu, “Igluqpaga taggisiqaġniaqtuq iñupayaat aŋaiyyuyaqtuġviannik.” Aglaalli ilivsi iriqtuġviḷiutiŋagiksi tigligayuktinun.

14Tavra ayauŋaruallu tusiattuallu ullautiŋarut Jesus-mun aŋaiyyuvikpaŋmi, aasii ilaan iłuaqsiŋagai. 15Tavra tautukamisigik aliuġnaqtuat sut piraŋi Jesus, miqłiqtullu nipaalaruat aŋaiyyuvikpaŋmi, Nanġaqtauli Iġñiŋa David, aŋaiyyuliqsiqpaiḷḷu iḷisaurriḷḷu pitquranik sunŋutchaŋarut. 16#Ps 8.2.Tavra ilaisa uqallautiŋagaat Jesus, Tusaavigich makua qanuq uqaqtilaaŋat? Jesus uqallautiŋagai, Aaŋ. Taiguaŋaitpisi qaŋaunnii Bible-ni uqalugnik inna, “Miqłiqtut nanġaipkaŋagitin nanġautilluatamik.” 17Tavra qimakługich, Jesus aullaŋaruq iniqpaŋmiñ Bethany-mun aasii siñiktaqłuni tavrani.

Jesus Tuqulipkaġaa Fig-mik Siiġñalik Napaaqtuq

(Mark 11.12-14, 20-24)

18Tavra uvlaami, utiqsaġniallaġmiŋ iniqpaŋmun, Jesus kaaliŋaruq. 19Aasii tautukługu fig napaaqtua apqutit saniġaanni ullaŋagaa, aasii paqinŋaitchuq siiġñanik tamarra akutuqpaich kisimiŋ. Tavra ilaan uqallautiŋagaa napaaqtuq, Tavraŋŋaaglaan siiġñanik nauritqigñak. Tavra fig napaaqtua tuquliŋaruq tavrauvvaa. 20Iḷitchitqurat tautukamirruŋ aliuŋarut uqaqłutiŋ, Qanuqłuni manna fig napaaqtua tuquliva tavrauvvaa? 21#Mt 17.20; 1 Co 13.2.Tavra Jesus kiuŋagai, Iḷumun uqallautigivsi, ukpiġutiqaġuvsi sumikunnii nalupqisuŋiḷḷusi kisianik savaaqallayumiñaitchusi taavrumiŋa pirauruamik fig napaaqtuanun, aglaan uqallakkuvsiunnii uumuŋa iġġimun, Nuuttin, igitaugiñ taġiumun, taamna pirauyumiñaqtuq. 22Suli supayaamik apiqsriguvsi aŋaiyyutigilugu, aitchuusiaġiniaġiksi ukpiġutiqaġuvsi.

Jesus Apiqsruqtauruq Ataniġnaqutaagun

(Mark 11.27-33; Luke 20.1-8)

23Tavra Jesus isiġman aŋaiyyuvikpaŋmun, aŋaiyyuliqsiqpaich umialignaŋisalu Jew-guruat ullaŋagaat iḷisaurripkaqtillugu, aasii uqallautivlugu, Sum ataniġnaqutaagun savaaġivigich tamatkua? Kia aitchuŋavatin taavrumiŋa ataniġnaqunmik? 24Jesus kiuŋagai, Uvvalivsauq apiġiniaġivsi apiqqunmik. Uqallautiguvsiŋa kiggutaanik, uvaŋalivsauq uqallautiniaġmigivsi sum ataniġnaqutaagun pisilaaŋannik tamatkua. 25Kia ataniġnaqutiksriñŋavauŋ John paptaiqsiñiksraŋagun, God-im naagga iñuich? Tavra iliŋich uqavaaqatigiirraqsiŋarut avanmun, Uqallakkupta God-miŋŋaqtauniḷugu, ilaan uqallautiniaġaatigut, Summanmi ukpiġiŋaitpisiuŋ John? 26Aglaan uqaġumiñaitchugut ataniġnaqutaa iñuŋniñ piñiḷugu, Qanuq sivuuġagigivut iñuich. Qanuq iñupayaat nalupqigiŋaitkaat John God-mun uqaqtautilaaŋa. 27Tavra kiuŋagaat Jesus, Nalurugut. Tavra ilaan uqallautiŋagai, Uvaŋaptauġli uqallautiyumiñaiñmigivsi kimun ataniġnaqutiksrisilaamnik tamatkuniŋa piyumiñaqsivḷuŋa.

