Sakari 12
12
Baŋan Yerusalɛm-ndo
1Sɔɛi Mɛlɛka dimi a Israɛlla o kɔɔ-e.
Nuaa Mɛlɛka, o pɛngɛla halataala-o,
o cɔw lɛŋnden
mó cɔaw yoomu vanacieo-vo dimi ni aa:
2«I co Yerusalɛm siinguu maa taala kólaa pɛ a mɔima kɔl ni fulaa-o, le vanaa-mangalaa-isɔaa balu ndu-a kpow. Lende koni ɲɔɔ vanin le tàndá Yuda-o lɔ́ɔ́ vannda tiilanin Yerusalɛm-ndo ni. 3Paale len, i siinguunin Yerusalɛm maa pow lusulaa le vanaa-mangalaa-isɔɔa súúlan kpow. Vanaa cuanin ndu-a kpow boolunnin taw. Vanaa-mangalaa-isɔɔa kpow a cuungiannin le ndu cɔlɔbaa. 4Ya Mɛlɛka co sɔɛi nuaa ni: Paale len, i seemiaanin soa, mì vanaa ɲaanun a soa-a yɔŋnun yoloma-yoloma. Kɛ i landunin hɔlla polale Yuda len coo tuma ya suumiaanin soa vanaa-mangalaa-isɔɔa tɔ̀a kpow-vo. 5Simlacia Yuda diminin o kɔlta ndalan nin maa o Mɛlɛka-Nɔ-Kpaayaa-Kpow-vo nin yoomuma vanaa co icali Yerusalɛm-nda ma co ni, Hala ndaa pɛɛn. 6Paale len, i siinguunin vanaa co bolii lapangɛi Yuda-a maa yinndacieele yinnde bɛndoo o yɔmnde tɛɛn, te kon te maa tɛngɛ biyaa o tumbula n'maltan tɛɛn. A diwnin vanaa-mangalaa-isɔaa balu nda o ba kɛndɔɔ a o ba mɛllo coo-a kpow. O kon Yerusalɛm lonin o fonda ndɔɔ Yerusalɛm.
7Yungula Yudaa fɔlɔn Mɛlɛka baŋanin ni, yɔŋii yungu David-o, vannda Yerusalɛm ciee, a kuundian mà cennun maa nda hiow vanaa tɔ̀a Yuda ni. 8O palɛi ken nin, Mɛlɛka kandanin vanaa nɔ mayoomu le-a vanaa vanin icali Yerusalɛm-nda tɛɛn. Nda vanin ɲinkon maa David. Polale David len le vanin ɲinkon nda o hɔl maa Hala pila, maa mɛlɛkanɔ Hala-o.»
Dɛnɛ palaa tiw o lɛŋnden nin kpow
9«O palɛi ken nin, i tɛɛmbuunin vanaa-mangalaa-isɔɔa hinulnin Yerusalɛm-nda kpow. 10I cucunin kɔl ikɛndɔɔ a kɔl tɛɛlanndo polale David len a vanaa vanin icali Yerusalɛm-nda kpow coo. O kon, a mulinin hɔlla o ya lo mà tofa ya, le vana nda buli lungbuei-yo. A caŋnin le ndu mɛɛ vana caŋ le piɔ́m pole pilɛlen nuaa yɛ. A koŋulnin ndu coo mɛɛ vana koŋul le piɔ́m po tasoo yɛ. 11O palɛi ken nin, dɛnɛ palaa bɛndoo vanin Yerusalɛm, dɛnɛ palaa kon vanin maa dɛnɛ palaa Hadad-Rimɔn-ndo o dɛɛlaa Mekido nin. 12Lɛŋnden kpow le vanin o dɛnɛ palaa nin. Yungu oo yungu nɔnin dɛnɛ palaa o ndɔɔ: yungu David-o o ndɔɔ, vanlaandua ndaa o ndaa, yungu Natan-ndo o ndɔɔ, vanlaandua ndaa o ndaa, 13yungu Levii-o o ndɔɔ, vanlaandua ndaa o ndaa, yungu Simei-yo o ndɔɔ, vanlaandua ndaa o ndaa. 14Yungu oo yungu nɔnin dɛnɛ palaa ndɔɔ, mì vanlaandua yungu kon a nɔ o ndaa.»
Currently Selected:
Sakari 12: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
