Marke 10

Pɛɛkoo a nɔ piