Sofoni 2
2
Veeloo le mangalanndo
1«Éé niaa vanaa nɔ haa lasiɛmbu le-a!
La muungu o niaa pila nin.
La mɛɛndian kɔlta niaalan,
2lɔ́ɔ́ pá mì sɔɛi fula masa bɛndoo o sondo-e dimin,
mì paalen le hiow
mɛɛ foeende hiaw o hoeiye nin nuaa yɛ.
Là cùm háá mì kɔltuw bɛndu Mɛlɛka-o tol niaa coo le,
là cùm mì paale kɔltuwle Mɛlɛka len le komal niaa le.
3Lelan, niaa vanaa tuisiaŋaa co o lɛŋnden coo-a,
la muli hɔlla o Mɛlɛka lo.
Niaa vanaa dɛnɛ sandaa,
la nuwviaa ɲɛ-ɲɛ co dɛnɛ sandaa,
la kindin le vaa vanaa tuisiannda.
O kon mì la sɔla baŋaa
o paale kɔltuwle Mɛlɛka len coo.»
Dɛnɛ palaa co Filistia cum
4«Vannda co hunɔɔ Kaasa piovɔɔ,
Askelɔn co hunɔɔ itambu.
Vanaa co icali Asdɔd-a co townɔn ipala déŋ,
a toawnin vannda Ekrɔn mì kobio lo fondo.
5Dɛnɛ palaa co vanaa co icali
o mɛmma ihɛllan kɔngɔ-a cum!
Dɛnɛ palaa co le yungu hin fulaa Krɛte-o!
Kani le sanga niaa sɔɛi Mɛlɛka-e dimin ni aa:
‹Sangaa co le Kanaan, lɛŋnde Filistia pɛɛn.
I tɛɛmbuunin nɔm Kanaan,
i solinin vanaa co icali nɔm nin-nda kpow.
6Tandala co o mɛmma ihɛllan kɔngɔ lan
la siŋnunnin bil puiyaa
a yasabaala vanaa mandaa n'cɔlua,
mì la siŋnun vɛlɛ vɔ̀lɛ́lan le cɔlua mandaa.›
7Vanaa lonin yoomu o polale Yuda len ninnd-a,
nda nɔnin tándàla lan ni.
Lon nda vanin cɔlua ndaa yɔɔ diólan ni.
Icɔl, a vanin pɛngio o cɛilan nin Askelɔn,
kani Mɛlɛka Hala ndaa yiyannin nda coo,
mò mangala dɛnɛ ndaa hɔlaa celen.»
Dɛnɛ palaa co le Moabua a Amɔnnda-o
8«I tuei yeowla fula yungoo Moab o sondo lan,
mí tuɛi sɔɔn vɔɔŋun fula poaa
Amɔnnda o sondo-on.
À va yungu nuu yeowlan
má va lɛŋnde yungu ni kon kiolɔɔ
le lɛŋii ndɛi cɔɔloo.
9Lelan, le yoomu nuu,
ya Mɛlɛka-Nɔ-Kpaayaa-Kpow-vo soo nuaa ni,
ya Hala Israɛlla pɛɛn,
Moab co hunɔɔ itambu mò siŋnun maa Sodɔm,
mì poaa Amɔn-nda siŋnun maa Komɔr.
Lɛŋnde ndalen le vanin maa yondo n'kayon,
le siŋnunnin maa fonda ihɛl,
maa fonda tambu le fɛɛn a fɛɛn-ndo.
Vanaa lonin yoomu o yungu nuu nin-nda
poondanin ɲɛm vanin lon-ndon,
a sɔlanin lɛŋnde len kɛ́ɔ.
10Kon tosalannin Moabua
a Amɔnnda le yonga ndaa,
kani a yeow yungu Mɛlɛka-Nɔ-Kpaayaa-Kpow-vo-o,
má kialu lɛŋnde ndɔlen le lɛŋnde ndalen cɔɔloo.
11Kɛ, Mɛlɛka co nda fula o hɔl maa ɲɛ-vueinan,
kani o tɛɛmbuunin halaa o lɛŋnden coo kpow.
Vanaa-mangalaa-isɔɔa súúlan kpow,
hali a co levil taw-va,
vana-vana lonin o ndu lo
mò baŋ vulan ndu Mɛlɛka o labɛngunin.»
Dɛnɛ palaa dimin le Etiopiia a Asiriia-o
12«Niaa vanaa co Kus-a bɛɛ,
mɔɛi nii cɔwve co niaa buuluu.
13Mɛlɛka co baa siɛndi a ba luaŋ-ndo,
mò diw vannda Asiri,
mò pɛl Ninive le ndu mingio
ciee-piɔ́mndo a lɛŋnde veselɛilen.
14Cɔlua vanin hinilan pɛngio lon,
visia súúlan kpow a vanin ndon:
hua a saiya bɛɛ a vanin lɔan o sungbuan bolle.
Vana tuɛinin yowva caŋndo o diola pɔmbɔlan,
ɲɔɔ vanin o tambɛiyo kandɔɔ o kèéden lacɛiyon,
kani pɛngɛn yɔm sɛɛdre n vanin n'suingianndon.
15Àá! Ninive vannun a kɔlkɛndɔɔ,
o vannun nila ɲulu o kɔlkɛsiaa nin.
Vanaa va lenin-nda va dimio aa:
‹Naa n co naa ni! Vana-vana co maa naa le!›
La tofa vɔ mɛɛ kobi kon siŋnun ciee-piɔ́mndo yɛ.
La tofa vɔ mɛɛ o siŋnun bɛ̀mɛ́lta visia yɛ.
Vana-vana kei pɛ ndu ikɛi,
o kpinga a hùíyé hɔŋndo a á baa hiiloo.»
Currently Selected:
Sofoni 2: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
