Sofoni 1
1
1Tuma Osia po Amon-ndo va masalen tosaa o tàndá Yuda-o coo-o, mí Mɛlɛka soaa o Sofoni lo. Po Kusi-o a po imama Kedalia-o Sofoni va ni, fulaa o polale Amaria len a o polale Esekia len nin.
Mɛlɛka kɔngɔlan le lɛŋnden kpow yɛɛvɔɔ dɔvɔɔ
2«I co ɲɛ-ɲɛ basɔɔ o lɛŋnden coo selemenden!
Diom ya Mɛlɛka soo-o co kon ni.
3I co vanndacieea a cɔlua tɛɛmbuu,
mì tɛɛmbuu vɛlɛ yowva coocoo a suwva o peelo.
I tɛɛmbuunin vanaa kɔlvesɛiya
a sɔɔn nda co tosaa mà va vannda lueiyo
o pɔwlan nin-ndon.
I vɔɔsuunin vanacieo o lɛŋnden coo few-few.
Diom ya Mɛlɛka soo-o co kon ni.»
Mɛlɛka simulnin Yuda a Yerusalɛm
4«I co vanaa co icali o tàndá Yuda-o nin-nda
a vanaa co Yerusalɛm ciee-a lɔɔ.
I tɛɛmbuunin ɲɛm tɔ̀un lo
o kaannde Baal-ten nin-ndon,
mì ɲumi mun o fondaa ho.
I tɛɛmbuunin vanaa baalaa ndɔa
a vanaa-solia-lasálàà ndɔa,
háá mì vannda pɔɛɛnun a dɛnɛ ndaa.
5I tɛɛmbuunin vanaa hel o yindɔla cɛilan coo,
má va vulan baŋɔɔ le ɲɛm pangelen co o halataala-on biiloo-a.
I tɛɛmbuunin vɛlɛ vanaa co vulan baŋɔɔ
ya Mɛlɛka o labɛngunin,
má va mɛnanndo o diola nilan,
kɛ má va kpemalan yiiyo
o diola piɔmndo Molɛk lan-nda kpow.
6I tɛɛmbuunin vanaa co faŋanndo
ya Mɛlɛka ibuŋ, a co buulan te-a,
vanaa co ya sɔɔnguu ikɛi le ya sila ɲuna le-a pɛɛn.
7La mei Maalii, o co Mɛlɛka-o o hɔl kpili,
kani paale ndɔlen le co le tiiyaa.
Mɛlɛka cii sálàá toosiaa,
o cii nin vanaa o veelu le sálà kon-nda dindi.
8Mɛlɛka dimi aa:
‹Te paale solia sálà len le tiiya pɛ,
i dɔawnin simlacia, poaa masaa
a vanaa co cuɛinɔn súú celenndo-a kpow yɛɛvɛ.
9Paale len, i soaŋnin vanaa huulu
o kèédei coo-a kpow,
a pei cɛila vanaa ndaa bɛndua
a bolofaa yɔŋ vɔɔndo
a á ɲɛ-sɔlaa delɔɔcoo-a pɛɛn.
10Paale len, yoondiaalan
a diomnda vɔkɔ-vɔkɔlan la tuɛinunnin a ba Dio-n'suwvo.
Diom ya Mɛlɛka soo-o co kon ni.
Vana tuɛinin hiiliaalan o bungɛi sɛnɛi kobio nin,
ɲɔɔ piɔndinin taw a kpengii pembon.
11Niaa vanaa co Maktɛs-a,
la hiiliaa, kani yulaa niaa kpow co hunɔɔ vu,
vanaa co lusul n'volio tuuvo-a kpede a cuunin!
12Paale len, i balunin Yerusalɛm
mɛɛndianndo a tɛngɛla leyinndan.
I co vanaa kɛɛ le kpeŋanndo
ma vannun yili,
mɛɛ kììyo cal o mɔiyan bɛngu nuaa yɛ-a
soŋɔ̀ɔ̀ soŋɔ̀ɔ́ pila.
Kani a co dimio aa:
Mɛlɛka nɔla ɲɛ-ɲɛ tosa le,
o va dɛnɛ kɛndɛ, o va o vɔɔn.
13Bolofaa ndaa co nda puunɔn o laba a paa-kala,
mì cɛila ndalan la siŋnun bémbélan.
A cɔawnin cɛilan, kɛ a celnin lenin te.
A solinin nakɔla n'rɛsɛnndan,
kɛ a kolnin mɔima rɛsɛŋun mun te.›»
Paale Mɛlɛka len
14«La tofa vɔ!
Paale bɛndule len le co le tiiyaa.
Paale Mɛlɛka len le co nin kpɛɛlun.
Vana tuɛinin somisominndo a caŋndo
o paale Mɛlɛka len coo.
Kuubaa hiow cɔwvo caa-a bɛɛ a koŋulnin.
15Paale kɔltuwlen paale len le vanin ni,
paale ŋɔɔciannden a paale dɛnɛ palaalen le vanin ni.
Paale tɛɛmbua len a paale imɔnɛ len le vanin ni,
paale maɲumnden a paale ɲumma n'kpungbalen,
paale yumbuyumbulen
a paale mɔ́m bɛndulen le vanin ni.
16Paale bulu hɔŋaa a lee saa kóndóó soaanin-nden,
paale len, vana tuɛinin vóólun-vóólunn cɔwvo
le kobila mayoomulan a cɛila coocoolan biyɔɔ.
17I tuisinin dɛnɛ palaa vanndacieea coo
mà va kɔlan a nɛiyo nuwviaa maa vanaa sumɛi.
Kani a cua hakio a ya Mɛlɛka.
Kooma ndan ma sɛŋinnin maa cundu,
mì nda pila tiw a vílɛ́iya maa bil.
18Volin ndan a sianin ndan
nɔlanin nda ciindiaa
o paale kɔltuwle Mɛlɛka len coo le few.
Mɛlɛka loamnin lɛŋnden kpow
a yinnde ndɔle paŋalaalen.
Ì vanin sɔɛi kpundɛ bɛndu dɛ!
Mɛlɛka co vanndacieea co
o lɛŋnden coo-a kpow tɛɛmbuu.»
Currently Selected:
Sofoni 1: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
