Leviticus 22
22
Salumaruaguniŋich Aitchuutit
1Atanġum piraksriŋagaa Moses 2uqautitquvlugich Aaron iġñiŋiḷḷu, “Kanŋunaqsiḷiqtaksraġiŋitkiksi salumaruaq atiġa, tavraasii qiksikkutikun aŋalatchaġisi salumaruat aitchuutit Israel-gum kiŋuvaaŋisa qaisaŋit uvamnun. Uvaŋa Atanġuruŋa. 3Nalliŋat kiŋuvaaġiravsi, piraġausikun salumaiḷḷaġmi, qallikpagi salumaruat aitchuutit Israel-gum kiŋuvaaŋisa ilaaguaqługich qaisaŋit uvamnun, ilaa savaaqatqikkumiñaitchuq ikipkaivigmi. Taamna tainnainniaqtuq taimuŋaaglaan. Uvaŋa Atanġuruŋa.
4“Nalliŋat kiŋuvaaŋisa Aaron kiḷḷiġruaqaqtuaq naakka maqiuquaqaqtuaq quġġivigmiñi niġiñiaŋitchuq salumaruanik aitchuutinik piraġausikun salumasiŋaunnani. Nallipayaaŋata aŋaiyyuliqsiqpaich aksikpauŋ tuquŋaruam timaa salumaiḷiñiaqtuq naakka anitchigumi semen-mik 5naakkaunnii aksiŋagumi salumaitchuamik niġrunmik naakka iñugmik. 6Kiñaliqaa salumaiḷigumi tainnainniaqtuq anaqalġataqtillugu, aasii niġiyumiñaiñmiuq salumaruanik aitchuutinik ivvaqqaaŋaunnani. 7Siqiñiq nipianikpan salumasiñiaqtuq, tavraasii niġiḷḷasiḷuni salumaruanik aitchuutinik, ilaatakii niqigigai. 8Niġiñiaŋitchuq niqaanik niġrutim ilimisun tuquŋaruam naakka tuqunŋaraŋannik allat niġrutit; salumaiḷiñiaqtuq. Uvaŋa Atanġuruŋa.
9“Iluqaġmiŋ aŋaiyyuliqsiqpaich nalauttaksraġigaich maliġiraksrat qaisatka. Tainna piŋitkumiŋ, pasirauniaqtut aasii tuqulutiŋ, qanukkii kamagiŋaitkaich salumaruat maliġiraksrat. Uvaŋa Atanġuruŋa suli uvaŋa salumasisuugitka.
10“Aŋaiyyuliqsiqpaich qitunġaŋiḷḷu kisimiŋ niġiḷḷaniaqtut salumaruanik aitchuutinik; allat niġiyumiñaitkaich—iñuk unnii tukkuruaq aŋaiyyuliqsiqpagmun naakka savaktauluni ilaanun. 11Aglaan aŋaiyyuliqsiqpaum kivgaŋi, tauqsiŋaraŋi naakka aniŋaruat igluani, niġiyumiñaqtut aŋaiyyuliqsiqpaum niqiksriusiaŋiñik. 12Aŋaiyyuliqsiqpaum pania tuvaaqatchiŋaruaq aŋaiyyuliqsiqpauŋitchuamik niġiñiaŋitchuq salumaruanik aitchuutinik. 13Uiḷgaŋaruaq naakka avinŋaruaq pania miqłiqtuitchuaq aasii utiqłuni aapami igluanun niġiqasiġumiñaġaa aapani aŋaiyyuliqsiqpak aitchuusiaŋiñik. Aŋaiyyuliqsiqpaum qitunġaġiraŋit kisimiŋ niġiḷḷaniaqtut niqiŋiñiñ.
