1 Corinthians 15
15
Christ Aŋŋisaa
1Aniqatiit, paŋmapak itqaqtitchukkivsi alġaqsruutigiŋakkamnik tusaayugaaġiksuamik ilivsiññun. Taimñauruq tusaayugaaġiksuaq taimani ukpiġiŋakkaqsi, aasiisuli ukpiġiŋaiŋaisaqsi paŋmapak. 2Annaurrauyumaaqtusi ukpiġituiññaġuvsigik taapkua tusaayugaaġiksuat, aglaan annaurrauyumiñaiñmiusi iḷumun ukpiŋisuaġuvsi.
3 #
Is 53.5-12. Alġaqsruiŋaruŋa ilivsiññun naumaniqsrauruanik iḷisaurrutinik aitchuusiaġiŋakkamnik, taamna Christ tuquŋanivḷugu piḷuutivut pisigivlugich, taŋŋiqł̣ugich Bible unniqsuqłiisigiŋakkaŋich taavruma sivusaaġruani. 4#Ps 16.8-10; Mt 12.40; Ac 2.24-32.Suli alġaqsruutigiŋammigiga aitchuusiaġiŋakkaġa, Christ iḷuviqtauŋanivḷugu, aasii uvluk piŋayuaŋni aŋipkaqtauŋanivḷugu, taŋŋiqł̣ugich Bible unniqsuqłiisigiŋakkaŋich taavruma sivusaaġruani. 5#Lk 24.34; Mt 28.16, 17; Mk 16.14; Lk 24.36; Jn 20.19.Aasii aŋianikami, Christ tautuktinŋaruq Cephas-mun, maanna qulit malġuŋnun iḷitchitquranun. 6Tavra suli tautuktinŋammiuq iñugiałhaaqtuanun 500-miñ aniqatinun atautchimiitillugich, iñugiagniqsraŋich iñuurut, iḷaŋich siñiksaaniŋagaluaqtut tuqqunmi. 7Tautuktinŋammiuq suli James-mun, maanna iluqaiññun tiliraŋiñun God-im. 8#Ac 9.3-6.Aqulliannun tamatkua, tautuktinŋammiuq uvamnun, tilirauruamun alġaqsruitquvluŋa aqusaaġruatigun allat tilirauruat. 9#Ac 8.3.Kamanaiññiqsrauruŋa tilirauruaniñ, nalliummatiŋitchuŋaunnii tairauniġmun tilirauruamik qanuq nagliksaaqtinŋavlugich aŋaiyyuliqiruat God-mun. 10Aglaan paŋmapak irrusiġa irrusiġigiga ikayuutaagun God-im nagliktuutiqpaŋan. Ilaan nagliktuutiqpaŋa uvamnun asiḷiqqutauŋaitchuq. Siġġaqutigiłhaaŋagiga alġaqsruiñiq tusaayugaaġiksuamik nallipayaaŋanniñ unnii tilirauŋaruat, uvaŋaġruiññaq piŋiñmigiga aglaan God-im nagliktuutiqpaŋata ikayuqłuŋa. 11Nallivut uvaŋalu iliŋiḷḷu alġaqsruigaluaġupta ilivsi ukpiliŋarusi.
Aŋŋisikput
12Paŋmapak Christ alġaqsruutauruq aŋipkaqtauŋanivḷugu tuqqunmiñ, summan iḷasi uqalliavat aŋŋisaiññivḷugich tuquŋaruat? 13Aŋŋisaiññiqpata tuquruat, Christ aŋipkaqtauŋaiñmiñiqsuq. 14Christ aŋipkaqtauŋaitpan, alġaqsruiñiqput taŋiġitchuq, suli ukpiġurri taŋiġiñmiuq. 15Qanuq iḷumun itpan uqausiġikkaqsi tuquŋaruat aŋipkaqtauniaŋiññivḷugich, God-im aŋipkaŋaiñmiñiġaa Christ. Taamna iḷumun itpan, saglutiginiġikput God, qanuq alġaqsruirugut God-mun aŋipkapiaŋanivḷugu Christ tuqqunmiñ. 16Tuquŋaruat aŋipkaqtauŋitpata, Christ aŋipkaqtauŋaisimammiuq. 17Christ aŋipkaqtauŋaisimakpan, ukpiġurri anniqsuutauŋitchuq, suli suksraunġiqsauyumaaqtusi suli piḷuutisi pisigilugich. 18Aasiisuli tamatkua ukpiqtuaguvlutiŋ siñiksaŋaruat tuqqunmi suksrauniqsut. 19Ukpiġutipta Christ-mun anniqsuqsimakpatigut paŋmapatualuk iñuuniptiŋni, naglignałhamaaqtugut iñupayauraniñ allaniñ.
20Aglaan ami Christ aŋipkaqtaupiaŋaruq tuqqunmiñ, Ilaa aŋipkaqtauqqaaŋaruq, aasii aquvatigun iluqaġmiŋ siñiksaŋaruat tainnatun aŋipkaqtauniaġmiut. 21Tavra iñuum atautchim iñuich tuqqusiqsinmagich, allavlivsauq iñuum tuquŋaruat aŋipkaqtitaullasigai. 22Qanuq iluqaġmiŋ Adam kiŋuniŋi tuquruksraurut, aglaan iluqaġmiŋ atausiŋŋuqatauruat Christ-mun iñuggusiqsauniaqtut. 23Aglaan nalaunŋaruakun piviksrallaamikkun, Christ aŋiqqaaŋaruq, aasii qaitqikpan, tamatkuali pigikkaŋi Christ. 24Taamna pianikpan, Christ qaiññiaġaa God-mun supayaanun atanniqsimmatini, akiiḷianiqqaaġlugu atanniqsimmatipayauraq suaŋŋatipayauraġlu, iñuŋniitkaluaqpan ilitqusiqł̣uŋniitkaluaqpallu. 25#Ps 110.1.Christ umialguniaqtuq-suli akiiḷiḷġataġlugich iluqaisa uumigirini. 26Aqulliq uumigiri akiiḷirauniaqtuaq tuqqun. 27#Ps 8.6.“Qanuq God-im aitchuŋagaa suaŋŋanmik atanniqsimatquvlugich suaŋŋatipayaurat.” Tainna aglausimaruq Bible-ni. Taapkua uqaluich uqallautikamisigut, “Ilaan atanniqsimaniaġai suaŋŋatipayaurat,” sivuniqaqtuq Christ-mun atanniqsimayumiñaiññivḷugu God, aitchuiruaq inmiñun atanniqsimmatiksraŋanik suaŋŋanmik. 28Christ payarianikkumigich suaŋŋatipayaurat, ilaaptauq God-im Iġñiŋa atanniqsimapkaġniaġmiuq God-mun, suaŋŋatiksriññiŋaruamun inmiñun, God kamanaġniqsrautqulugu supayaaniñ.
29Tuquŋaruat aŋipkaqtaulaipiaqpata, summan iñuich iḷaŋich paptaiqsausuuvat pisivlugich tuquŋaruat? Aŋŋisaitpan, anniqsuusiaksraitchuq kiñaliqaa iñuk paptaiqsaugaluaqtuaq pisivlugu tuquŋaruaq. 30Aŋŋisaitpan, ataramik anayanniuqtinnayaitkiga iñuggutiga. 31Qanuq uvlutuaq satqumiruŋa tuqqunmun. Taamna nalupqinaipiaqtuq aniqatiit, nalupqinaisigimmatuttauq quviasuutiqaqtilaaġa pisigivlugu ukpiqtuaġuŋaniqsi Ataniptiŋnun Jesus Christ-mun. 32#Is 22.13.Tuquruat aŋipkaqtauniaŋitpata, anniqsuusiaqaġnaġayaitchuq nagliksaaqtitauniq iñuŋniñ piyuaqsiusivsun Ephesus-mi, niġrułłuŋniñ piyuaqsiqsuatun pikama. Tuquruat aŋipkaqtaulaitpata, piḷuusiqirauruat uqalukaaŋatitun pigiññaqta, Niġigiññaqta taaŋŋaġlutalu aliasuŋitcha qanuq uvva uvlaakun tuquniaġmiugut. 33Sagluqipkaġnasi iñuŋnun uqaqtuanun tainna. Piqasiqsuutiguvsi ilaiññun maliksugniaqtusi. 34Isumasatqigñaqsigaasi nalaunŋaruakun, piḷuusiqiŋaiġḷusi. Iḷasi iḷitchuġiŋaitchut suli God-mik. Taamna uqallausiġigiga kanŋutchaqugaluaqłusi.
Aŋipkaqtauruaq Timi
35Iḷaanni iñuk apiqsriñiaġmiuq inna, Qanuqłutiŋ tuquŋaruat aŋipkaqtitauvat? Qanutchimik timiqaġlutiŋ qaiñiaqpat? 36Isumalluaġiitchuatiin, iḷisimarutin nautchirriikavich nautchiaksranik nunamun, nausalaitchut nauriaġuġlutiŋ tuquqqaaŋaunnatiŋ nautchirriutitin. 37Aasii nautchiaksraq nautchirriutikkan qiññaqaŋitchuq nautchiatun nauyumaaqtuatun nautchiaksramiñ. Nautchirriirutin palauvaksraġuġumaaqtuamik naagga allakaaksramik nautchiaksrałhiñauvlugu. 38Aglaan God-im nauriaġuqtitchuugaa, ilaan qanusiutqukamiuŋ, aasii nautchiaksraun naurisuuruq ilaan qanusiuyumaaġutchimisun. 39Tainnatuttauq, uumaruurapayaurat atiruanik timiqaŋiñmiut. Iñuich inmikkulli timiqaqtut, niġrutilliasii allagiiñik timiqaqtut, tiŋmiat suli allauruanik, iqaluitchauq allauruanik. 40Isaġulgich qiḷaŋmi timiqaqtut allauruamik, aasiisuli nunamiittuat iñuich allauruamik. Piññaġnautaat qiḷaŋmiittuat timit allauruq piññaġnautaanniñ nunamiŋŋaqtauruat timit. 41Atausiuruq qaumanġa siqiñġum, allauvlunisuli qaumanġa tatqim, suli allauvluni qaumanġat uvluġiat, uvluġiaq-una allakaamik qaumaniqaqłuni allamiñ uvluġiamiñ.
42Tainnainmiuq aŋipkaqtauniŋat tuquŋaruat. Timigikkavut paŋmapak nautchiaksratun nautchirriutauruatun ittut nunamun, tuqusuurut. Aglaan aŋipkaqtaugupta timiqaġniaqtugut tuquyumiñaitchuanik. 43Paŋmapak timigikkavut maqusuurut, aglaan aŋipkaqtaugupta, timiniŋniaqtugut qaummaġiksuanik. Paŋmapak timigikkavut suaŋaitchut, aglaan aŋipkaqtitaugupta, timivut suaŋaniaqtut. 44Paŋmapak timivut iñugruiññaurut, aglaan aŋipkaqtaugupta, ilitqutchich timiŋiññik timiniŋniaqtugut. 45#Gn 2.7.Taavrumuuna aglautiŋaruq Bible-ni inna, “Iñuqqaaq Adam iñuġuŋaruq.” Aglaan Christ iḷiŋaruq allatun Adam-tun aitchuiruaq iñuggunmik isuitchuamik. 46Nalunaigisiuŋ, ilitqutchim timaa sivulliuŋaitchuq. Iñugruiññaum timaa sivulliuŋaruq, aquagun aasii ilitqutchim timaa. 47Iñuqqaaq nunamiñŋaqtauruq, nunam avyuaniñ. Iñulitqiun qiḷaŋmiŋŋaqtauruq. 48Iñupayaaŋi nunam tainnatun ittut taavrumatun savaaguŋaruatun nunamiñ. Iluqaġmiŋ qiḷaŋmuŋniaqtuat tainnatun inmiut ilaatun qaiŋaruatun qiḷaŋmiñ. 49Irrusiptiktun paŋmapak iñuktun savaaguŋaruatun nunam avyuaniñ, tainnatun iḷiyumaaġmiut iñuktun qairuatun qiḷaŋmiñ. 50Uqallautigivsi aniqatiit. Iñugruiññaich timiqaqtuat uviñiqaqłutiŋ auqaqłutiglu aitchuusiaġiyumiñaitkaich quviasuutiŋi qiḷaum, tainnatuttauq maqusuuruat timit aitchuusiaġiyumiñaiñmigaat maquyumiñaitchuaq.
51 #
1 Th 4.15-17. Uvva uqallautigivsi kaŋiqsiñaiñŋaruamik qaŋapak. Tamatkiġḷuta siñigniaŋitchugut tuqqunmi, aglaan uvagut iluqata allaŋŋuqtauniaqtugut, 52akkupauraq, sukałhaaġluguunnii iñuum siqunġipaŋniŋaniñ, nipauqłuktaun nivliqpan nuna isukłitpan. Qanuq nipauqłuktaun nivliġñiaqtuq, aasii tuquŋaruat aŋipkaqtauniaqtut tuqutqikkumiñaiġḷutiŋ, aasii allaŋŋuqtitauluta. 53Qanuq una maqulisuuruaq irrusiq simmausiqsuksrauruq maquliyumiñaitchuamik irrutchimik. Una tuqusuuruaq irrusiq simmausiqsuksrauruq tuqulaitchuamik irrusiñigluni. 54#Is 25.8.Maqusuuruaq irrusiq simmausiqpan maqulaitchuamik irrutchimik, tuqullaruaq simmausiġḷuni tuqullaiqsuamik tavrani taŋŋiġñiaqtuq aglautiŋaruaq Bible-ni inna, “Tuqqun akiiḷiraupiallaktuq.”
55 #
Ho 13.14. “Tuqquun, tavraŋŋaaglaan tuqupkaqtuaġumiñaiġitin iñuich.
Tuqquun, tavraŋŋaaglaan anniaġumiñaiġitin iñuich.”
56Tuqqutim anniaġaatigut qanuq uvagut piḷuksiŋavluta, aasii pitqurat iḷisaurriruat uvaptiŋnik piḷuutim suutilaaŋanik, pasiyumiñaiġaatigut suksraunġiqsautquluta. 57Qanutupayauraq quyyavigiyumiñaġikput God, qanuq ilaan akimapkaġaatigut Ataniptigun Jesus Christ-kun. 58Taamna tainnainman, piviuttaġikkavsi aniqatiit, suaŋasitchi ukpiġutiqaġnivsiññi iḷumun ittuamun, tuniqsimatitchi, ataramik savaurriyumalaaġlusi Ataniġmik, iḷisimaugaġlusi savaurriñiqsi Ataniġmik piuŋiḷauŋisilaaŋanik.
Currently Selected:
1 Corinthians 15: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
