Marke 11

Yeesu luɛi Yerusalɛm ciee

(Matie 21.1-11, Luke 19.28-40, Nsaŋ 12.12-19)

1Ndáà kandɔɔ tiiyaa Yerusalɛm, o co Bɛtfasee a Betani ikɛi-yo, a kpengii Pembei olivie, mí Yeesu viam kaandeŋaa ndɔa nda ŋiɔn, mó dimul nda aa: 2«La kɔ o ciee co niaa laci-o. La tiiya dɔ́ɔ́ pɛ, la komalnin sofɛlɛ téndóó o baa, o vana-vana cel-lɔ coo loo. La timbi ndu, mì la hin a ndu. 3Te vanndo ɲuna pɛ niaa aa: ‹Le yɛɛ nɛ niaa co yɛ hee tosaa?› La mulul ndu aa: ‹Maalii nɔ makoo a ndu ni, kɛ o co ndu mingi nanu sisa.›»

4Má kɔa, má komal sofɛlɛ téndóó o baa o nɛi, o dio cɛiyo pum ikɛi. Má timbi ndu. 5Mí vanaa va lon-nda pum a ɲuna nda aa: «Le yɛɛ niaa co yɛ sofɛlɛ téndé kon timbio?» 6Má mulul nda mɛɛ Yeesu dimul nda yɛ. O kon mí vanaa kan mal nda kɔlan. 7Má cuu Yeesu sofɛlɛ téndé kon, má hɛɛnduu domala ndala bɛndulan ndu o kɔɔ, mí Yeesu cal lecoo. 8Mí vannda taw a pɛngɛliaa domala ndala bɛndulan o nɛi, mí a pum a pɛngɛliaa siɔɔla nda kelu yondoo nin-ndan. 9Mí vanaa va kɔlan Yeesu laci-a a haa ndu kɔɔli a va yondaa aa: «Biiloo co le Hala! Biiloo co le vana co hunɔɔ o diola Mɛlɛka lan-ndo! 10Duaa co le masale co hunɔɔ len, masale David fuɲa naa len! Biiloo co le Hala o halataala coocoo!» 11Mí Yeesu luɛi Yerusalɛm ciee, mó luɛi o Cɛi-Hala-o nin. Ciiyo ndu mɛɛndianndo kpede, mó kɔannun Betani nda kaandeŋaa ndɔa tɔ́ a à ŋiɔnda, kani paalen léè del nin.

Yeesu dɔw voosu tumndo danga

(Matie 21.18-19)

12Diimandɔɔ, telen nda va faŋanndo Betani-o, mí yiaan ma va Yeesu nɛiyo. 13Ndóò cɔu voosu tum puiyaa lándán, mó kɔ tofa te ndóò saalunnin ɲɛ lecoo. Kɛ ndóò sɔɔnguuo macɛlu, mó ca maa pei daama va lecoo ni, kani o ve telen voosun koam te. 14O kon mó cua sɔɛi, mó soaa o voosu tumndo lo aa: «Le fɛɛn a fɛɛn nin, vana di lɛnin kɔmnde nɔm te!» Mí kaandennda tuɛi ndu diom kon dimio.

Yeesu tow yulaa o Cɛi-Hala-o nin

(Matie 21.12-17, Luke 19.45-48, Nsaŋ 2.13-22)

15Má tiiya Yerusalɛm, mí Yeesu luɛi o Cɛi-Hala-o nin. Mó can vanaa va ɲɔɔn pisio-a a vanaa va ɲɔɔn piondɔɔ o Cɛi-Hala kon nin-nda tovɔɔ. Mó ɲiinduu tabalila vanaa singaa n'volia a ɲɛla calaala vanaa pisia n'kangboa. 16O cɛl mì vannda cua ɲɛ-ɲɛ, mà kei a ndu o bɛ́ɛ̀ Cɛi-Hala-o le. 17Mó va nda pɛɛkoo, mó va dimio aa: «I co macoaa i sɛvaa le aa: ‹Cɛi nuu veelunnin aa cɛi piɛyaa le vanaa-mangalaa-isɔɔa súúlan kpow› le? Kɛ mì niaa siinguu ndu buulula vuiya.» 18Mí bolii vanaa-solia-lasálàá a vanaa pɛɛkaa latɔŋnda tuɛi sɔɛi ken, má va nɛilan nuwviaa le ndu diyɔɔ, kani ndáà nɔ siòòŋii ndɔɛi, kani pɛɛku ndɔɔ va nda kɔltan pilanndo. 19Paalen delɔɔ, mí Yeesu nda kaandeŋaa ndɔa faŋan o kobio nin.

Voosu tum vesa-o

(Matie 21.20-22)

20Idiiyo, kaandennda va hiovɔɔ, má komal voosu tumndo vesa háá o puundon. 21Piɛr yiyanndo a ɲɛ ndóò yɔŋnun-ndo, mó dimul Yeesu aa: «Kɔɔfa, tofa vɔ, voosu tum n dɔw danga-o vesa.» 22Mí Yeesu dimul nda aa: «La laalan Hala! 23I co niaa toɲaa dimul, te vanndo dimul pɛ pembei he aa: ‹Sungun ndon mà kɔ del o mɛmma ihɛllan nin›, te o sika o kɔl ndɔɔ nin te, kɛ mò laalan maa sɔɛi o dimi-e peelunnin, i tosan lende. 24Lelan i co niaa dimul, ɲɛ-ɲɛ niaa ɲuna pɛ o piɛilen nin, la laalan maa la cii ndu sɔla, o yɔngunnin niaa. 25Telen niaa co cɔnɔn isisi le piɛilen-ndo, te sɔɛi pum co pɛ niaa o kɔl a vanndo pum, la mal ndu haki, haliko mi fuɲa niaa co o halataala-o bɛɛ mal niaa haki le tɛɛmbuula niaalan. 26Kɛ te la mel caanda haki le, fuɲa niaa co o halataala-o bɛɛ melnin niaa haki le tɛɛmbuula niaalan te.»

A ɲuna Yeesu le vana ke ndu dío le dɛnndan tosaa-o

(Matie 21.23-27, Luke 20.1-8)

27Má kɔa vɛlɛ Yerusalɛm. Telen Yeesu va kelaa o Cɛi-Hala-o nin-ndo, mí bolii vanaa-solia-lasálàá, vanaa pɛɛkaa latɔŋnda a kaasoŋaa kɔlkalua lelɛŋnda hun o ndu lo, 28má ɲuna ndu aa: «Nɛ̀ɛ́-nɛ̀ vem yɛ nɔm dɛnndan ndan tosaa? Nɛ̀ɛ́ ke yɛ nɔm dio le lan tosaa?» 29Mí Yeesu mulul nda aa: «I co niaa sɔɛi ndii pilɛ kpé ɲuna mì la mulul-la. O kon mì ya bɛɛ i cɔmnin niaa vana vem ya dɛnndan ndan tosaa-o. 30Yinɔɔ Nsaŋ va vannda-o, Hala vem ndu ni bàà vanndacieea? La mulul-la.» 31Mí nda pila yiyan, má dimi aa: «Te n muli pɛ aa: ‹Hala vem ndu ni›, o co naa ɲuna aa: ‹Kɛ le yɛɛ nɛ niaa kɛɛ yɛ niko ndu laalan?› 32Te n muli yɛ vɛlɛ pɛ aa: ‹Vanndacieea óò vem ndu ni›…» Siòònde va nda a vannda, kani vana-tɛɛngaa-diom Hala-o vannda kpow va Nsaŋ cɔu ni. 33O kon má kɔ mulul Yeesu aa: «N sina le.» Mí Yeesu bɛɛ dimul nda aa: «Mɛɛ ya bɛɛ, i cɔmnin niaa vana vem ya dɛnndan ndan tosaa-o le.»

Currently Selected:

Marke 11: BKG

Highlight

Copy

Compare