Uuktuun Malġukkun Iġñikkun

28Qanuq isumavisi? Iñuk malġugnik iġñiqaŋaruq. Ilaan ullaŋagaa aŋayukłiq aasii uqallautivlugu, Iġñiiŋ, savagiaġiñ siiġñaqaġviŋmi uvlupak. 29Tavra ilaan kiuŋagaa, savagiaġuŋitchuŋa. Aquvatigun isumalitqikł̣uni savagiaŋaruq siiġñaqaġviŋmun. 30Aasii Aapaŋak ullautilgitchuq igḷuanun iġñiġmi aasii uqallautivlugu tainnatun suli. Tavra iġñiŋan kiuŋagaa, Aaŋ aapa. Savagiaġniaqtuŋa. Aglaan savagiaŋaitchuq. 31Nalliakta nalautpauŋ aapami pisuutaa? Ilaisa kiuŋagaat, aŋayukłium. Jesus uqallautiŋagai, Iḷumun uqallautigivsi, tax-iñik katitchirit akiitchullu isiqqaaġniaqtut atanniqsimavianun God-im sivuliglusi. 32#Lk 3.12; 7.29, 30.Qanuq John Paptaiqsi qaiŋaruq ilivsiññun iḷisautivlusi nalaunŋaruakun iñuuniaġniġmik, aasii ilivsi ukpiġiŋaitkiksi. Aglaan tax-iñik katitchirit akiitchullu ukpiġiŋagaat, aasiiḷi ilivsi tautugluġisiunnii isumalitqiksuat, aquvatigununnii ukpiġiliŋaitkiksi isumalitqigḷusi.

Uuktuun Napaaqsiqiritigun Siiġñaqaġviŋmi

(Mark 12.1-12; Luke 20.9-19)

33 # Is 5.1, 2. Jesus uqallaŋaruq, Naalaksiuŋ allasuli uuktuun. Iñuqaŋaruq nunaqaqtuamik nautchirriiruamik siiġñaqaġviŋmik, aasii inillaiŋaruq saputinik avataagun kiavallakługu, nivaŋmivḷuni wine-liuġunnamik tavruŋa, nappaivḷuniḷu nasiqsruġviŋmik, aasii atukkirrutigivlugu napaaqsiqirinun, aasii ilaa aullaqłuni allamun nunamun. 34Tavra siiġñiviksraq qallimman, ilaan tiliŋagai kivgani napaaqsiqirinun, aitquvlugich autaaġusiaksrautini siiġñat. 35Tavrali napaaqsiqirit tiguŋagaich kivgaŋi aasii anaumiŋagaat iḷaŋat, tuqunmivḷugu alla, uyaġagnik miḷuqtuġmivḷugu alla. 36Tilisitqiŋalgitchuqsuli allanik kivganik, iñugianaaqługich sivulliġniñ, tainnatun piŋalgitkaich. 37Aquatigun ilaa tilisiŋaruq iġñiġmiñik ilaiññun uqaqłuni, Taluġiniaġaat iġñiġa. 38Tavra napaaqsiqirit tautukamirruŋ iġñiq, uqaurrutiŋarut inmiŋnun, Tamarra kiŋuvaannaktuksraun. Qaisitchi, tuqullakput piññaktaaġiluguasii kiŋuvaannaktaaksrautaa. 39Tavra tiguŋagaat aasii annisivlugu siiġñaqaġviŋmiñ, tuqunŋagaat.

40Tavra Jesus apiġiŋagai, Iñua siiġñaqaġvium qaigumi, qanuġniaqpagich taapkua napaaqsiqirit? 41Ilaisa kiuŋagaat, Ilaan taapkua iñumaqłuich naŋinnaqtuakun tuqunniaġai, aasii atukkirrutigilugu siiġñaqaġvik allanun napaaqsiqirinun aitchuiyumiñaġniaqtuanun inmiñun siiġñanik piviksraŋatigun. 42#Ps 118.22, 23.Jesus uqallautiŋagai, Qaŋaunnii taiguaġiŋaitpisiuŋ Bible uqaluŋiññi? “Kaŋiġalluŋmi uyaġagruaq, piitchuiññiqsrapiaq igluqpiruni, taamna igluqpirit iginŋagaat. Taamna piŋaruq nalaupiaqługu Atanġum sivunniuġutaa. Qanutun aliuġnaqtigirut ilaan piraŋi.” 43Tavrasuli Jesus uqallavsaaŋaruq, God-im atanniqsimaniaŋitkaasi, ukpiŋiññavsi, aasii atanniqsimalugich allat kamaksriyumiñaqtuat inmiñik, iñuatun siiġñaqaġvium qaitchiruatun siiġñaqaġviŋmiñik allanun aitchuiḷḷaruanun siiġñanik inmiñun piviksrakun. 44Aasii iñuk puukaqtuaq taavrumuŋa uyaġagmun kanuġġirauniaqtuq, aglaattauq taamna uyaġak kattaqinnikkumi iñuŋmik kanuġġiñiaġaa suksraunġipiaġlugu.

45Aŋaiyyuliqsiqpaiḷḷu Pharisees-lu tusaakamisigik Jesus uuktuutiŋi, puttuqsriŋarut ilaanun uqautigitilaamiŋnik. 46Tavra tigutaaqsaġumagaluaqamirruŋ ilaa, sivuuġagiŋagaich iñusalaich, qanuq ilaisa Jesus uqaqtaurualiŋagaat God-mun.

Currently Selected:

Matthew 21: INUPIAQ

Highlight

Copy

Want to have your highlights saved across all your devices? Sign up or sign in

Iñupiatun Mumiksat Uqalugiksuat (North Slope Iñupiaq Bible) © American Bible Society.

Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:

American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)

Learn More About Iñupiatun Mumiksat Uqalugiksuat