Sakari 3
3
Vundule hiɔɔlundɔlen: bolle vanaa-solia-lasálàá
1«O kon kɔɔli, mó cɔm ya Yosue, bolle vanaa-solia-lasálàá, o va isisi mɛlɛkanɔ Hala-o laci. Vana lɔalaa n'vanndo, Setana va isisi ndu o ba kɛndɔɔ coo le ndu sɔɔn hɛɛnduuvo coo. 2Mí mɛlɛkanɔ Hala-o dimul Setana aa: ‹Màá Mɛlɛka kinda nɔm sondoo, nɔm Setana! Màá Mɛlɛka kuuna nɔm sɔɛi! Ndu Mɛlɛka pila hɛli Yerusalɛm ni. Vɛ̀ɛ̀ o co maa kili nda soli o yin-ndo le langbanɔɔ ho co le?›
3Nduyɛ, volɔɔla nɔɔlɛilan la va Yosue lekɔɔ, o va isisi mɛlɛkanɔɔ laci. 4Mí mɛlɛkanɔɔ soaa o vanaa va isisi ndu laci-a lo, mó dimul nda aa: ‹La soli volɔɔla nɔɔlɛilan ndu lekɔɔ.› Mó dimul Yosue aa: ‹Tofa vɔ, i faŋa nɔm haki nɔmndo coo le nɔm volɔɔla kafolan vowvo.›
5Mó dimi vɛlɛ aa à vow ndu Yosue mɔsil solia lasálà diandaa o lebol. Má vow ndu mɔsil solia lasálà diandaa, má vow ndu volɔɔla cuɛinanndan. Kon kpow, mɛlɛkanɔ Hala-o va isisi. 6Mí mɛlɛkanɔ Hala-o sila Yosue aa: 7‹Nuaa Mɛlɛka-Nɔ-Kpaayaa-Kpow-vo soo ni aa:
Taa kela pɛ o nɛila nilan coo,
taa bii pɛ tɔŋnda nilan kpáŋ,
nɔm vanin yaman kiolɔɔ o cɛi nuu nin ni,
nɔm vanin bɛɛ nuu mandaa ni.
O kon, i kenin nɔm fondaa
o vanaa co haa isisi nanu-a tɛɛn.›
Hala co vana ndɔ baalaa cuu
8‹Lelan nɔm Yosue
co bolle vanaa-solia-lasálàá-o
a caaŋaa nɔmaa niaa co baala pilɔɔ
tosaa ya o hɔl-la, la yaŋ nilan!
Bau vanaa co tɔɔmasele levundoo-a niaa co ni.
Kani la tofa vɔ, i co vana baala nuu cuu,
vana ni baala nɔ diolan aa Vulɔɔ-o.
9Kani pow ya kɛsi Yosue laci-o,
kpengon mún ŋɔmmɛw n co o pow pilɛ kon ni.
Ya pila sɛvanin sɛva vanin lecoo-o ni.
Ya Mɛlɛka-Nɔ-Kpaayaa-Kpow-vo dimi lende ni.
O paalen len pilɛ bɛngu
ya co haki lɛŋnden nden faŋa ni.
10Paale len, la veelannin vellaa-velle
le calle a kɔlɲuloo o tumnda n'rɛsɛnndan a o voosoei bɛngu.
Ya Mɛlɛka-Nɔ-Kpaayaa-Kpow-vo dimi lende ni.›»
Currently Selected:
Sakari 3: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
