Sakari 1
1
VUNDUMA SAKARI CE-AN
Yoomuan lueiyo le muungoo Mɛlɛka o ibuŋ
1Vɔsi Darius cii vɔsilan tan tiɔn o masalen-ndo, o paangii ŋɔmaandɔɛi nin, mí Mɛlɛka soaa o vana-tɛɛngaa-diom Hala-o, Sakari po Berekia-o, po imama Ido-o Sakari kon va ni. Mí Mɛlɛka dimul ndu aa:
2«Mí Mɛlɛka tuulu sindɛ kɔl a fuɲaa niaa mamaa taw-taw. 3Lelan, dimul Israɛlla aa nuaa Mɛlɛka-Nɔ-Kpaayaa-Kpow-vo soo ni aa: ‹La muungu ya o ibuŋ, mì ya bɛɛ i mulul niaa hɔlla. Mɛlɛka-Nɔ-Kpaayaa-Kpow-vo dimi lende ni. 4La vial fuɲaa niaa mamaa a káà, mì la tosa maa nda le. Kani nda nda, vanaa-tɛɛngaa-diom Hala-a va sindɛ yondaa nda o lani, má va nda dimullo aa Mɛlɛka-Nɔ-Kpaayaa-Kpow-vo dimi aa: La mal kelala niaala vɔɔnndan a dɛnnda niaala vɔɔnndan. Kɛ a yeŋ nilan te, a bii sɔɛi ken te. Sɔɛi fula Mɛlɛka o sondo-e co hee ni. 5Kuɛɛ nɛ fuɲaa niaa mamaa kan co yɛ hau? Vanaa-tɛɛngaa-diom Hala-a kan yɛ, a co va yoomu le fɛɛn a fɛɛn? 6Nduyɛ, mí tɔŋndan a silala ya vow vanaa niaa baalaa, vanaa-tɛɛngaa-diom Hala-a o sondo lan la pilan fuɲaa niaa mamaa kɔltan. O kon, má muungu, má dimi aa mí Mɛlɛka-Nɔ-Kpaayaa-Kpow-vo tuu le naa tosallo mɛɛ kelala naalan a dɛnnda naalan la co yɛ.›»
Vundule taselen: soa
7O paale bidiin a lehiɔɔlundɔlen coo, o paangii tɔ́ a ipilɛndɔɛi nin, paangii Sebat pɛɛn, o vɔsi diinndɔɔ nin o masale Darius len bɛngu, mí Mɛlɛka soaa o vana-tɛɛngaa-diom Hala-o Sakari lo, po Berekia-o, po imama Ido-o, mó dimi aa:
8«Cɛi icɔl, mí ca vundulen. Langbanɔɔ pum va icali o so siaŋaa coo, o va o yɔmii pɔmbɔɛi tɛɛn o kpolonndo nin, soa siaŋaa, soa pulpulla a soa humbua va isisi ndu kɔɔli. 9O kon, mí ɲuna aa: ‹Maalii nuu, kɔlɔ yɛɛ nɛ soa ha co yɛ?› Mí mɛlɛkanɔ va suukanndo a ya-o dimul-la aa: ‹I co nɔm kɔlɔ soa ha cɔm.› 10Mí langbanɔ va isisi o yɔmii pɔmbɔɛi tɛɛn-ndo cua sɔɛi, mó dimi aa: ‹Soa Mɛlɛka vem le balɔɔ o lɛŋnden coo-a ni.› 11O kon, mí vanaa va o soa kan coo-a mulul mɛlɛkanɔ Hala va isisi o yɔmii pɔmbɔɛi tɛɛn-ndo, má dimi aa: ‹N balu lɛŋnden kpow, tofa vɔ, lɛŋnden kpede le co o kɔlɲuloo nin, le connun nila ɲulu.› 12Mí mɛlɛkanɔ Hala-o cua sɔɛi, mó dimi aa: ‹Éé Mɛlɛka-Nɔ-Kpaayaa-Kpow-vo! O co nihau vɔsilan belaŋɔmmɛw a co o kɔltuwvo nin a Yerusalɛm a á kobila co o tàndá Yuda-o nin-ndan. Mà lo kɛɔ le nda ɲííye tuinɔnndo háá lɔ́ɔ́ kuɛɛ nɛ?› 13Mí Mɛlɛka mulul mɛlɛkanɔ va suukanndo a ya-o diomnde kɛndɛ, mó dimul ndu sɔɔn ɲɔɔlan.
Mɛlɛka co muungu mò hɛli Yerusalɛm
14O kon, mí mɛlɛkanɔ va suukanndo a ya-o dimul-la aa:
‹Yonda mà dimi aa: Mɛlɛka-Nɔ-Kpaayaa-Kpow-vo dimi aa:
Paŋala bɛndu-bɛndoo co ya o kɔl
le kaola ya kaola Yerusalɛm a Siɔn-ndo.
15Kɛ i tuulu kɔl taw
a vanaa-mangalaa-isɔɔa cennun nda pila ɲɛ-a.
Kani ɲɛ-pɔmbɔ koni yáà tuulu kɔl ni,
kɛ nda nda, má hun cɔɔlu
dɛnɛ palaa vanaa nia handɔɔ lecoo.
16Lelan, Mɛlɛka dimi aa:
I muungu Yerusalɛm a ɲíí nii bɛnduei,
cɛi biilaa nuu muungunin vɛlɛ tangulɔn ndon,
a tuunin Yerusalɛm a yoolen le ndu tangullo.
Sɔɛi fula Mɛlɛka-Nɔ-Kpaayaa-Kpow-vo o sondo-e co hee ni.›
17Yonda vɛlɛ mà dimi maa
nuaa Mɛlɛka-Nɔ-Kpaayaa-Kpow-vo soo ni aa:
‹Kobila nilan la pianin vɛlɛ ca a ɲɛm kɛndɔn,
i ɲɔɔlunin Siɔn,
mì hɛli vɛlɛ Yerusalɛm.›»
Currently Selected:
Sakari 1: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
