Leviticus 20
20
Tatavsautiŋi Kamaksriŋiññiġum
1Atanġum uqallautigaa Moses 2uqautitquvlugich Israel-gum kiŋuvaaŋich, “Nallivsi naakkaunnii allaniñ nunaniŋŋaqtauruam iñuuniaqtuam akunnivsiññi miqłiqtuni aitchuutigikpagu god-mun Molech-mun uyaġagnik miḷḷuuġlugu tuquttuksraġigaat nunaaqqimiittuapayaat. 3Nallivsi aitchuutigikpauŋ miqłiqtuni Molech-mun aasii salumaruaq Tupiġa salumaiḷiḷugu suli kanŋunaqsiḷiġlugu salumaruaq atiġa, akiḷḷiḷiutiniaġiga suli iḷauŋaiġñiaqtuq iñugiramnun. 4Aglaan suli nunaaqqiuruat suqutigiŋitparruŋ savaaġiraŋa suli tuqunŋiḷḷugu, 5Uvaŋa akiḷḷiġiliutiniaġivsi aŋayuqaaġiiktuasii allallu iḷḷatiruat ukpiqsraŋaiqsuat uvamnik, aŋaiyyuvlutiŋ Molech-mun. Iḷauyumiñaiġñiaqtuq nalliat unnii iñugiramnun.
6“Qanuq piñiaqtilaavsiññik iḷisimasuglusi ullautiguvsi uqaqatiqaġuuruanun tuquŋaruat iḷitqusiŋiññik, akiḷḷiḷiutiniaġivsi suli iḷauyumiñaiġñiaqtusi iñugiramnun. 7Salumaruagusitchi, qanukkii uvaŋa Ataniq God-iksi. 8Kamagisigik pitquratka, qanuq uvaŋa Atanġuruŋa suli uvaŋa salumasipkaġivsi.”
9 #
Ex 21.17; Mt 15.4; Mk 7.10. Atanġum ukua maliġiraksrat qaisaġiŋagai. Nallivsi pimaqłuutikun uqamaqłuutikpagu aapani naakka aakani tuqutauniaqtuq; iliŋnun tavra tunŋaruq tuqqutin.
10 #
Ex 20.14; Lv 18.20; Dt 5.18. Aŋun allatuqatiqaġumi allam aŋutim nuliaŋanik, iluqatik aŋullu aġnaġlu tuqutauruksrauruk. 11#Lv 18.8; Dt 22.30; 27.20.Aŋun allatuqatiqaġumi iḷaŋannik aapami tuvaaqatiŋisa kanŋunaqsiḷiġaa aapani, aasii iluqatik aŋullu aġnaġlu tuqutauruksrauruk. Iliŋigñun tunŋaruq iliŋiksa tuqutauniŋak. 12#Lv 18.15.Aŋun allatuqatiqaġumi ukuaġmiñik, iluqatik tuqutauruksrauruk. Navikkaak iḷagiigñiq aasii iluqaagnun tunŋaruq iliŋiksa tuqutauniŋak. 13#Lv 18.22.Aŋun allatuqatiqaġumi aŋunmik, savaŋaruk piḷupiallaktuamik, aasii iluqatik tuqutauruksrauruk. Iliŋigñun tunŋaruq tuqutauniŋak. 14#Lv 18.17; Dt 27.23.Aŋun aasii tuvaaqasiqpan aġnamik aġnamlu taaptuma aakaŋanik, iluqaġmiŋ piŋasuuruat ikipkaġlugich tuqutaksraurut pisigilugu kanŋunaqsiḷiġun savaaġiraŋat; tainnasiq igliqtitaksraġiŋitkiksi akunnavsiññi. 15#Ex 22.19; Lv 18.23; Dt 27.21.Aŋutim atuaġiniqpauŋ niġrun, ilaalu niġrullu tuqutaksrauruk. 16Aġnaq allatuqatiqaġniatakkumi niġrunmik, ilaalu niġrullu tuqutaksrauruk. Iluqatik patchisauruk tuqqunmignun. 17#Lv 18.9; Dt 27.22.Aŋun tuvaaqasiqpan aniqanmiñik aġnauruamik naakka nayaksraġmiñik, iñuit takkuanni kanŋunaqsiḷiqtaksrauruk aasii aullaqtillugik nunaaqqimiñ. Allatuqatigiŋavlugu aniqatini aġnaq tatavsaqtaksrauruq.
18 #
Lv 18.19. Aŋun nalaqatiqaqpan aġnamik aalġupkaqtillugu, iluqaaktun iḷauŋaiqsitaksrauruk Israel-guqatimigniñ, qanukkii navgiruk piraġausimik salumasiñikun. 19#Lv 18.12-14.Aŋun allatuqatiqaqpan atchagmiñik, iluqatik tatavsaqtaksrauruk navgivḷutik iḷagiigñiġmik. 20Aŋun allatuqatiqaġumi aŋaalugmi tuvaaqataanik, kanŋunaqsiḷiġaa aŋaaluni, aasii ilaalu aġnaġlu tatavsaqtauniaqtuk; nalliak unnii miqłiqsiñiaŋitchuq. 21#Lv 18.16.Aŋutim aatpauŋ aniqanni tuvaaqataanik aasii katillugu, tuquniaqtuk miqłiqsigaluaġnatik. Salumaitchualiqiruq piraġausikun aasii kanŋunaqsiḷiqługu aniqanni.
22Ataniq uqallaktuq, “Kamagisigik iluqaisa pitquratka suli piraksriutitka, ayyaktauŋitchumausi nunaŋaniñ Canaan, taamuŋa tikiutiyumaaqtavsi. 23Atuġnasigik piraġausiŋit iñuit taavani iñuuniaqtuat; Aullaqtitaġitka ukpiġutaitchuat isillatquvlusi nunamun. Iviġaumagiŋitkitka pigiitchuat piraġausiŋich. 24Aglaan uvva unniqsuqłiiŋagivsi nunalluatamik naurisuqtuamik, pigitquvlugu ilivsiññun. Uvaŋa Ataniq God-iksi, aasii ilivsiguaqtaġiŋagivsi allaniñ nunaqpauruaniñ. 25Tavraasi, nalunaigiruksraġigisi niġrutillu tiŋmiallu piraġausikun salumaruaguruat suli salumaitchuaguruat. Niġiñasi salumaitchuanik niġrutinik naakka tiŋmianik. Uqallausiġiŋagitka salumaitchuaguvlugich, aasii niġiñiġuvsigik salumaiḷiñiaqtusi. 26Salumaruaguniaqtusi suli kisima piginiaġivsi, qanukkii Atanġuruŋa suli salumaruaguruŋa. Ilaaguaqtaġiŋagivsi allaniñ nunaqpauruaniñ kisima pigisukłusi.
27“Kiñapayaaq aŋun naakka aġnaq ikayuqtisiuqtuaq ilitqusiŋiññiñ tuquŋaruat tuqutauniaqtuq uyaġagnik miḷḷuuġlugu; Nallisi tainna piñiqpata tavra patchisauniaqtusi tuqqutivsiññun.”
Currently Selected:
Leviticus 20: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
