Leviticus 23
23
Ukpiqtuat Niqinaqiviŋit
1Atanġum uqallautiŋagaa Moses 2ukuniŋa maliġuagaksraŋiññik Israel-gum kiŋuvaaŋisa niqinaqiraġigumiŋ nanġaisaġlutiŋ. 3#Ex 20.8-10; 23.12; 31.15; 34.21; 35.2; Dt 5.12-14.Itchaksranik uvluksraqaqtusi savagviksravsiññik, aglaan itqaumalugu tallimat malġuŋat uvlut, Sabbath, minġuiqsiġvik. Taaptumani uvlumi sumik savagnasi, aglaan katillusi nanġaisitchi. Sabbath ilaata Atanġum pigigaa, sumiḷiqaa iñuugaluaġuvsi. 4Nalunaiḷḷaalugich ukua niqinaqiviksrat tikitchaġikpata.
Qulaurrusiqivik suli Puvlaksautaitchuanik Punniġnik Niqinaqivik
(Numbers 28.16-25)
5 #
Ex 12.1-13; Dt 16.1, 2. Qulaurrusiqivik, quvianġutiginiaqtaŋat qutchiksiḷiġlugu Ataniq, isagutiniaqtuq siqiñiq nipikpan akimiaġutaiḷaŋanni (14th) uvlut sivulliġmi tatqimi. 6#Ex 12.14-20; 23.15; 34.18; Dt 16.3-8.Akimiaŋanni (15th) uvlut Niqinaqiniq Puvlaksautaitchuanik isagutiniaqtuq, aasii tallimat malġugni uvluni niġiñiaŋitchusi imaksraligaanik punniġnik. 7Sivulliŋanni taapkua uvlut katillusi nanġaiñiaqtusi suli sut savaakkaluasi savaŋiḷḷaglugich. 8Aitchuutigilugich Ataniġmun niqit tallimat malġugni uvluni. Tallimat malġuanni aasii uvlut kativsaaġlusi nanġaiñiaqtusi, aglaan savaaġisuurasi savagniaŋitkisi.
9-10Nunamukkuvsi Atanġum qaisaŋanun ilivsiññun aasii kivluiguvsi palauvaksranik, sivulliq qiḷiqtaq aŋaiyyuliqsiqpagmuutiniaġiksi. 11Aitchuutiginiaġaa nuimagilugu Ataniġmun, akuqtuqtauyumausi. Aŋaiyyuliqsiqpaum maniñiaġaa Sabbath qaaŋiqpan. 12Uvlumi taaptumani aitchuutigiguvsigiŋ palauvaksrat, suli ikipkautikun aitchuisaqtusi atausimik ukiuqtutilaaqaqtuamik imnaiyaamik surruutaitchuamik. 13Taapkua aitchuutiksrat aasii iḷalugich sisamatun pounds-tun uqumaisigiruamik palauvagmik akurrutiqaqtuamik olive-gum uqsruanik. Tipaa taaptuma iviġaumaġigaa Atanġum. Aitchuutisiḷu iḷalugich sisamatun qallutitun imaqtutigiruamik taaŋŋaliamik siiġnaniñ. 14Niġiñasigik nutauruat palauvaksrat, uiḷaugaluaġlit, samuunnaaŋagaluaġlit, punniliagugaluaġlit, qaitqauŋaunnagit aitchuutit God-mun. Tavra taamna maliġuagaksraq kamagiraksraġigiksi kiŋuvaaġiniaqtavsiḷu taimuŋaaglaan.
Kivluivigmi Niqinaqutit
(Numbers 28.26-31)
15 #
Ex 23.16; 34.22; Dt 16.9-12. Tallimat malġuk savaiññiġit qaaŋianikpata Sabbath-miñ, aitchuivivsiññiñ qaġġirriyumausi qipitanik palauvaksranik aitchuutiksravsiññik Ataniġmun. 16Aasii malġukipiaq qulit (50th) uvluanni, tallimat malġuk Sabbath qaaŋianikpata, taaptumani uvlumi, manirisaqtusi Ataniġmun nutauruamik palauvaksramik. 17Qitunġaġiiḷḷaat qaġġirrigisirut malġugnik punniignik aasii aitchuutigilugik Ataniġmun ilaaguaġlugik aitchuutik. Punnillaa imaksraligaaq uqumaisilaaqaġniaqtuq sisamatun pounds-tun aasii sivulliiñiñ palauvaksraniñ kivluaniñ aitchuutauluni Ataniġmun. 18Punniik aasii iḷaniaġaich nunaaqqiuruat tallimat malġugnik imnaiyaanik atausimik ukiuqaqtuanik, atausimik aŋusallumik, suli malġugnik imnaigñik aŋusallugnik; nalliŋit unnii surruutaitchuksraurut. Qaisauniaqtut ikipkautikun aitchuutigilugich Ataniġmun, iḷaqaġlugich palauvaksramik aitchuunmik suli wine-mik. Tipaa taaptuma aitchuutauruam iviġagigaa Atanġum. 19Aasii suli aitchuiḷusi atausimik aŋusallumik nagruligmik piḷuun pisigilugu suli malġugnik aŋusallugnik imnaiyaagnik atausimik ukiuqaqtuagnik iḷammiuġniġmun aitchuutigilugich. 20Aŋaiyyuliqsiqpauruam qaiññiaġaik punniik malġuglu imnaiyaak nakuuniqtapiaġataak aitchuutiksrak Ataniġmun. Tamatkua aitchuutit piginiaġaich aŋaiyyuliqsiqpaich. Taapkua aitchuutit salumarut. 21Taaptumani uvlumi savagnasi uvlumi savaakaavsiññik, aglaan katillusi nanġaiyyaġlusi. Kiŋuvaaġiniaqtavsi taamna atugaġiraksraġigaat taimuŋaaglaan sumi iñuuniaġaluaġumiŋ.