14“Nalliŋich iñuich iḷauŋitchuat aŋaiyyuliqsiqpaum qitunġaŋiñuñ niġiñiġumiŋ salumaruanik aitchuutauruanik pisaaġiŋiḷḷutiŋ, akiḷiqsaksraġigaat aŋaiyyuliqsiqpak iluqaan akiŋanik iḷalugu tallimaŋannik akisutilaaŋata. 15Aŋaiyyuliqsiqpaich qaunakłaaŋiḷḷutiŋ aŋalataksraġiŋitkaich salumaruat aitchuutit 16niġipkaġlugich niġiruksrauŋitchuat iñuit tamatkuniŋa; tainnasim pasiraupkaġniaġaich iñuich suli tatavsaqtillugich. Uvaŋa Atanġuruŋa suli aitchuutit salumasisuugitka.”
17Atanġum piraksriŋagaa Moses 18uqautitquvlugich Aaron-lu iġñiŋiḷu suli Israel-gum kiŋuvaaŋi ukuniŋa maliġuagaksraŋiññik. Nallipayaaŋat Israel-gum kiŋuvaaŋisa naakka allaniñ nunaniŋŋaqtauruaniñ iñuuniaqtuat Israel-mi aitchuisaġumiŋ ikipkautikun, taŋŋiqsaġlugu unniqsuqłiisigiŋaraqtiŋ naakka piyummatikun aitchuiḷutiŋ, niġrun aitchuutaat qilluutaitchuksrauruq. 19Akuqtuqtauniaqpan, aŋusalluuruksrauruq surruutaiḷḷuni. 20#Dt 17.1.Aitchuiñiġuvsi niġrunmik qilluutiqaqtuamik, Atanġum akuqtuġniaŋitkaa. 21Kiñapayaaq aitchuisaġumi iḷammiuġnikun Ataniġmun, naakka taŋŋiqsaġlugu unniqsuqłiisigiŋarani naakka piyummatigivlugu aitchuiñiq, niġrun surruutaitchuksrauruq akuqtuqtauniaġumi. 22Aitchuiñasi Ataniġmun niġrunmik ayauŋaramik, tusiattuamik, qilluutiniŋaruamik#22.22 qilluutaq = deformity which renders one handicapped naakka immaŋaruamik kiḷḷiqaqtuamik, unŋuqaqtuamik, naakka amiġmigun qasalluliŋaruamik. Aitchuiñasi tainnasiñik niġrutinik Ataniġmun. 23Aasii piyummatigilugu aitchuiñiaġuvich aitchuiyumiñaqtutin niġrunmik agliḷaiḷauramik naakka sulliñiġiitchuamik, aglaan akuqtuqtauniaŋitchuq taŋŋiqsaġlugu unniqsuqłiun. 24Aitchuiñasi Ataniġmun niġrunmik igruuk siqumitauŋakpagnik, kipiŋakpagnik, tigluuraŋakpagnik, naakka igruiqtinŋakpan. Tainna piñiaŋitchusi ilivsi nunavsiññi.
25Aitchuiñasi niġrunmik piññaktaaġiŋaravsiññik allamiñ nunaniŋŋaqtauruaniñ. Tainnasit niġrutit sulliñiġiiññisuugait aasii akuqtuqtauyumiñaitchut.
26-27Nuġġaq naakka imnaiyaaq naakka nagruliayaaq anikpan, aakaŋaniñ piiqsaksraġiŋitkaat tallimat malġugni uvluni, aglaan aquagun aitchuutauyumiñaqtuq. 28Aitchuutiginasigik immuliviglu nuġġaŋalu naakka imnaiġḷu imnaiyaaŋalu naakka nagruliglu nagruliayaaŋalu atautchimi uvlumi. 29Aitchuiguvsi quyanaaġutinik Ataniġmun, maliġisaġisi piraksriutit akuqtuġumagaasi God-im; 30iluġaan niġisaġiksi tavrani uvlumi.
31Ataniq uqallaktuq, “Kamagisigik piraksriutitka. Uvaŋa Atanġuruŋa. 32Kanŋunaqsiḷiġnasiuŋ salumaruaq atiġa; Israel-gum kiŋuvaaŋisa salumaruaguniruksraġigaanŋa. Uvaŋa Atanġuruŋa suli uvaŋa salumasisuugivsi; 33suli Egypt-miñŋautiŋagivsi God-igitquvluŋa. Uvaŋa Atanġuruŋa.”
Currently Selected:
Leviticus 22: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
