Leviticus 21
21
Salumaruaguniŋat Aŋaiyyuliqsiqpait
1Atanġum piraksriŋagaa Moses uqautitquvlugich Aaron-gum iġñiġutiŋi aŋaiyyuliqsiqpauruat, “Nalliat unnii aŋaiyyuliqsiqpauruat salumaiḷiñiaŋitchuq aksiglugu tuquŋaruam timiŋa piraġausikun ilimiñik iḷaksruutiluni aŋaiyyurrikpata nanmiñiq iḷaŋat tuqukpan, 2kisian ilaata aakagikpagu, aapagikpagu, iġñiġikpagu, panigikpagu, aniqatigikpagu aŋun, 3naakka uiñiŋaitchuaq aniqataa iñuuruaq iglumiñi. 4Salumaiḷiñiaŋitchuq ilimiñun aksiglugu tuquŋaruam timaa tuquniqpata tuvaaqanmi iḷaŋich.
5 #
Lv 19.27, 28; Dt 14.1. “Nalliat unnii aŋaiyyuliqsiqpait kivraġniaŋitkaa niaquni naakka kipilugich umini naakka piḷagaġluni timimigun nalunaiqsaġlugu qivġuruagutilaani. 6Salumaruksrauruq suli kanŋunaqsiḷiġniaŋitkaa atiġa. Ilaa qaitchisuuruq niqinik aitchuutauruanik uvamnun, aasii salumaruksrauruq. 7Aŋaiyyuliqsiqpak tuvaaqasiġñiaŋitchuq aġnamik akiitchuuŋaruamik naakka aġnamik aŋusiuŋaruamik naakka avinŋaruamik; ilaa salumaruaguruq. 8Iñuit isummatigiruksraġigaat aŋaiyyuliqsiqpak salumaruagulugu, qanukkii qaitchisuuruq niqinik aitchuutauruanik uvamnun. Uvaŋa Atanġuruŋa; uvaŋa salumaruŋa suli iñugiratka salumaruaġuġuugitka. 9Aŋaiyyuliqsiqpaum paniŋa akiitchuġuġniqpan, kanŋunaqsiḷiġaa aapani; ilaa ikipkaġlugu tuqutauniaqtuq.
10“Aŋaiyyuliqsiqpaich Qaukłiat kuvirauŋaruq uqsruqtaaġunmik niaqumigun aasii ilaaguaqtauvluni atullasivḷugich aŋaiyyuliqsiqpauruam annuġaaŋi, tavraasii iḷḷaiqsuŋaiḷaġniaŋitchuq naakkaunnii aligaġlugich annuġaani qiñiġnaqsaġlugu qivġuruagutilaani. 11-12Ilaa tavra qaisaġiŋaruq uvamnun aasii piraġausikun salumaiḷiñiaŋitchuq naakkaunnii suksraġiŋaiġḷugu salumaruaq Tupiġa utiġvigigumiuŋ isiqqaaġluni iglumun tuquŋaruaqaqtuamun, ilaata aapagigaluaġumiuŋ naakka aakagigaluaġumiuŋ. 13Tuvaaqatiniktuksrauruq aŋusiuŋaitchuamik, 14katittuksraġiŋitkaa uiḷgauruaq naakka avinŋaruaq aġnaq naakkaunnii akiitchuuŋaruaq. Tuvaaqasiġñiaqtuq aŋusiuŋaitchuamik kisian ilaata maŋŋumiñiñ. 15Tainna piŋitkumi, miqłiqtuŋi, salumaruksrauruat, piraġausikun salumaitchuaguniaqtut. Uvaŋa Ataniq ilaaguaqtaġiŋagiga Aŋaiyyuliqsiqpagnun Qaukłiġuqługu.”
16Atanġum piraksriŋagaa Moses 17uqautitquvlugu Aaron, “Nalliŋat kiŋuvaaġiraqpich qilluutaqaqpan timimiñi qaitchiñiaŋitchuq niqinik aitchuutinik uvamnun. Taamna tainnainniaqtuq taimuŋaaglaan. 18Kiñapayaaq timimigun qilluutaqaqtuaq aitchuutinik savagniaŋitchuq, suli kiñapayaaq ayauŋaruaq, tusiattuaq, timimigun iłuirrutiqaqtuaq, naakkaunnii nutim qilluutaqaqtuaq; 19kiñaunnii argagiitchuaq naakka isigagiitchuaq; 20kiñasuli napiŋaruaq naakka iñukuluuraq; kiñasuli irigiitchuaq naakka uviñigiitchuaq; naakkaunnii igruiqsinŋaruaq aitchuutinik savagniaŋitchuq. 21Kiŋuvaaŋisa Aaron aŋaiyyuliqsiqpaum timimiktigun iłuirrutiqaqpata qaitchiñiaŋitchut niqinik aitchuutauniaqtuanik uvamnun. 22Tainnaittuam aŋutim niġiyumiñaġaa niqi aitchuun uvamnun, iluqaaktun salumaruaġlu salumapiaġataqtuaġlu niqik aitchuutik, 23aglaan pisigilugu timimiñi iłuirrutini, qalliñiaŋitkaa salumaruaq talukiyaaq naakka qalliḷugu ikipkaivik. Qaunakłaaŋirrutikun aŋalamaqługniaŋitkai taapkua salumaruat, qanukkii Atanġuruŋa suli uvaŋa salumasiŋagitka.”
24Tavraasii, taaptumiŋa, Moses-gum uqautiŋaniġaa Aaron, iġñiŋiḷḷu Aaron, suli iluqaisa Israel-gum kiŋuvaaŋich.
Currently Selected:
Leviticus 21: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