22 #
Lv 19.9, 10; Dt 24.19-22. Kivluiguvsi nauriñiaġvivsiññi, kivluġnasigiŋ palauvaksrat killiŋaniittuat nauriviich, suli utiġlusi kivluġnasigik nuvuŋit palauvaksrat pukuŋitchavsi; tavraniillit piiḷḷiuqtuat iñuit suli allaniñ nunaniŋŋaqtauruat piginiaġaich. Uvaŋa Atanġuruŋa God-iksi.
Ukiutchiami Niqinaqiniq
(Numbers 29.1-6)
23-24Sivulliq uvluq tallimat malġuanni tatqich ilaaguaqtauli minġuiqsiġviuluni, aasii katillusi nanġaiyyaġlusi nivliqpata nipauqłuktautit. 25Aitchuiḷusi niqinik Ataniġmun aasii savaakaavsiññik uvlumi savagnasi.
Uvluŋa Piḷuutaiqsiñiġum
(Numbers 29.7-11)
26-27 #
Lv 16.29-34. Quliŋat uvlut tallimat malġuanni tatqich ukiutuaġaġikpan piraġausiq nalautitchaġiksi piḷuutaiqsaġlugich iñuich. Taaptumani uvlumi sumik unnii niġiñasi; katillusi nanġaiyyaġumausi, aasii aitchuiḷusi niqinik Ataniġmun. 28Savagnasi taaptumani uvlumi, qanukkii uvluġigaa piḷuutaiqsiñiġum. 29Kiñapayaaq sumik niġiñiġumi taaptumani uvlumi iḷauŋaiġñiaqtuq God-im iñuŋiññi. 30Aasii kiñapayaaq savagniqpan taaptumani uvlumi, Atanġum ilaata tuqunniaġai. 31Taamna piraksriun tunŋaniaqtuq kiŋuvaapayaavsiññun, sumi iñuuniaġaluaqpata. 32Siqiñġum nipiniŋaniñ quliŋŋuġutaiḷaŋani uvlut taaptumani tatqimi nipitqigñiŋanun aglaan atuqsaqtuq taamna uvluq ilaaguaŋaruagulugu minġuiqsiġvik, niġiŋaiḷaġviulugu.
Niqinaqivik Uqqirviktigun
(Numbers 29.12-40)
33-34 #
Dt 16.13-15. Niqinaqivik Uqqirviktigun isagutiniaqtuq akimiaŋanni (15th) uvlut, tatqich tallimat malġuanni, aasii igliġluni tallimat malġugni uvluni. 35Sivullianni taapkua uvlut katillusi nanġaisaqtusi suli savagnasi savaakaavsiññik. 36Uvlutuaqpan tallimat malġugni uvluni aitchuiñiaqtusi niqinik. Tallimat piŋayuanni uvlut atautchimuvsaaġlusi nanġaiñiaqtusi aasii aitchuiḷusi niqinik. Aŋaiyyuviginiaġiksi taamna uvluq, aasii savagniaŋitchusi savaakaavsiññik.
37(Tavra taapkua ukpiqtuaguruat quyyatigivlugich qutchiksiḷiġutaulutiŋ Ataniġmun katillutiŋ nanġaiḷutiŋ suli aitchuutiqaġlutiŋ niqinik, ikipkautikun aitchuutinik, palauvaksranik aitchuutinik, suli wine-nik aitchuutinik, piraksrautauruaq maliġilugu uvlutuaġaġikpan. 38Taapkua tavra niqinaqiniġich iḷḷatauniaqtut uvluŋiññun Sabbath God-im nalunaiŋaraŋiññun, aasiisuli taapkua aitchuutit iḷḷatiniaġmiut aitchuutigisuuravsiññun, aitchuutivsiññullu taŋŋiqsaġlugich unniqsuqłiisauruat, suli piyummatiqaqłusi aitchuutigiravsiññun Ataniġmun.)
39Kivluanigataġuvsigik nautchiivisi, quvianġuvigilugu niqinaqigisirusi tallimat malġugni uvluni, isagutilusi akimiaŋanni (15th) uvluŋisa tallimat malġuŋata tatqich. Sivulliq uvluq ilaaguaġlugu savagnasi niqinaqiŋaiġuvsiḷu tallimat piŋasut uvluanni. 40Taaptumani sivulliġmi uvlumi siiġñaġigñiqtauruanik piksraġlusi napaaqtuvsiññiñ, suli piksraġlusi qisiqsiutiŋiññik nunagluktuami napaaqtum, qisiqsiutiŋiññiglu akutuqpaukkaqtuat napaaqtut, aasii isagutilugu quyyatigilugu qutchiksiḷiġutaulugu Ataniġmun God-ivsiññun. 41Quvianġuvigilugu tallimat malġugni uvluni. Taamna piraksriun atugaġiniaġaat kiŋuvaaġiravsi taimuŋaaglaan. 42Iluqaġmiŋ Israel iñuŋi iñuuniaqtut uqqirvigñi tallimat malġugni uvluni, 43kiŋuvaaġirasi iḷisimayumaut Ataniġmun iñuupkaŋatilaaŋiññik Israel-gum kiŋuvaaŋich uqquutaġruiññani aullatigamigich Egypt-miñ. Uvaŋa Ataniq God-iksi.
44Tavraasii tainna Moses-gum uqautiŋagai Israel-gum kiŋuvaaŋich maliġuagaksraŋiññik niqinaqikpata qutchiksiḷiġlugu Ataniq.
Currently Selected:
Leviticus 23: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
