Exodus 31
31
Savaktiksrat Tupqani Atanġum Nayuqtauviŋata
(Exodus 35.30—36.1)
1Atanġum uqallautigaa Moses, 2“Naliġaktaaġiŋagiga Bezalel, iġñiŋa Uri-m suli tutaalua Hur-m, maŋŋuŋiñiñ Judah-m, 3suli immiŋagiga Iḷitqusimnik. Isumattutiksriñŋagiga, kaŋiqsimmanmiglu, pisuġniġmik, suli qanusipayaanik qiñiyunaqsivḷugich savallaniġmik— 4sivunniuqpata pisuġnimiktigun qiññaksraŋiññik suli savaglugich kaviqsuamik manigmik, qatiqtuamik manigmik, suli patukpagmik; 5sanaraksriuqłutik uyaġagiksuanik inillaktaksranik; sananiġmik qirugnik; suli qanusipayaanun qiñiyunaqsivlugich savaanun. 6Piksraqtaaġiŋammigiga Oholiab iġñiŋa Ahisamach-gum, maŋŋuŋiñiñ Dan-gum, savaqatigitquvlugu. Pisuġniksraŋannik aitchuŋammigitka iluqaisa allat savaktit, iluqaiññik piraksriutigiramnik savaaġitquvlugich: 7Tupiq nayuqtauviga, Sivunniuġutim Kiguunniŋa suli matua, iluqaisalu suġautaksrautiŋi Tupqum, 8niġġiviuraq allallu sut niġġiviurami atuġuuraŋich, naparuaq naniqaġvik kaviqsuamik manigiksuamik piḷiaq allallu atuġuuraŋich qaunaksriniŋagun, ikipkaivik tivraġiksautinun, 9ikipkaivik aitchuutinun ikipkaġniaqtaŋat allallu sut atuġniaqtaŋich, iqaqqiviglu tunŋaviŋalu, 10qiñiyunaqpaktuat aŋaiyyuliqsiqpauruat annuġaaksraŋich Aaron-gum suli iġñiŋisa atuaksraŋich savaaġigumirruŋ aŋaiyyuliqsiqpauniq, 11uqsruqtaaġun, suli tivraġiksuaq ikipkaaksraq Salumaruamun Inimun. Iluqaisa tamatkua savakkuvsigik, nalaupiallaktaksraġigaat piraksriutiga iliŋnun.”
Sabbath Unaŋuiqsiġvik
12Atanġum piraksriġaa Moses, 13uqautitquvlugich Israel-gum kiŋuvaaŋich inna, “Nuimaruaġilugu Sabbath, unaŋuiqsiġviga, nalunaiñŋutaurukkii akunnaptigni taimuŋaaglaan, iḷitchuqqutausaġlugu tavra uvaŋa, Atanġuruami, ilaaguaqtaġivlusi iñugiliutiŋagivsi. 14Atuumaraksraġigiksi uvlua unaŋuiqsiġvium, qanukkii salumaruaguruq. Kialiqaa atuŋitkumiuŋ, aglaan savagluni taaptumani uvlumi, tuqutauruksrauruq. 15#Ex 20.8-11; 23.12; 34.21; 35.2; Lv 23.3; Dt 5.12-14.Itchaksrani uvluni savagviksraqaqtusi, aglaan tallimat malġuŋat uvlut qiksigisraksraġigiksi unaŋuiqsiġviusaġlugu ilaaguaqtauŋavluni uvamnun. Kiñapayaaq savaktuaq taaptumani uvlumi tuqutauniaqtuq. 16Israel-gum kiŋuvaaŋisa atuqtaksraġigaat taamna uvluq nalunaiñŋutaulugu sivunniuġutauruamun. 17#Ex 20.11.Allaŋuġniaŋitchuq nalunaiñŋutaulugu Israel-gum kiŋuvaaŋiññun uvamnullu, qanukkii uvaŋa, Atanġuruaŋa, savaŋagikka qiḷaglu nunalu itchaksrani uvluni, aasii tallimat malġuŋanni savaŋaiŋaruŋa suli unaŋuiqsiqł̣uŋa.”
18God-im uqautiŋaiġamiuŋ Moses Mount Sinai-mi aitchuŋagaa malġuugnik uyaqqagnik aglagviigñik ilaata aglaamiñik piraksriutauruanik.
Currently Selected:
Exodus 31: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
