Sofoni 3
3
Yerusalɛmnda cɛl veelu Hala veelu nda-o le
1«Ndu kobi delɔɔ coo pɛ hoo nin-ndo,
dɛnɛ palaa co ndu cum,
kobi vanaa nila kalua
a vanaa lakafaa co hoo nin-ndo pɛɛn.
2O tui Mɛlɛka diom te,
o cɛl kanalannda ndɔlan te.
O laalan Mɛlɛka ndɔɔ le,
o sɔɔnguu Hala ndɔɔ ikɛi le.
3Simlacia co o kobi kalaa nin-nda,
maa yàlàá co pɛɛliaa-a nda co ni,
vanaa kialaa n'yamaa co lon-nda,
maa tunaa yondoa dia icɔl pii-a nda co ni,
idii niko a nɔ lɛ ɲɛ nda sɔam te.
4Vanaa kuundiannda a vanaa yiyaa ladúmbúa
vanaa tɛɛngaa-diom-Hala-a ndɔa co ni.
Vanaa-solia-lasálàà ndɔa co
ɲɛ siŋnun teengen le Hala-o lebɛɛ ke le,
a co tɔŋndo tɛɛmbuuo.
5Nduyɛ, Mɛlɛka co nda tɛɛn o kobi ndɔɔ nin,
Mɛlɛka yɛ, o sandaa o co ni,
O co dɛnɛ oo dɛnɛ tundan tosa le.
Idii oo idii, o co yaman ndɔn kiolɔɔ,
a paale siaalen bɛɛ, o co lon.
Vana kɔlvesɛiyo ndu sina masinaa lasiɛmbu le.
6Mɛlɛka dimi aa:
‹I tɛɛmbuu vanaa-mangalaa-isɔɔa,
mí koombiaa calta vanaa ndaa cɔwva.
Nɛila ndalan o kobio tɛɛn la yimbu.
Vana-vana co lɛ kei lecoo le.
I pesi kobila ndalan, vana co lɛ lenin te.
Hali vanndo ndu pilɛ,
o co lɛ icali lenin te few.
7O kon mí yiyan maa
o laan nin, a kenin ya bɛɛlen,
a cɛlnin silala nilan,
o kon calta ndalan la tembunin te.
Àá! Mbɔ̀ i soŋ nda bɔɔ!›
Kɛ nda, idii púŋ nda laasiaa dɛnnda ndalan
a yɔŋ vɔɔn nda tosa-o ni.
8Lelan, Mɛlɛka dimi aa:
‹La cum-ndɔ!
La cum paale ya cannin le seilen tɛndaa len.
Lɔ́ɔ́ ya cuungiaanin vanaa-mangalaa-isɔɔa
le yamɛi nii kiolɔɔ-o.
I mɔɔsiaanin masɛi le kɔl ni tuwvo tuisio ndi coo,
a le ndi fukpaa a kɔl ni fulaa.
Kani i loamnin lɛŋnden kpow
a yinnde nile paŋalaalen.›»
Mɛlɛka mangalanin vanaa súúla celennda
9«I dindinin cɔcɔn vanaa súúla celen,
haliko ma piɛi ya,
mà tosal-la vallo a diom pilɔɔ.
10Vanaa nia, hali a co o peela bɛndulan leeloo
o lɛŋnde Kus len nin-nda,
vanaa nia biilaa co a sɛŋiannda nɛɛ-nɛɛ ka-a,
à hunnin mà cuu ya sálàlan.»
Kpemaa le Israɛlaa tɔ̀a
11«Paale len, niaa vanaa co vanaa nia-a,
siɛmbula bii lɛnin niaa
le dɛnnda vɔɔnnda niaa tosa paandu a ya lan te.
Kani i faŋanin vanaa yongaa niaa tɛɛn.
O kon, la pɛnginin yongaa tosaa
o pembii nii diandɛi coo.
12I mɛinin vanaa tuisiannda
a vanaa bala fondoa yoomu niaa tɛɛn,
á nuwviaanin nɛɛ viannannda
o ya Mɛlɛka nin-nda pɛɛn.
13O Israɛlla tɛɛn yɛ, vanaa lonin yoomu-a
tosa lɛnin dɛnɛ sandaa lepɛŋ te.
A dimi lɛnin lacòò le.
Vana tui lɛnin sɔɛi huiyaa vana
fula nda o lasondo le.
Kɛ a vanin cɔlua ndaa yɔɔ diólan,
mì nda pila hinin pɛngio a kɔlɲuloo.
Ɲɛ-ɲɛ hiiluu lɛnin nda kɔltan te.»
Yerusalɛm tangulunnin vɛlɛ tangulɔn sɛnɛi
14«Lelan, la yonda a kɔlkɛndɔɔ, niaa vannda Siɔn.
La deŋi a ɲaale bɛndoo, niaa Israɛlla.
La naŋ kɔl mì la viow kponyoo taw,
niaa vannda Yerusalɛm.
15Kani Mɛlɛka faŋa dɛnɛ palaa
ndóò tuu le niaa tuisio coo-o,
o tow yaamɔaa niaa polon.
Mɛlɛka, o co masa Israɛlla-o co niaa tɛɛn.
Lelan siòòŋii bii lɛnin niaa le dɛnɛ palaa le.
16Paale len, vannda vanin dimio Yerusalɛm aa:
‹Siòòŋii bii niaa le, niaa vannda Siɔn,
la vu n'dial te.
17Kani Mɛlɛka, Hala niaa co niaa tɛɛn.
Kuubanɔ co niaa baŋaa-o o co ni.
O co a kɔlkɛndɔɔ taw le niaa,
o mingi kaola ndɔɔ o sɛnɛi le niaa.
A toɲa, o yonda a kɔlkɛndɔɔ
mó dɔawnun ɲaale le niaa
18maa mɛɛ vana naŋ kɔl o paale kafolen coo yɛ.›
I faŋa hau dɛnɛ palaa va niaa coo-o
a siɛmbula va niaa coo lan.
19O telen kon, i saangiaanin
vanaa tósal niaa dɛnɛ vɔɔndo-a kpede.
I cɛwnin saa laandua namtaa mà cinda,
i minginin a nda sɛŋi-a cuungiaa nɛɛ pilɛ.
I siinguunin yungu nuu vanaa tɔ́ɔ́ bɛndu-a
a vanaa bɛndua o lɛŋii nda vanin
o siɛmbulan nin-nde kpow nin.
20O telen kon, i minginin niaa nanu.
A toɲa, i minginin niaa nanu
mì siinguu niaa vanaa tɔ́ɔ́ bɛndu-a
a vanaa bɛndua o vanaa súúla celeŋaa
co o lɛŋnden coo-a kpow tɛɛn.
I tosanin kon tuma ya mangalanin
dɛnɛ niaa niaa pila o hɔl-lo.
Dion ya Mɛlɛka soo-o co kon ni.»
Currently Selected:
Sofoni 3: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
