Sakari 7
7
Sumndo biyɔɔ le loonɔnndo a tambii Yerusalɛm-nde o kɔɔ
1«O vɔsi hiɔɔlundɔɔ nin o masale Darius len bɛngu, paangii ŋɔmahiɔɔlundɔɛi, paangii nɔ diolan Kisleu-ve va lɔma lehiɔɔlu, mí sɔɛi Mɛlɛka-e dimulun Sakari. 2Nduyɛ, vannda Betɛl ndáà vem Sarɛsɛr nda Rekɛm-Melɛk a vanaa ndɔa le kɔlan Mɛlɛka tɛɛlɔnndo, 3a le vanaa-solia-lasálàá va baalaa o Cɛi Mɛlɛka-Nɔ-Kpaayaa-Kpow-vo nin-nda a vanaa-tɛɛngaa-diom Hala-a ɲunaa ni aa: ‹Vɛ̀ɛ̀ mì va hiovɔɔ laci a caŋndo a sumndo biyɔɔ o paangii ŋuɛɛnundɔɛi nin mɛɛ ya co nin tosaa lende o vɔsilan taw nin yɛ?›
4O kon, mí Mɛlɛka-Nɔ-Kpaayaa-Kpow-vo soaa o ya Sakari lo, mó dimul-la aa: 5‹Ɲuna vɔ vanaa co o lɛŋnden nden kpow nin-nda a vanaa-solia-lasálàá aa:
O vɔsilan belaŋɔmmɛw bɛngu
la va sumndo biyɔɔ a caŋndo
o paangii ŋuɛɛnundɔɛi a o paangii ŋɔmmɛwndɔɛi nin,
mò va maa le ya niaa va sum kon biyɔɔ ni?
6Te la de pɛ ɲɛdiaa mí la kol,
o co le niaa pila le niaa de mí la kol te?
7Sɔɔn mun Mɛlɛka ndóò dimul sindɛ vanaa-tɛɛngaa-diom Hala-a le vannda tɛɛngullo ni. Tuma kon, vannda va icali Yerusalɛm taw, a vannun nila ɲulu a kobila balu Yerusalɛm-ndan, a o tàndá co a ba too-o nin, haa vannun vɛlɛ icali nila ɲulu o tàndá ladɛɛlaa nin.
8Mí sɔɛi Mɛlɛka-e dimulun Sakari aa:
9Nuaa Mɛlɛka-Nɔ-Kpaayaa-Kpow-vo
soo ni mó dimi aa:
La kiolu yaman o sandei nin.
La vá vanaa kɛndɛa niaa pila tɛɛn,
mì la tuinan ɲííye vellaa-velle.
10La luéì vanalanɔ pɔnɔ ndɔ vi-o a vííyo mɔnɛi le.
La sáángiàà miallo a vana bala fondoo le.
La túúnùn o lakɔl le dɛnɛ vɔɔndo
tosalanndo vellaa-velle le.
11Kɛ, má kɛɛ le sɔɔn mún biyɔɔ, má tosa nila kalulan, má baŋulu nila ndalan yɔŋii ndáà tuei sɔɔn kalan. 12Má mingi kɔlta ndalan lakàlà-kálà maa idiaman, yɔŋii ndáà yaŋ nilan o tɔŋndo a o sɔɔn Mɛlɛka-Nɔ-Kpaayaa-Kpow-vo dimul nda a kɔl ndɔɔ a sondola vanaa-tɛɛngaa-diom Hala-a lɔ́ɔ́ kon-ndon. Lelan, mí Mɛlɛka-Nɔ-Kpaayaa-Kpow-vo tuulu kɔl a nda taw-taw. 13Mó dimi aa:
Le tùú ya va nda veeloo
má kɛɛ le nilan yaŋɔɔ-o,
nda bɛɛ a veelunin ya,
kɛ i yeŋnin nda lani le.
Ya Mɛlɛka-Nɔ-Kpaayaa-Kpow-vo soo nuaa ni.
14Mí saŋ nda vanaa-mangalaa-isɔaa
ndáà sina paandu le-a tɛɛn,
mí lɛŋnden le koma tambuu nda kɔɔli.
Vana ve lɛ cɔnɔn o lɛŋnde len nin le lakɔ inɛɛ le,
vana ve lɛ vɛlɛ cɔnɔn inɛɛ
le hunɔɔ o lɛŋnde len nin te.
Lende nda tɛɛmbuu lɛŋnde kɛndɛle len ni,
má siinguu len lɛŋnde imɔnɔle siɔŋɛilen.›»
Currently Selected:
Sakari 7: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
