Exodus 32
32
Kaviqsuamiñ Manigmiñ Savaaq Aŋusalluq Nuġġaq
(Deuteronomy 9.6-29)
1 #
Ac 7.40. Iñuich iḷitchuġikamirruŋ Moses atqakallaŋisilaaŋanik iġġimiñ, Aaron avałługu uqautiŋagaat, “Uvvauvagut nalurugut imma iñuk Moses sutilaaŋanik, aullarrikput Egypt-miñ; god-iliuqsigut aullarriksraptinnik.”
2Aaron-gum uqallautigai, “Piiġḷugich siutiġutiŋich kaviqsuat maniich tuvaaqativsiññiñ, iġñiġutiivsiññiñ, suli panivsiññiḷḷu, aasii qaġġisilugich uvamnun.” 3Tavraasii iñuich piiŋagaich kaviqsuat maniich siutiġutitiŋ aasii Aaron-muutivlugich. 4#1 K 12.28; Ac 7.41.Siutiġutit pivḷugich, auktinŋagaich, kuvivḷuguasii niġrutiŋŋualiuġviŋmun, aasii kaviqsuamik manigmik aŋusallumik nuġġaŋŋualivḷutiŋ.
Iñuich uqaqtut, “Israel kiŋuvaaŋich, uvva una god-ikput, aullarrigiŋaraqput Egypt-miñ!”
5Tavraasii Aaron nappaiŋaruq ikipkaivigmik sivuġaanun aŋusallum nuġġaliam aasii uqaqhuni, “Uvlaaku niqinaqiniaqtut qutchiksiḷiqsaġlugu Ataniq.” 6#1 Co 10.7.Uvlaatchaurami uvlaakumman qaġġirriŋarut niġrutinik ikipkautiksranik suli allanik niqiksranik iḷammiuġnikun aitchuutiksranik. Iñuich aquptaaŋarut niqinaqisaqhutiŋ, piuqłaanġipiaġataŋarut aglaan imiqhutiŋ.
7Ataniq uqallaktuq Moses-mun, “Qilamiqsruġlutin atqatqigiñ, qanukkii iñuktin, aullatiŋaratin Egypt-miñ, piḷuusiqirut suli ayyakłuŋa. 8Unisanikkaat apqun piraksriutigiraġa maliġitquvlugu; aŋusallumik nuġġaliuŋarut auktitamiñ kaviqsuamiñ manigmiñ suli nanġaqługu aitchuivigivlugulu ikipkautinik. Uqaqtut tavragguuq iliŋisa god-iŋat, aullarrigiŋaraŋat Egypt-miñ. 9Iḷisimaruŋa qanutun uqayunaisilaaŋiññik taapkua iñuich. 10Tavraasii, nutqaqtinniatagnaŋa. Qinnautigitka, suli suksraunġiġñiaġitka. Aasii ilivich kiŋuniitillu nunaqpaguqtinniaġivsi.”
11 #
Nu 14.13-19. Aglaan Moses-gum iŋiulagaa Ataniq God-ini aasii uqaqhuni, “Ataniiq, summan uvva qinnautivigich iñugiratin, annautianiŋaratin Egypt-miñ sapiġñaqtuakun suli suaŋŋatikkun? 12Summan Egypt-miut uqaġumiñaġniaqpat aullatiniḷugich iliŋnun iñutin Egypt-miñ, sivuniqaqhutin tuqutchukługich iġġiñi suli suksraaġlugich tamatkiġḷugich? Qinnaŋaiġiñ; isummitqigiñ suksraunġiŋitchumagitin iñugiratin. 13#Gn 22.16, 17; 17.8.Itqaumalugich kivgatin Abraham, Isaac suli Jacob. Itqaumalugu iḷumutuuruaq unniqsuqłiisigiŋaran iliŋiññun kiŋuvaaksriññiaġnivḷugich uvluġiat iñugiaktilaaŋatitun suli kiŋuniiŋich nunaksriññiaġnivḷugich nanmiñiq nunaksraŋannik taimuŋaaglaan.” 14Tavraasii Ataniq isummitqiŋaruq aasii iñuni suksraunġiŋił̣ł̣ugich anayasaaġutikkaluamisun.
15Moses atqaġniqsuq iġġimiñ, tigumiaqługik uyaqqak aglagviik piraksriutinik aglaŋaruak iḷumikkullu siḷatimikkullu. 16God-im ilaata aglagviḷiaŋik suli titiqtuutivlugich tavruŋa piraksriutini iliŋiññun.
17Joshua-m tusaaŋagaich iñuich nipaalaruat aasii uqallautivlugu Moses, “Tusaaruŋaimma aŋuyakpaluktaqtuanik nullaummiviŋmi.”
18Moses uqallaktuq, “Qanuq apkua nipanŋitpat akimaruatun naakkaunnii akiiñŋaruatun; amma attualaruat piut.”
19Moses qalligami nullaummiviŋmun tautukkaa aŋusalluq nuġġaq suli iñuich kanaakkiuruat, qinnalipiaġataŋaruq. Tavrani natqani iġġim, miḷuqsautigaik aglagviik tigumiaqtagni aasii siqummalaaqługik. 20Tiguŋagaa aŋusalluq nuġġaq savaaŋat aasii auktiłługu, kaukługu avyuġuqługu, akułługuasii imiġmik. Aasii taimma Israel-gum kiŋuvaaŋich taaptumiŋa imiqtinŋagaich. 21Uqallautigaa Aaron, “Immaipkua iñuich suraatin, tainna pigiisigiruamik piḷuusiqipkaġniqpigich?”
22Aaron-gum kiugaa, “Qinnautinaŋa, iḷisimarutin qanutun makua iñuich pigiiḷḷiqisuguutilaaŋiññik. 23Uqautigaanŋa inna, ‘Nalurugut imma iñuk Moses sutilaaŋanik, aullarrikput Egypt-miñ, god-iliuqsigut aullarriksraptignik.’ 24Apiġiŋagitka qaġġirritquvlugich kaviqsuanik manigñik aasii qiñiyunaqutaiyaŋarut, aasii qaił̣ł̣ugich uvamnun. Iginŋagitka qiñiyunaqutit igniġmun aasii tavra taamna aŋusalluq nuġġaq nuiruq!”
25Moses iḷitchuġiŋaruq iñuich piaqłaanġiqsitilaaŋiññik Aaron-mun, isumalluaġiiḷivḷutiŋ sivuġaanni allat akiḷḷiimiŋ. 26Tavraasii qikaqhuni paaŋani nullaummiviŋata nipatuvluni uqaŋaruq, “Kiñapayaaq savaurriruaq Ataniġmun uvuŋa qaiḷi!” Tavraasii Levi-m kiŋuvaaŋich ullautiŋarut avałługu, 27aasii uqallautigai, “Ataniq God-auruaq Israel-mun piraksriiruq iluqasi savikpasi kaluglugich nullaummivikuaġlusi aasii utiqtaġlusi paaŋaniñ uumaŋŋa allamullu aasii tuqullugich aniqatiisi, iḷauraasi, suli siḷalliisi.” 28Levi-m kiŋuvaaŋich kamaksriŋarut, aasii tuqułługich 3,000-tun iñugiaktigivalliqsuat aŋutit taaptumani uvlumi. 29Moses uqaqtuq Levi-m kiŋuvaaŋiññun, “Uvlupak nalunaiqsaurusi aŋaiyyuliqsiqpauniġmun savautivlugu Ataniq tuqutchikavsi iġñivsiññik aniqatiivsiññiglu, tavraasii Atanġum quviasaaġutiksritkaasi.”
30Uvlaakumman Moses-gum uqautigai iñuich, “Savaŋarusi piaġiitchuamik piḷuunmik. Aglaan uvva mayuvsaaġniaqtuŋa iġġimun Ataniġmun; suagguuq suliqutigiŋaiḷḷaniaġaa piḷuusiqiaqsi.” 31Tavraasii Moses utiŋaruq Ataniġmun uqaqhuni, “Ukua uvva iñuich piaġiipiaġataqtuamik piḷuusiqiŋarut. Savaŋarut god-iliuqhutiŋ kaviqsuamik manigmik aasii aŋaiyyuvigivlugu. 32#Ps 69.28; Rev 3.5.Apiġigikpiñ suliqutigiŋaiquvlugu piḷuutaat; aglaan suliqutigiŋaiġumiñaitkupkich, atiġa piiqsaġiñ aglaaġniñ atiŋiññiñ iñugiraqpich.”
33Atanġum kiugaa, “Taipkua piḷuusiqiŋaruat akiḷḷiġivluŋa atiŋich piiġñiaġitka makpiġaamniñ. 34Ki aullaġiñ, aullatisaqtukkich iñuich inimun quliaŋaramnun iliŋnun. Itqaumalutin isaġuligma aullatiniaġaatin, aglaan piviksraq tikiññiaqtuq tatavsaiviksraġa taapkuniŋa iñugnik piḷuusiqiaŋisigun.”
35Tavraasii Atanġum naŋirrutiqpak iñugnun qaipkaŋagaa, qanukkii Aaron kavisuamik manigmik aŋusallumik nuġġaġmik piḷiuqtinŋagaat.
Currently Selected:
Exodus 32: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
