Sakari 2
2
Vundule diinndɔlen: leelan a sumnda
1«Mí heelu hɔlla, mí tofa, mí ca leelan tan hiɔɔlu. 2Mí ɲuna mɛlɛkanɔ va suukanndo a ya-o aa: ‹Kɔlɔ yɛɛ nɛ leelan ndan la co yɛ?› Mó mulul la aa: ‹Leelan ndan la co tɔɔmasele vanaa-mangalaa-isɔaa kpaayaa puusiaa tàndá Yuda-o, lɛŋnde Israɛl-ten a Yerusalɛm, mí vannda saŋnun-nda-o ni.›
3Mí Mɛlɛka cɔm ya vɛlɛ sumnda nda hiɔɔlu. 4Mí ɲuna aa: ‹Yɛɛ nɛ nda nda co yɛ hunɔɔ tosa?› Mó mulul-la aa: ‹Sumnda ha hin le vanaa-mangalaa-isɔaa kundu tàndá Yuda-o a leela ndalan, mà puusiaa vanndacieea-a vueinɔnndo a le leela ndala lan yimio ni.›
Vundule yàándɔlen: yoole tuvaalen
5Mɛɛ ya heelu hɔlla, mí ca vɛlɛ vundule celen: langbanɔɔ pum va isisi a yoole tuvaalen o ba. 6Mí ɲuna ndu aa: ‹Kuɛɛ nɛ n co yɛ kɔlan?› Mó muli aa: ‹Yerusalɛm ya co kɔlan tuuvo ni, le bu ndɔɔ a bandii ndɔɛi sinaa.›
7Mɛɛ mɛlɛkanɔ va suukanndo a ya-o cɛn kɔnndan, mí mɛlɛkanɔ celen hun ndu bɔŋaa. 8Mó dimul ndu aa: ‹Ɲaanun mà kɔ soo o langbanɔ felengi co hoo a yoole tuvaalen o ba o nda-o lo, mà dimul ndu aa: Yerusalɛm vanin kobi nɔ kpaki loo, le vanndacieea a cɔlua vanin lenin sɛ́lɛ́ bɛndoo taw-taw va. 9Ya Mɛlɛka pila balunin ndu kandaa sɔ́ ni, mì va maa kpaki leyin le ndu. Ya vanin biilu ndɔɔ a naŋɔɔ ndɔɔ lenin ni. Ya Mɛlɛka dimi lende ni.›
Mɛlɛka veelu vanaa a sɛŋiannda-a
10Sei! Sei! Sei! La ɲaanun!
La ɲaanun mì la faŋan o lɛŋnde maluaŋ-nden nin!
Ya Mɛlɛka dimi lende ni.
Kani yáà sɛŋi niaa o kpengun hiɔɔlun ceendo ni.
Mɛlɛka dimi lende ni.
11Niaa vannda Siɔn sei,
niaa co icali Babilɔn ciee-a,
la ɲaanun mì la faŋan ndon cɔ́-cɔ́!
12Kani la tuei-yɔ diom Mɛlɛka-Nɔ-Kpaayaa-Kpow-vo,
o vem ya o vanaa-mangalaa-isɔaa
co niaa yungaa a ɲɛm niaan hiɔlɔɔ-a lo-o dimi aa:
‹Vana-vana pilan niaa pɛ,
mɛɛ vana kon pilan ya hɔlte kúlten.
13Lelan, i heelu baa
le vanaa-mangalaa-isɔaa kan soŋɔ̀ɔ́,
Vanaa va nda o ba o cɛlen nin-nda
yunganin nda mà hɛlu ɲɛm ndan.
Kon tosanin ni mì la sina maa
Mɛlɛka-Nɔ-Kpaayaa-Kpow-vo vem ya ni.
14Lelan, niaa vannda Siɔn,
la deŋi a kɔlkɛndɔɔ.
La dɔwnun ɲaale taw,
kani la tofa vɔ, i co hunɔɔ icali niaa tɛɛn.
Mɛlɛka dimi lende ni.
15O telen kon, vanaa-mangalaa-isɔaa bɔɔ-bɔɔ
a holnunnin ya Mɛlɛka,
a siŋnunnin vanaa nia.
I vanin icali niaa tɛɛn.
O kon, la sinanin maa Mɛlɛka-Nɔ-Kpaayaa-Kpow-vo vem ya o niaa lo ni.
16Mɛlɛka siinguunin tàndá Yuda-o kɛ́ ndɔɔ
o lɛŋnde diandaalen coo.
O hɛlinin vɛlɛ kobio Yerusalɛm.
17Niaa ɲɛ-ɲɛ co yoomu,
la mei Mɛlɛka o hɔl kpili.
Kani o yinga, o cɛn o fonda ndɔ diandaa le fulaa.»
Currently Selected:
Sakari 2: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
