Sakari 4
4
Vundule ŋuɛɛnundɔlen: ɲɛ kɛsiaa lafitinaa a yɔmii oliviee
1«Mí mɛlɛkanɔ va suukanndo a ya-o muungu nɛɛ ya va-a, mó hun tindi ya mɛɛ vana tindi vana co o malɔ-o nuaa yɛ. 2Mó ɲuna ya aa: ‹Yɛɛ nɛ n co yɛ cɔu?› Mí muli aa: ‹Ɲɛ kɛsiaa lafitina cɔwnun kpow a sianion-ndo ya co cɔu ni. Kpufɔɔ co o bolle ndɔlen coo déŋ. Fitinalan la co lecoo tan ŋɔmmɛw a kolikolima cuɛiyan ma kei nin-ndan man ŋɔmmɛw, le fitinala co lan lecoo lan. 3I co vɛlɛ yɔmii oliviee cɔu ndii ŋiin o ɲɛ kɛsiaa lafitina kon ikɛi. O pilɛ co kpufɛ kon o ba kɛndɔɔ coo, o pilɔɔ co o ba mɛllo coo.› 4Mí soaa vɛlɛ, mí ɲuna mɛlɛkanɔ va kon suukanndo a ya-o aa: ‹Maalii nuu, kɔlɔ yɛɛ nɛ dɛnndan ndan la co yɛ?› 5Mí ndu bɛɛ ɲuna ya aa: ‹A sina masinaa kɔlɔ dɛnndan ndan te?› Mí mulul ndu aa: ‹I sina le few, Maalii nuu.› 6Mó mulul-la aa:
‹Diom Mɛlɛka dimul Sorobabɛl-lo co hoo ni aa:
‹O co a kpaaya le
o co a mayoomu le niaa tosanin dɛnɛ kon te,
kɛ a Kɔl nuu.
Ya Mɛlɛka-Nɔ-Kpaayaa-Kpow-vo dimi lende e ni.›
7‹Nɔm pembii bɛnduei he,
yɛɛ nɛ n co yɛ Sorobabɛl o hɔl?
O co nɔm pesi mà siŋnun dɛngbɔɔ.
O handunin pow lebollo o vɔkɔ-vɔkɔ biilaa nin,
mì vannda va dimio aa:
Biiloo co le powvo ho! Biiloo co le ndu!›
8O kon kɔɔli, mí Mɛlɛka soaa vɛlɛ o ya lo, mó dimul-la aa:
9‹Sorobabɛl kila Cɛi-Hala-o ho ni,
ndu koni siownin vɛlɛ ndu tangul ni.
O kon niaa sinanin ni maa Mɛlɛka-Nɔ-Kpaayaa-Kpow-vo vem ya o niaa lo ni.
10Nɛ̀ɛ̀aa pɛɛsa yɛ vallo ho o kandɔn tasoo?
À bɛnda ma dɔwnun ɲaale le yoole tuvaalen cɔu Sorobabɛl o ba,
a le ndu cɔu pow lebollo handɔɔ.
Hɔlta ŋɔmmɛwlan yɛ, hɔlta Mɛlɛka lan ni.
Hɔlta lan la co balɔɔ o lɛŋnden kpow coo ni.›
11Mí cua vɛlɛ sɔɛi, mí ɲuna ndu aa: ‹Kɔlɔ yɛɛ nɛ co yɛ oliviei ŋiiŋii co hee ɲɛ kɛsiaa lafitinaa o ba kɛndɔɔ a o ba mɛllo coo-e?› 12Mí cɔɔlu ndu vɛlɛ ɲuna aa: ‹Kɔlɔ yɛɛ nɛ co yɛ lɛvun yɔm oliviee miunndon mun, n co mun o kolikolima miɔmma cɔwnun a sianion-ndan ikɛi, mí sianion va keiyo lenin-ndan?› 13Mó ɲuna ya aa: ‹A sina masinaa kɔlɔ lɛvun mun te?›
Mi muli aa: ‹I sina le few, Maalii nuu.›
14Mó dimul-la aa: ‹Vanaa ŋiɔŋaa sɔla pɔla diandaa ma va isisi Maalii nɔ lɛŋnden kpow-vo o hɔl le ndu baalaa tosallo-a ni.›»
Currently Selected:
Sakari 4: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
