1 Corinthians 16
16
Aitchuutit Ukpiqtuaguqatinun
1 #
Ro 15.25, 26. Paŋmapak tuyuġivsi kiusaqługu apiqsruutiksi tuyuutivsiññi, aitchuiñikun maniŋñik ilaaguaqtauŋaruanun God-im iñuŋiñun. Uqallautigivsi pitquvlusiḷi piraksriutipiaġataptun Galatia-mi aŋaiyyuliqiruanun. 2Savaiññipayaani atausiullaalusi ilaaguaqsiḷḷaayumausi maniŋñik, aasii tutquġlugich piḷḷuataġniġumi iñuk, aitchuisaġataŋitchumausi qaiguma. 3Qaiguma tuyuutiginiaġitka aitchuutisi piqasiġḷugich tuyuutinik Jerusalem-miittuanun, aatchumagaich taamuŋa ukpiġnaqtuatigun kivgatigun ilivsi piriksraqtaaġiniakkavsigun. 4Iłuaqpalliaqsikpan piviksraq aullaġumiñaġluŋa, iliŋisa malikkumiñaġniaġmigaanŋa.
Paul Sivunniuqtuq
5 #
Ac 19.21. Ullagniaġivsi Macedonia-kuaqqaaġluŋa, qanuq sivuniqaqtuŋa Macedonia-kuaġumavluŋa. 6Aasii iḷaanni nayuqtuallagniaġivsi naaggaunnii ukiiḷuŋa. Tavraasii ikayuġumiñaġniaġivsiŋa iglauniksramni sumun aullaġaluaġuma. 7Atanġum pisuutigikpagu, uvliuqtuallaguktuŋa ilivsiññi, qanuq tautugumaŋitkivsi akkupaurałhiñaq nalautchaaqsiññaġlusi. 8#Lv 23.15-21; Dt 16.9-11.#Ac 19.8-10.Aglaan Ephesus-miinniaqtuŋa Pentecost-liqiniġmi, 9qanuq qanutun alġaqsruiviksraġa ittuq uvani tusaayugaaġiksuamik, aasiivsauq akiḷḷiḷiqsuiruat savaamnik iñugiagmiut. 10#1 Co 4.17.Timothy qaikpan, qaunagiyumausi tagialatquŋiḷḷugu akunnavsiññi, qanuq savaaqaqtuq savaaŋanik Atanġum, uvaptuttauq. 11tavraasii kialiqaa suuŋiḷaġiŋaiḷḷiuŋ ilaa. Aullaqsaqpan ilivsiññiñ, upaluŋaiyaġumagiksi quviasugluni iglauyumauq, suli uvamnukkasuaġluni, qanuq niġiugigiga tikiññiksraŋa piqatiqaġluni aniqatinik. 12Uqallautiniaġivsi Apollos-kun aniqatiptigun. Kiaqsrupiaġaluakkaġa ullaquvlusi piqasiġḷugu allanik aniqatinik, aglaan God-im nalupqinaitchuq pisuutigiŋiññiġaa paŋmapak aullaqtuksraulugu. Ullaŋniaġaasi piviksranikkumi.
Uqaluguiqsaaġutit
13Quviqtaiḷisitchi pigiitchuamun, tuniqsimatitchi ukpiġutivsiññi, qapiŋairrutiqaġitchi, saŋŋisitchi Ataniġmun. 14Sunapayaaq pikkaqsi, pisiuŋ piviuttaqqutikun. 15#1 Co 1.16.Aniqatiit, iḷisimarusi igluqatiŋi Stephanas ukpiqqaaqtuaguŋarut nunami Greece-mi, aasii ikayuipiaġataŋarut ukpiqtuanik. 16Kiaqsruġivsi isummatigilluataquvlugich ikayuġlugiḷḷu tainnatchich iñuich, suli kimupayauraq savaqatauruamun siġġaqiqatauruamullu. 17Quviasuutigigiga qaiñiŋat Stephanas Fortunatus-lu Achaicus-lu qanuq ikayuŋagaanŋa ilivsi pisiksraġaluavsisuttauq maaniitkuvsi. 18Iliŋisa qapiŋaiqsaaŋagaanŋa ilivsivsauq qapiŋaisaaqłusi. Isummatigilluataqsigik tainnaittuat iñuich. 19#Ac 18.2.Aŋaiyyuliqiruat nunaŋani Asia-m tuyuqtut paġlatinik. Aquila-lu Priscilla-lu piqatiqaqłutiŋ aŋaiyyuliqiruanik aŋaiyyuliaġuuruanik iglumiŋnun tuyuqtut ilivsiññun paġlatipiaġatanik ukpiqtuaguqanmiŋnun. 20Iluqaġmiŋ aniqatit tuyuqtut paġlatinik. Paġlatisitchi avanmun ukpiqtuat paġlatikaaŋannik. 21Uvaŋa Paul aglakkitka ukua paġlatit uvamnik. 22Kiñaliqaa piviuttaqqutaitchuaq Ataniġmun, suksraunġiqsauli. Ataniqpuut, qaġġiiñ. 23Ataniqput Jesus nagliktuutiqpaqaġli ilivsiññun. 24Iluqata atausiŋŋuqatigikaptigu Christ Jesus tuyuutigigiga piviuttaqqutiga ilivsiññun. Amen.
Currently Selected:
1 Corinthians 16: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
