Marke 12

Bundɛi vanaa baalaa nakɔa hɔlta vesɛiya

(Matie 21.33-46, Luke 20.9-19)

1O kon mí Yeesu kandu sɔɛi o nda lo o taloo nin, mó dimi aa: «Langbanɔɔ pum tɔl nakɔ n'rɛsɛnndo ni, mó kunga ndu pindo, mó toaw doolaa lenin, mó tangul cɛi cumulaa lenin. Ciiyo, mó sɔɔa vanaa tósà baalaa o nakɔ n'rɛsɛnndo nin-nda nakɔ kon o ba. O kon kɔɔli, mó kɔannun kelaa o lɛŋnde celen nin. 2Telenndo tiiyaa, mó viam buɛi ndɔɔ o pilɛ o vanaa tósà baalaa o nakɔ n'rɛsɛnndo nin-nda lo haliko mi ndóò sɔla tɔnɔ fula o nakɔ kon nin-ndo nda o ba. 3Kɛ má bii ndu, má lɔaa ndu, má mingi ndu bala fondo. 4Mó vim nda vɛlɛ buɛi celen, má lɔaa ndu bollen, má tɛɛmbuu ndu bɛ̀ɛ̀lan. 5Mó viam vɛlɛ o celen, má dii kon. Mó viam vɛlɛ a celen taw, má lɔaa a bɔɔ-bɔɔ, má diw a tɔ̀a. 6Po ndɔ ndóò kaola taw-vo daama ndóò lo nin ni. Mó vim nda ndu o mɛɛlulan. Mó dimi aa: ‹Po nuu ndu a kenin ndu bɛɛlen.› 7Kɛ mí vanaa tósà baalaa o nakɔ n'rɛsɛnndo nin-nda dimulan aa: ‹Vana nɔ kɛ́ɔ-vo co hoo ni. La hun n diinun ndu, mì kɛ́ɔ lo le naa.› 8Má bii ndu, má dii ndu, má viaw o nakɔɔ kɔɔli.

9Yɛ̀ɛ̀ vana nakɔɔ tosa yɛnin? O hunnin, mò diw vanaa tósà kan baalaa o nakɔ n'rɛsɛnndo nin-nda, mò sɔɔ nakɔɔ vanaa celen o ba. 10La ci vɔ sɔɛi he isɛvaa le aa:

‹Pow vanaa tangulaa cɛiya viow-vo, pow kon siŋnun pow lebollo ni?

11Mɛlɛka o ba dɛnɛ kon fula ni.

Dɛnɛ kaamaa bɛndoo co kon naa o hɔl ni.›»

12Simlacia Yuifia va nɛilan nuwviaa le ndu biyɔɔ, kɛ mí siòònde bii nda a sɛ́lɔ́ɔ́. Kani má bii bila maa le nda Yeesu ndóò dimi tale kon ni. Má faŋan ndu kɔɔli, má kɔannun.

Le Sesar muloo solullo

(Matie 22.15-22, Luke 20.20-26)

13Má vim Yeesu Faliisia pum a vanaa va Herɔde kɔɔli-a a pum le ndu yaŋɔɔlan miingullo, haliko mi ndáà bii ndu o sɔɔn ndɔn nin. 14Má kɔ dimul ndu aa: «Kɔɔfa, n sina maa vana toɲaa n co ni, nduyɛ a vo le vana-vana toɲaa dimullo le. O toɲaa coo n co vannda sɔɛi Hala-e pɛɛkoo ni. Vɛ̀ɛ̀ o bɛnda pá mì n mal muloo Sesar o ba? N mal ndu muloo o ba bàà n mal te?» 15Kɛ Yeesu ndóò sina muuluɔn ndaa. Mó mulul nda aa: «Le yɛɛ niaa co yɛ ya yaŋɔɔlen hendullo? La cuu vɔ ya volii támái, mì tofa.» 16Má cuu ndu ipilɛ, mó ɲuna nda aa: «Hɔlaa nɛ̀ɛ́ a diola nɛ̀ɛ́ la co yɛ lan lecoo?» Má mulul ndu aa: «Sesar ni.» 17O kon mí Yeesu dimul nda aa: «La mingul Sesar ɲɛ co le Sesar-o, mì la mingul Hala ɲɛ co le Hala-o.» Mí kɔndɔfillo va nda biyɔɔ taw a dɛnɛ ndɔɔ.

A ɲuna Yeesu a tendul vanvílɛ́iya o kɔɔ

(Matie 22.23-33, Luke 20.27-40)

18Mí Sadusea, a va dimio maa vanvílɛ́iya tendulnin te-a, a hun ɲuna Yeesu aa: 19«Kɔɔfa, ɲɛ Moise sɛval naa-o co hoo ni: Te vanndo vi pɛ, mò mɛi hɔ́ɔ́ le, kɛ mò mɛi lanɔɔ, puapilɛ vana kon bɛnda mò loo lanɔ kon, haliko mo koma vilul vana vi kon-ndo cuawva. 20Nduyɛ, puapilɛa pum va nda ŋɔmmɛw, mí o tasoo yil lanɔɔ, mó vu, o mɛi hɔ́ɔ́ le. 21Mí o diinndɔɔ loo lanɔ o mɛi-yo, mí po kon bɛɛ vu, o vilu hɔ́ɔ́ a ndu le. Mí i yɔŋnun lende a o yàándɔɔ. 22Puapilɛa ŋɔmmɛvaa kan kpow, vana-vana vilu hɔ́ɔ́ a lanɔ kon te. O kon kɔɔli, mí lanɔ kon bɛɛ vu. 23O tendul vanvílɛ́iya, lanɔɔ nɛ̀ɛ́-nɛ̀ cua kon va yɛnin o vanaa ŋɔmmɛvaa kan tɛɛn? Kani o kei nda kpow o ba o nɔu.» 24Mí Yeesu dimul nda aa: «Le hee niaa co luɛyɔɔ o pɔwlan nin nuaa ni, kani la bii ɲɛ co o sɛvaa o Sɛbɛ Hala-o nin-ndo bila le, la bii vɛlɛ kpaaya Hala-o bila le. 25Kani o tendul vanvílɛ́iya, vanpiaandua yilnin n'laandu le, vanlaandua bɛɛ a celnin o lanɔ le, kɛ maa mɛlɛkaa co o halataala-a vanndacieea vanin ni. 26Le dɛnɛ vanvílɛ́yaa muungoo yoomu yɛ, la ci o sɛvaa o sɛbɛ Moise-o nin ɲɛ Hala dimul ndu o bɔɔ leyinndo ikɛi-yo le aa: ‹Ya co Hala Abraham-ndo ni, Hala Isaak-o a Hala Yakɔb-o.› 27Hala co Hala n'vanvílɛ́i le, kɛ Hala vanaa yoomaa o co ni. La luɛi bɔɔ o pɔwlan nin.»

Tɔŋ hiow tɔŋndan-ndo

(Matie 22.34-40, Luke 10.25-28)

28Mí vana pɛɛkaa latɔŋndo pum, ó tuei nda suukan kon-ndo ca maa Yeesu caa muli, mó hun ɲuna ndu aa: «Ɔ́ɔ̀ tɔŋ tasoo o tɔŋndan kpow nin?» 29Mí Yeesu mulul ndu aa: «Tɔŋ tasoo co hoo ni aa: ‹Yaŋ nilan Israɛl, Mɛlɛka Hala naa, ndu pilɛ kpé co Mɛlɛka ni. 30Kaola Mɛlɛka, o co Hala nɔmndo-o a kɔl nɔmndo kpow, a yoomu nɔmndo kpow, a yiyan nɔmndo kpow a á kpaaya nɔmndo kpow.› 31O diinndɔɔ co hoo ni: Kaola caanda maa nɔm pila. Tɔŋ celen coo ó hiow lan-ndo le.» 32Mí vana pɛɛkaa latɔŋ kon dimul ndu aa: «A caa muli Kɔɔfa, toɲaa n dimi ni, maa Hala ndu pilɛ kpé co ni, Hala celen co o ndu kɔɔli le. 33Vana kaola ndu pɛ a kɔllo kpow, a kɔlkaloo kpow a á kpaayaa kpow, mì vana kon kaola vɛlɛ caanda maa ndu pila, kon hiow sálàla loamaalan kpow a sálàla súú-súù ka.» 34Yeesu cɔu maa o muli a kɔlkaloo, mó dimul ndu aa: «A co levil a masale Hala len te.» O kon, vana-vana tɔɔndan ndɛ le ndu ɲunaa le.

Krista nda David

(Matie 22.41-46, Luke 20.41-44)

35Yeesu va pɛɛkoo yɔngoo o Cɛi-Hala-o nin, mó ɲuna aa: «Le yɛɛ vanaa pɛɛkaa latɔŋnda co yɛ dimio maa po David-o Krista co ni? 36Kani David pila dimi o kpaaya Kɔl-Diandaa bɛngu aa:

‹Mɛlɛka dimul Maalii nuu aa:

Cal-la o ba kɛndɔɔ coo,

háá mì luei yaamɔaa nɔmnda

nɔm o pelon bɛngu.›

37David pila veelu ndu aa ‹Maalii›, vɛ̀ɛ̀ o nɔla yɛ vɛlɛ mò va po ndɔɔ?»

Yeesu soo a vanaa pɛɛkaa latɔŋnda o kɔɔ

(Matie 23.1-36, Luke 20.45-47)

Sɛ́lɛ́ bɛndu va lon-ndo va ndu yaŋnɔnndo a kɔlkɛndɔɔ. 38Mó va nda pɛɛkoo aa: «La mandan a vanaa pɛɛkaa latɔŋnda. À yeema kelaa a domala bɛndulan lekɔɔ. À yeema mì vannda va keiyo nda yilɔɔ o bɛ́ɛ̀la bɛndulan. 39À yeema calle o kpɛŋɛla taselan coo o cɛila lekaanndan nin a o fondala taselan o ɲɛdiaa kafoo. 40Nda poondiàà ɲɔɔn vanlaandua piaandaa ndaa vi-a o ba ni, mà bɛndi piɛilen haliko mi vannda ce maa a naŋ. Yamɛi ndɛi kiandunin dɛ!»

Fangadaama vuɛɛn pɔnɔ ndɔ vi-o

(Luke 21.1-4)

41Mí Yeesu cal o ɲɛla vannda vow fangadaamaa nin-ndan hɔl-ndɔ, mó va tofaa mɛɛ vannda va volion vowvo lenin yɛ. Vanaa bolofaa bɔɔ-bɔɔ a va vowvo taw. 42Mí vuɛɛn bala fondo pɔnɔɔ vi-o pum hun, mó vow tààngálan tan tiɔn. 43O kon mí Yeesu veelu kaandeŋaa ndɔa, mó dimul nda aa: «I co niaa toɲaa dimul, vuɛɛn bala fondo pɔnɔɔ vi hoo-o hiow vanaa vow haa o ɲɛ vovaa fangadaamaa nin-nda kpow vowvo, 44kani nda kpow, volin ndáà nɔ vɔ mako loon nda vow ni, kɛ ndu, ɲɛ va ndu o ba kpow-kpow-vo o hun vow nuaa ni, o ndóò tiindan le dioo-o pɛɛn.»

Currently Selected:

Marke 12: BKG

Highlight

Copy

Compare