Habakuk 3
3
Piɛile Habakuk len a ɲɛ Hala tosa-o
1Cɛɛŋɔn Habakuk cɛɛŋun o piɛilen nin-ndo yɔŋnun hoo ni aa:
2«Mɛlɛka, i tuei a nɔm o kɔɔ.
Siòònde bii ya dɛnnda nɔmndan, Mɛlɛka.
O vɔsilan ndan bɛngu, peelu dɛnnda kalalan.
O vɔsilan ndan bɛngu, cɔm vannda dɛnnda vakpa.
Kɛ o kɔl nɔm tuwvo nin,
loonun, a ɲíí nɔmnde o kɔɔ.
3Hala co fulaa Teman mò va hunɔɔ.
O-Diandaa co fulaa o pembei Paran coo mò va hunɔɔ.
Bɔɔbɔɔyɛi ndɔɛi tiw o halataala sɔ́
mí lɛŋnden le pia a biilu ndɔɔ.
4O co tengaa maa ɲɛ-tengaa,
pangeloo co fulaa ndu o ba,
tofa vɔ kpaaya ndɔ viannanndo.
5Nàà n'kɔnyaa co kɔlan ndu laci,
nàà dialun tuwvo co fulaa o foofola bɛngula ndɔlan.
6O sim pɛ lɛŋnden le ɲiiya.
O tofa pɛ vanaa-mangalaa-isɔɔa, kan yɔŋ siòònde a ndu.
Pembun masindɛ-sindɔn co piɔsio,
pembu pɔmbɔn sindɛ,
n va mun nɛila ndɔlan paandu-on co tolɔɔ mɔlɔ-mɔlɔ,
7I co cɛila-kolala-toandaalan Kusan cɔu tambei,
fondala lɔlaalan Madian la co ɲiiyaa.
8Vɛ̀ɛ̀ mò va maa a peela bɛndulan Mɛlɛka tambu kɔl nuaa ni?
Mò va maa a peelan n tuulu kɔl ni?
Vɛ̀ɛ̀ a mɛmma a ihɛllan n dɔwnun tumbé ni
má va helɔɔ o soa nɔmnda coo
a o ɲɛla ɲaanannda nɔmnda kpaayala soa nan-ndan coo-o?
9A cii kpaasiaa nɔmndo kindɔɔ.
Kɔɔn nɔmndon co mɛɛniannda n mɛɛnian
o kɔltuw nɔmndo nin-ndan ni.
A co lɛŋnden tɛɛndiaa a peela n co solio lenin-ndan.
10Pembon co nɔm cɔu mì n va ɲiiyaa,
Piɔɔ bɛndu-bɛndoo hin súlùlù mò va siaa.
Mɛmma bɛnduma nɔ lamɛɛlu lean ma co kuŋndo,
ma co tindian heeloo háá o halataala.
11Le tùú kɔɔn nɔmndon o helɔɔ coocoo a volio-o,
le tùú bál nɔmndo co kɔlan a pangeloo-o,
paalen a paangei sim kpɛ́.
12Nɔm Mɛlɛka, a co lɛŋnden balɔɔ a hiilɛi,
a co vanaa-mangalaa-isɔɔa pesio a labɛngu a kɔltuwvo.
13A fula le vanaa nɔmnda ciindiaa,
le vana n pɔla-o baŋaa.
A yɔl masa yungu vanaa kɔlvesɛiya,
má tɛɛmbuu ndu few-few.
14A buli simlacia yaamɔaa ndaa bolle
a kɔɔn ndan nda pila-on.
Vanaa kan, à va hunɔɔ ikpɛ́ɛ́nɛ̀nɛ̀i maa hoeyii fùkù-fùkù
le naa sɛŋio fásàn.
À va yoondiaala kɔlkɛndɛlan
mɛɛ vanndo viannun o bɛ̀mɛ́lta ndɔlan
le vana bala fondoo tolɔɔ coo nuaa yɛ.
15Nɔm Mɛlɛka, a buli nɛiyo o mɛmma ihɛllan nin a soa nɔmnda,
o mɛmma ihɛlma co biiŋɔnndo yongban-yongban-ndan nin pɛɛn.
16Ya, i tuei vooko-vooko kon mí yɔŋnun yoloma-yoloma.
Cɔcɔn ɲiiya ya kpà-kpà,
mí paalan la sia ya o n'dial,
I co ɲiiyaa tuŋ, i co nɔla kpeŋanndo le.
I co cumndo háá mì ce paale dɛnɛ palaalen,
paale naa n kɔ delnin vanaa co naa delɔɔ coo-a coo len#3.16 paale naa n kɔ delnin vanaa co naa delɔɔ coo-a coo len: Fondaa dindu taw o hebrei nin te..
17Vooson yendu lɛnin te few,
rɛsɛnnda tumndan la kum ndɛnin rɛsɛnndon te.
Olivieela tumndan la ve lɛnin komɔɔ le,
ɲɛ-ɲɛ ve lɛnin naŋɔɔ o yondola valtan nin te.
Saa cuunin o hèélan nin,
mì nawva cuu o vɔ̀lɛ́lan nin.
18Kɛ ya ya#3.18 Kɛ ya ya: Nanu, Vana-tɛɛngaa-diom Hala-o, o co Babakuk-o co sɔɛi a ndu pila o kɔɔ ni., i dɔawnunnin ɲaale o Mɛlɛka nin,
mì viow kponyoo o Hala vana ciindiaa nuu nin.
19Mɛlɛka, o co Maalii nuu-o co yoomuma nian ni.
O siinguu pelun maa pelun kial,
mò tosa mí va kelaa o pembon coo.#3.19 O sɛbɛla paandulan lapum nin, nanu bungɛi mɛɛlu ni, diomnda co lan laci lan la co lenin te. Kɛ o sɛbɛlan lapum nin, bungɛi mɛɛlɛi pum co o fondaa ho aa:
Condei he fula o sɛbɛ simlacinɔ vanaa n'condua nin.
A ɲɛ-caa iyoo nda soli ndi ni.
Currently Selected:
Habakuk 3: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
