Sakari 9
9
ISRAƐLLA A VANAA-MANGALAA-ISƆƆA BALU NDA-A
Yamɛi a cinda vanaa-mangalaa-isɔaa balu Israɛl-la
1«Yoongu Mɛlɛka-o.
Sɔɛi Mɛlɛka-e tiiya o lɛŋnde Hadrak len nin,
i sim o kobio Damas coo.
O co ko polama Israɛlla coo le
Mɛlɛka nɔ hɔlten te,
o nɔ vɛlɛ hɔlten vanndacieea kpow coo.
2Sɔɛi Mɛlɛka-e sim vɛlɛ o kobio Hamat coo,
o pɛɛngulan a kobio Damas,
i sim vɛlɛ o kobilan Tir a Sidɔn coo,
nɛɛ vannda nɔ kɔlkaloo a taasio-a.
3Vannda Tir a cownun fonda mayoomoo,
a cuungiaa volion mɛɛ cundoo co lɛŋ nuaa yɛ,
má dii sianion kundaa
mɛɛ loolio co o nɛiyo co nuaa yɛ.
4Tofa vɔ, Maalii hialunin ɲɛm mun,
o pialnin fonda nda mayoomoo
mò viow ndu o mɛmma ihɛllan nin,
mò lom ndu a yinnden.
5Vannda Askelɔn tuɛinin sɔɛi ken
mì siòònde bii nda,
vannda Kaasa bɛɛ a tuɛinin
ma ɲiiya nákà-nàkà.
Vanaa co icali Ekrɔn-nda bɛɛ
a yɔŋnunnin yoloma-yoloma.
Kani tiindan ndaa tambunin.
Masa ve lɛnin Kaasa le,
vana ve lɛnin icali Askelɔn te.
6Asdɔd ndu, mialla vanin icali lon ni.
Lende ya tɛɛmbuunin yonga Filistia ni.
7I solinin visia vi o ba nda coo-a nda o sondo,
mì soli visin solin sálà
o piɔmnda lo-on nda o ciŋndon tɛɛn.
Filistia tɔ̀a lonin yoomu-a bɛɛ,
a canin ya maa Hala ndaa,
mà siŋnun maa bolii lapangɛi o tàndá Yuda-o nin.
Vannda Ekrɔn nda siŋnunnin maa Yebusiia.
8I kilanin dɔ́ɔ́ngɔ́ɔ̀ o cɛi nuu ikɛi
le ndu kandaa le vanaa cɔwva,
a co luɛyɔɔ a fulaa-a pɛɛn.
Vana kɔlvesɛi kei lɛnin nda ikɛi le.
Kani hɔlta nilan la co nin va o cɛi nuu coo.»
Masa tuisian yɔngunin kɔlɲuloo-o
9«Niaa vannda Siɔn,
la dɔwnun ɲaale taw-taw.
Niaa vanaa co icali Yerusalɛm-nda,
la yonda a kɔlkɛndɔɔ.
La tofa vɔ masa niaa hunɔɔ o niaa lo.
O co masa sandaa, o nɔ̀lá yaamɔaa ndɔa.
Masa tuisianndo o co ni,
o co icali o sofɛlɔɔ coo,
sofɛlɛ téndóó pɛɛn,
o sofɛlɛ laandoo kom-ndo.
10O ciinin ɲɛla ɲaanannda soa nan-ndan
o tàndá cuavaa-imamaa Efraim-nda nin
o ciinin soa cɔwva Yerusalɛm,
o yiminin kpaasiaala cɔwlan kpow#9.10 O ciinin… o ciinin… o yiminin: Sɛbɛ paandoo o krɛkiei nin dimi aa: I ciinin… i ciinin… i yiminin….
O yɔngunin vanaa-mangalaa-isɔɔa kpow kɔlɲuloo.
Masale ndɔlen le kandunnin
o mɛmma hɛlii bɛnduan,
mì le kɔ tiiya háá o mɛmma ihɛllan mediteranee#9.10 mɛmma hɛlii bɛnduan… mɛmma ihɛllan mediteranee: Nuaa o dimin kɔɔli ni aa: mɛmma ihɛllan mapilɛ… mɛmma ihɛllan mapilɛan. Kɛ vanaa dɛnɛ sinaa yaasiaa sɔɛi ken-nde bii bila mɛɛ o hivin o kisiei nin nanu yɛ..
Masale ndɔlen le cannin o pee bɛndoo Efrate,
mì le kɔ tiiya háá nɛɛ lɛŋnden le mɛɛlu-a.»
Vanaa kaasoa sɔlanin pɛngio
11Mɛlɛka dimi aa:
«Le niaa yɛ niko,
le kpema ya yii a niaa a koovan-ndo,
i co vanaa niaa co o biyɔɔ nin-nda baŋa,
mì soli nda o soon mɛmma co lɛ lenin too nin.
12Lelan, niaa vanaa kaasoaa nɔ tiindanndo-a,
la muungu o kobi niaa kungan a kpakio-o nin.
Hau vɛlɛ i co ndi dimi,
i vangalanin dɛnɛ kɛndɛ niaa
bɛmbɛ lediin le sanga niaa sɔla-o.
13Kani i siɛndi polale Yuda len maa kpaasiaa,
mí vow polale Efraim-nden o kpaasiaa kalaa nin
mɛɛ vana vow kɔɛi o kpaasiaa nin yɛ.
Éé Siɔn! Cuavaa Yavan-nda cannin
le cɔlɔbaa a cuavaa nɔmnda.
I siinguunin niaa maa mɔɛi cɔvii kuubanɔ.»
14«Mɛlɛka fulanin nda coo fɛlɛmɛndɛn,
mì kɔɛi ndɔɛi kɔɛ a kiltan maa piɔɔ-volia,
Maalii, o co Mɛlɛka-o hɔŋnin buloo,
mò hinul nda o hoeyii fùkù-fùkùi fula a ba too-e nin.
15Mɛlɛka-Nɔ-Kpaayaa-Kpow-vo kandanin nda.
À sɔlanin yoomuan mà ciimiaa
powta fáàndala vanin nda hinullo lan.
A kolnin mà ŋol maa mamɔi,
a vanin a piaa maa bonyii fuusai makòó,
maa kpɛ̀ɛ́n fonda-loamaa-lasálà.
16Mɛlɛka Hala ndaa ciindiaanin nda paale len.
O ciindiaanin nda mɛɛ vana mandaa n'cɔloo
ciindiaa cɔlua ndɔa yɛ.
A volinin ŋɛlɛngi-ŋɛlɛngi o lɛŋnde ndɔlen nin
maa powta báà kàlàla
nda hol o mɔsil lemasaa lan.
17Mbɔ̀ ɲɔɔ naŋnin bɔɔ!
Ɲɔɔ yeelanin bɔɔ!
Maalon tosanin mì felengia hindu,
mì mɔima sɛnɛiyan ma tosa
mì cuaambɔa laandua dɔwnun yálá.»
Currently Selected:
Sakari 9: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
