Misee 7
7
Vannda kpow a vow balan o dɛnɛ vɔɔndo nin
1«Kpòkóó, má cè dɛnɛ palaa le ya sii!
I siŋnun maa vana fula a tuma kiandaa kɔmnde levɔɔ,
maa vana kɔɛ rɛsɛnndon nuwviaa
tuma caanda cìì nin mun kiɔndɔɔ-o.
Hali kpɔ̀nyɔ̀ɔ́ pilɛ ve lɛ le dioo le,
hali voosun sɛnɛin ya yeema taw-von i pilɛ bɛɛ ve lɛ le.
2Mbɔ̀ vanaa lo o lediom coo-a
cuu o lɛŋnden nden nin!
Vana sandaa co lɛ lenin te few.
Nda kpow a cal mɛngɛlianndo le koovan sooluanndo,
vana-vana co puapilɛ ndɔɔ yaŋɔɔlen kɛsullo.
3Tenndaa pila bala ndalan la tennda
o dɛnɛ vɔɔndo tosaa nin ni.
Simlacia co ɲunaa le nda salaa,
vanaa kialaa n'yamaa bɛɛ kilu yamɛi fondo le,
fɔ ma ce tɔnɔ ndaa lenin,
vanaa kùndàá bɛɛ a co ɲɛ nda yeema-o kiolɔɔ.
Lende nda kpow a co cɛlanndo ni
le dɛnnda vɔɔnndan tosaa.
4Vana hiow vaa fisa o nda tɛɛn-ndo,
maa yɔm n'yɔɔn ndu co ni.
Vana hiow nda sandei-yo,
maa bɔ̀ɔ̀ n'yɔ ndu co ni.
Paale dɛnɛ palaale niaalen le tiiya nuaa ni,
paale kpalilaa niaa dimi len,
vanaa-tɛɛngaa-diom Hala-a pɛɛn.
La co nihau a kɔl isiòòndo.
5La láálan vanayan niaan te,
la kɛ́sì kɔllo caaŋaa niaa coo le.
La mandaa sondola niaalan,
hali o va bɛɛ landaa niaa o hɔl.
6Kani po vialaa co fuɲaa bɛɛlan tɛɛmbuuo,
cuaambɔ laandoo co kala ndɔ simullo,
lanɔɔ poo co kala-lɛɛ ndɔ ciŋilanndo.
Yaamɔɔ vana-vana fulanin
o yungu vana kon pila nin.»
Hala tiindanndo a ndu piɛiyo
7«Kɛ ya, o Mɛlɛka lo kínɛí ya nɔ hɔlla ni,
Hala nɔ cinda nuu o ba-o ya tiindan ni,
ndu Hala nuu tuɛinin ya diom mò mulul-la.
8Nɔm yaamɔɔ nuu sei,
dɔawnun ɲaale a dɛnɛ nuu o kɔɔ le!
Kani i del bɛɛ, i co cɔnɔn,
i va bɛɛ icali o ɲumndan nin,
Mɛlɛka co ɲɛ-tengaa nuu ni.
9Fɔ mì biwnun kɔltuw Mɛlɛka-o,
kani hakio ya cua a ndu ni.
Telen co tiiya, o soaanin le ya, mò ke ya dí nuu.
O solinin ya o ɲɛ-tengaa,
mò tosal-la dɛnɛ kɛndɔɔ.
10Yaamɔɔ nuu canin ken,
mì siɛmbulan la bii ndu mɔ́ɔ̀yɔ̀ɔ̀.
Ndu yaamɔɔ kon va ya dimullo ni aa:
‹Kuɛɛ nɛ Mɛlɛka Hala nɔmndo co yɛ?›
Yaamɔɔ nuu nɛwnunnin a labɛngu
maa looli co o nɛilan coo-o,
mì ce ken a lehɔl kpendekele.
11Paale nda minginin
kpakila nɔmndan cɔvɔɔ len,
paale len nda co pɛɛngula
lɛŋnde nɔmnden cɔɔlu mingi a makɔɔ ni.
12Paale len vannda hunnin o nɔm ndo
fulaa Asiri a o kobila co o lɛŋnde Esipte len nin-ndan,
cɔnɔnndo o peo Esipte háá o peo Efrate kɔngɔ.
À pum hunnin fulaa o mɛmma ihɛllan kɔngɔ,
à pum fulaa o tàndála n'pembulan coo.
13Lɛŋnden le dɔawnunnin yɛɛvɛ
le kela vɔɔn vanndacieea co lecoo-a.
14Sim vanaa nɔmnda laci
a tinda vana mandaa n'saa o ba,
vanaa co kɛ́ nɔmndo-a pɛɛn.
À co nda pilɛ kpé yondoo nin,
o tɔlɔɔla iyɔmndan tɛɛn.
Mɛɛ n tosa lɔ́ɔ́ kon a nda yɛ,
kɔ a nda o yondola puiyaalan Basan nin
a o lan o tàndá Kalaad-o nin.
15Maa o paale n soli naa Esipte len,
cɔm naa dɛnnda kɔndɔfiltan.
16Vanaa-mangalaa-isɔɔa canin ndan,
mì siɛmbulan la bii nda.
O kon, a kpaaya bɛndoo kpow,
à handunnin balan o lasondo,
mì nilan la baŋul nda.
17A deembuunin cundoo maa n'kɛw,
maa ɲaa yoomaa sasun lɛŋ-nda.
À fulanin o fondala ndala mayoomulan nin,
mà hin a ɲiiyaa o nɔm Mɛlɛka Hala naa lo.
Siòònde biinin nda mà vo nɔm.
18Hala kuɛɛ nɛ co yɛ maa nɔm Hala,
ó vɔɔsuu haki cuavaa ndɔa-o,
ó mal nila kalula vanaa ndɔa
lo yoomu-a haki-o?
Kɔl nɔmndo lo o tuw le fɛɛn a fɛɛn te.
Kani ɲííye vannda tuinɔnndo hɛnan nɔm ni.
19O laan vɛlɛ nɔm Hala, a co naa iɲíí tuinɔn,
a biinin naa maa tɛɛmbuula naalan la co yɛ le.
A viawnin hakila naalan kpow
o mɛmma ihɛllan nin polon.
20O laan vɛlɛ, a co cuavaa Yakɔb-a cɔm
maa Hala lo o diomnden coo-o n co ni,
mà cɔm cuavaa Abraham-nda sakpoyɛi nɔmnde,
mɛɛ n yiilu sindɛ fuɲaa naa mamaa kpemaa yɛ.»
Currently Selected:
Misee 7: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
