Sakari 11
11
Hala tɛɛmbuu vanaa kpaaya bɛndua
1«Niaa vanaa co Liban-nda,
la kumbi diola niaalan,
mì yinnden le luɛi,
mì le lom yɔmii sɛɛdrei.
2Nɔm yɔm siprɛs, ŋɔɔcian taw,
kani yɔm sɛɛdreo komba,
vanaa nɔ kpaayaa-a tambu.
Niaa yálánnde Basan, la somisomin.
Kani bundɛ vanáà nɔla luɛyɔɔ nin too
koombiaa mò muungu lɛŋ mɛ́-mɛ́.
3Vanaa mandaa n'cɔlua co cɛɛŋɔnndo,
kani naŋɔɔ ndaa tambu.
Yàlàà téndéa co pɛɛliaa,
kani bundɛlan la tambu,
bundɛla va o peo Yurdɛn demullo lan.»
Vanaa mandaa n'cɔlua nda ŋiɔn
4«Nuaa Mɛlɛka Hala nuu dimi ni aa: ‹Yɔɔ saa bɛnda le diinɔnndo-a diólan. 5Vanaa co nda piondɔɔ le diyɔɔ-a co cɔnnɔn maa a tɛɛmbuu isɔɔ le. Vana co nda pisio-o co dimio aa: Biiloo co le Mɛlɛka! Kani i siŋnun vana bolofaa. Vanaa co saa kan mandaa-a nɔ iɲíí a nda le. 6Lelan, ya bɛɛ, i nɔ lɛnin iɲíí a vanaa co icali o lɛŋnde len nin-nda le. Ya Mɛlɛka co sɔɛi nuaa ni. Tofa vɔ, i co vannda vɔngul nda pila o laba vellaa-velle, mì mal nda vɛlɛ masaa o ba. Masaa kan tɛɛmbuunin lɛŋnden. Kɛ ya, i helunin vana-vana nda o ba le.›»
7«O kon, mí va saa va le diyɔɔ-a yɔɔ diólan, saa yulaa n'saa ndáà nɔle diyɔɔ-a. Mí cua tindala mandaa n'saa lan tan tiɔn, mí ke o pilɛ diolan aa «Canyɛi», o pilɔɔ aa «Diom pilɔɔ.» Mí va saa yɔɔ diólan. 8O paangei ndii pilɛ bɛngu, mí toaw vanaa mandaa n'cɔlua yáá-a. O kon kɔɔli, i nɔla biuvɔnndo a saa le. Saa kan bɛɛ, mí dɛnɛ nuu fula nda iyeema. 9Mí dimi aa: ‹I co lɛ niaa manda le. O co vu-o ndu vu! O co luusian-ndo ndu luusian! A tɔ̀a co lo-a somian nda pila vellaa-velle!›
10O kon kɔɔli, mí cua tinda ni nɔ diolan aa «Canyɛi»-yo, mí yam ndu le kpema yáà yii a vanaa-mangalaa-isɔɔa kpow-vo tɛɛmbuuo. 11Mí kpema kon tambu ɲinkon. Mí yulaa n'saa va ya mɛɛndanndo-a bii bila maa sɔɛi Mɛlɛka-e va tɛɛngɔn kon a dɛnnda nilan ni. 12Mí dimul nda aa: ‹Te ɲɔɔ hɛnan pɛ niaa, la yɔngu ya sala nuu. Te ɲɛ hɛnan yɛ niaa le, la yɔngu ya le.› O kon, má tuu volin latámán beleyaa le sala nuu. 13Mí Mɛlɛka dimul-la aa: ‹Cua volion mun, vɔngu kɛndɛ nda kelu ya hoo iyama-o, ma yoo vana cuavaa n'kpɛnɔɔ mun.› O kon, mí cua volin latámán beleyaan mun, mí vuu mun o Cɛi-Mɛlɛka-o nin le vana cuavaa n'kpɛnɔɔ. 14Ken cuvɔɔ, mí yam tinda ni diinndɔ nɔ diolan aa «Diom pilɔɔ»-o, le vanayɛi tɛɛmbuuo Yudaa nda Israɛlla tɛɛn.
15O kon, mí Mɛlɛka dimul-la aa: ‹Dovin nihau maa diɔm sondo vesɛi co cɔlua mandaa-o. 16Kani tofa vɔ, ya Mɛlɛka, i yɔngunin niaa vana manda n'cɔloo o lɛŋnden nden nin, o nɔnin lehɔl saa vanin yɛɛvɔɔ dɔwnɔnndo-a coo le few. Hali saa pilɛ luusian bɛɛ, o nuwviaanin ndu le, o pilɛ yɔŋulun bɛɛ, o cɛwnin ndu le, o downin a vanin kɛndia-a balo le. Kɛ o sɔamnin visin saa celulaa mò yimi a tɔ̀a buukulan.›
17Dɛnɛ palaa co le diɔm sondo vesɛi mandaa n'saa,
o mal saa ndɔa-o!
Màá mɔɛi cɔwve sɛɛsiaa ndu congoo,
mì i pɛl ndu hɔlte ba kɛndɛlen!
Màá congú ndɔɔ vu lekɛ́ndɛi!
Màá hɔlte ndɔle ba kɛndɛlen le muungu tɔ́liɔ̀!»
Currently Selected:
Sakari 11: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
