Sakari 5
5
Vundule ŋɔmpumndɔlen: Sɛbɛ simbulaa
1«Mí heelu vɛlɛ hɔlla, mí tofa, mí ca sɛbɛ simbulaa pum hiŋnɔnndo coocoo.
2Mí mɛlɛkanɔ kon ɲuna ya aa: ‹Yɛɛ nɛ n co yɛ cɔu?› Mí mulul ndu aa: ‹Sɛbɛ simbulaa ya co cɔu hiŋnɔnndo coocoo ni. Sɛbɛ kalaa, bandii ndɔɛi co dunndo bidiin, buo dunndo tɔ́.› 3Mó dimul-la aa: ‹Dangaa n co cɔ kon saŋnɔnndo o lɛŋnden nden kpow coo nuaa ni. Kani o sɛvan o sɛbɛ kon nin baa pilɔɔ ma vanaa-vanaa co vuiya nanu, nda co townɔn nanu, o sɛvan vɛlɛ baa pilɔɔ maa vanaa-vanaa co mɛɛniannda lacòòvalan, nda bɛɛ toawnunnin nanu. 4Mɛlɛka-Nɔ-Kpaayaa-Kpow-vo dimi aa: Lelan ya saŋ dangaa o lɛŋnden nden coo ni, haliko mo luɛi o cɛila vuiya a o cɛila vanaa co mɛɛniannda lacòòvalan o diola nilan-nda lan nin, mò lom cɛila lan a yɔmii ndɛi a á powta ndalan.›»
Vundule ŋɔmmɛwndɔlen: Kambɛiyo a vanalanɔɔ lenin
5«Mí mɛlɛkanɔ va suukanndo a ya-o sɔɔnguu, mó dimul-la aa: ‹Heelu vɔ hɔlla mà tofa ɲɛ co hunɔɔ o nda-o.› 6Mí ɲuna ndu aa: ‹Yɛɛ nɛ co yɛ kon?› Mó mulul-la aa: ‹Kambɛiyo co hunɔɔ kon nuaa ni.› Mó dimi vɛlɛ aa: ‹Haki ndaa co kon o lɛŋnden nden kpow nin ni.›
7Mí kumbu icilin lusulaa va o kambɛiyo coo-o faŋan, vanalanɔɔ va icali o kambɛi kon nin. 8Mí mɛlɛkanɔ kon dimul-la aa: ‹Tɔɔmasele kɔlvesɛiyo n ca nuaa ni.›
Mó mingi vanalanɔ kon ɲindɔɔ o kambɛiyo nin, mó mingi kumbu icilin lusulaa kon handɔɔ lecoo. 9Mɛɛ ya heelu hɔlla le tofaa, mí ca vanlaandua hunɔɔ o hoeiye nin nda ŋiɔn. Hoeiye va hɔŋndo o kumbannda ndalan bɛngu, kumbannda ndala lan, velanndo lan pila a kumbannda yovaa yɔɔyaa. Má heelu kambɛi kon coocoo, halataala a lɛŋnden tɛɛn. 10Mí ɲuna mɛlɛkanɔ va suukanndo a ya-o le nɛɛ nda va kɔlan a kambɛi kon-nda. 11Mó mulul-la aa: ‹O lɛŋnde Sinear len nin nda co kɔlan a ndu ni, le ndu Cɛi-Diandaa tengullo lon. Te cɛi kon cuu pɛ tangul, a kɛsi niko kambɛi kalaa lon o fonda ndɔɔ.›»
Currently Selected:
Sakari 5: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
