Sakari 6
6
Vundule ŋɔmaandɔlen: ɲɛla ɲaanannda soa nan-ndan tan hiɔɔlu
1«Mí heelu vɛlɛ hɔlla, mí tofa, mí ca ɲɛla ɲaanannda soa nan-ndan tan hiɔɔlu fulaa o pembon mún miun tɛɛn. Pembun mun daɲan kposon n va ni. 2Soa siaŋaa va ɲɛ ɲaanan tasoo nanɔɔ ni, a tiŋia va o diinndɔɔ nanɔɔ ni, 3soa humbua va o yàándɔɔ nanɔɔ ni, a pooɲɛiya va ɲɛ ɲaanan hiɔɔlundɔɔ nanɔɔ ni. 4Mí cua sɔɛi, mí ɲuna mɛlɛkanɔ va suukanndo a ya-o aa: ‹Maalii nuu, kɔlɔ yɛɛ nɛ ɲɛlan ndan la co yɛ?› 5Mí mɛlɛkanɔ kon mulul-la aa: ‹Hoiyun sala hiɔɔlun fula o halataala-on co mun ni. N co fulaa nɛɛ n va isisi Maalii lelɛŋ kpow-vo laci-a.› 6Mí soa tiŋia va kɔlan a ɲɛ ɲaanan ndaa nanɔɔ a ba lɛŋnde co a maluaŋ-nden. Mí soa humbua va kɔlan a ba paalen le del-lo a ɲɛ ɲaanan ndaa nanɔɔ, mí soa pooɲɛiya va kɔlan a ba too. 7O kon, mí soa pooɲɛiya sɔɔnguu, má ɲuna le kɔlan balɔɔ o lɛŋnden coo. Mí mɛlɛkanɔɔ dimul nda aa: ‹La kɔ balu o lɛŋnden coo.› O kon, má kɔ balu o lɛŋnden coo. 8Mó veelu ya, mó dimul-la aa: ‹Tofa vɔ, soa co haa kɔlan a ba lɛŋnde maluaŋ-nden nda co kɔl nuu pɔlullo a lɛŋnde kala len.›
Mɛlɛka dimi le Yosue, bolle vanaa-solia-lasálàá mɔsil lemasaa vowvo
9Mí diom Hala-o dimulun ya Sakari aa: 10‹Bii ɲɛm kean vanaa co o biyɔɔ nin-nda yɔngu-on Hɛldai, Tobiya a Yedaya o ba. Paale len le tiiya pɛ, nɔm pila kɔ luɛi o Yosia po Sofoni-o lo cɛinin, cɔnɔn ndaa Babilɔn, lon nda hun luɛi ni. 11A tiiya pɛ lon, a bii nda volin humbon a sianin nda hin-ndon o ba, a cɔw mɔsil lemasaa a mun, a vow Yosue co bolle vanaa-solia-lasálàá-o mɔsil kon o lebol, Yosue po Yehosadak-o pɛɛn. 12A cii pɛ, a dimul ndu aa: Yaŋ-ndɔ nilan! Mɛlɛka-Nɔ-Kpaayaa-Kpow-vo dimi maa
vanapɔnɔ nɔ diolan aa Vulɔɔ-o
o labɛngunin ɲɔɔn kpow n vulnin ni.
Ndu minginin cɛi biilaa Mɛlɛka-o tangul ni.
13Ndu baŋnin Cɛi-Mɛlɛka-o ni,
ndu tuɛinin biilu cɛi kon yeela ni.
O calnin o kpɛŋɛ lemasaa coo,
mò tosa masalen.
O vanin vɛlɛ vana-solia-lasálàá
o kpɛŋɛ ndɔ lemasaa coo,
o tosanin valta tiɔnnda lan
ɲɛkɛndɛ-kɛndɛ o lepilɔɔ.
14Mɔsilta lemasalan yɛ, la lonin o Cɛi-Hala-o nin le loonɔnndo a poaa Sofoni-a o kɔɔ: Helɛm, Tobiya, Yedaya a Hɛn.›
15Vanaa co levil-la hunnin mà sɔɔnguu le baalaa tosaa, le Cɛi-Hala-o mingio tangullo. O kon, la sinanin maa Mɛlɛka-Nɔ-Kpaayaa-Kpow-vo vem ya o niaa lo ni. Te la yaŋ pɛ nilan o diom Mɛlɛka Hala niaa, mì la kela lecoo, o tosannin lende.»
Currently Selected:
Sakari 6: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
