Nahum 1
1
1Yamɛi kilulun Ninive-e. Vundule Nahum fula Ɛlkɔs-o ce len.
Mɛlɛka, Hala kpúlúnkùmaa a Hala kɛndɔɔ o co ni
2«Mɛlɛka paŋalaa Hala co ni, ndu mingi máá ni.
Mɛlɛka mingi máá, o pɛ a hiilɛi.
Mɛlɛka mìngùl yaamɔaa ndɔa màá,
mò mandan kɔltuw o nɔ a nda-o o kɔl.
3Mɛlɛka biwnùn, kpaaya ndɔɔ co o bɔɔ.
O bíì vana tɛɛmbùù dɛnɔɔ-o maa vanaa tɛɛmbúú dɛnɛ loo le.
O va pɛ kɔlan felenfelenndo cɛn.
Yumbuyumboo co cundu can ndu o pelon bɛngu-o ni.
4O kɔngɔlan mɛmma ihɛllan, mí ma vela sɛ́ɛ́n.
Ndu veeliaa peelan kpow ni.
Bil puiyaa Basan a hoo o pembei Karmɛl yɛngullo vesa kékélé.
Yandɔɔ billo Liban ɲɔfɔliaa.
5Mɛlɛka tosa ni mì pembun bɛndon ɲiiya,
mì pembun pɔmbɔn piɔsi.
Ɲiiyaa lɛŋnden le ɲiiya ndu o hɔl ni,
lɛŋnden a vanaa co le coo-a kpow.
6Nɛ̀ɛ́-nɛ̀ nɔla yɛ mò simul kɔl ndɔ tuwvo?
Nɛ̀ɛ́ tiw yɛ ba mò lo yoomu a yinnde ndɔle kɔltuwlen?
Maa leyin kɔl ndɔ tuwvo keleŋa tiwvo ni,
hali powtan mi la piɔsi ndu o hɔl.
7Mɛlɛka naŋ bɔɔ!
Ndu co nɛɛ viannanda o palɛi dɛnɛ palai nin ni.
O nɔ hɔlten vanaa viannun ndu o ba bɛngu-a kpede coo,
8tuma kpundɔɔ hun maa mɛmma hunaa-o.
Kɛ o toaw yaamɔaa ndɔa o ɲumma piɔ́mndan nin,
mò tɛɛmbuu nda kpede.»
Yoongula dimin le Yuda a le Ninive lan
9«Vɛ̀ɛ̀ niaa co yɛ yiyanndo a Mɛlɛka o kɔɔ?
Ndu co yaamɔaa niaa tɛɛmbuuo ni,
o kon dɛnɛ palaa tul lɛnin niaa coo o diinndɔɔ le.
10Yaamɔaa niaa vueinun bɛɛ maa bɔɔla n'yɔ,
mɛ̀ɛ́-mɛ̀ɛ́ nda pum mɔiyan,
a co ŋɔ mà cuulu mungén mɛɛ bil vesɛiyo ŋɔa nuaa yɛ.
11O nɔm Ninive nin vana kon fula ni, vana va kon tuuvo le Mɛlɛka ciŋilanndo-o,
ó va kon tuula tɛɛmbualan bɛɛndiaa-o pɛɛn.
12Nuaa Mɛlɛka dimi ni aa:
‹Hali yaamɔaa niaa va bɛɛ sɛ́lɛ́,
mà nɔ yoomuan taw,
à co cuvɔɔ kpede, o kɛ́-kɛ̀ lonin te.
Yáà tuisi niaa paandu sangaa coo,
kɛ i saangiaa lɛnin niaa le.
13O laan ndu, i co kpòndó co niaa o lebol-lo yomɔɔ,
mì kili yɔlɔn nda baiyiaa niaa-on.›
14Niaa yungoo Ninive, nuaa Mɛlɛka dimi a niaa o kɔɔ ni aa:
‹Cuavaa niaa, vana-vana lonin yoomu
le diola niaalan mɛiyo ceen te.
I solinin halaa niaa o cɛila máánnda niaalan nin,
piɔmaa niaa iyɔmnda a piɔmaa niaa n'ciliŋaa kan pɛɛn.
I co sɛi niaa tovɔɔ,
kani la co lɛ ɲɛ-ɲɛ ya o hɔl te.›»
Currently Selected:
Nahum 1: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
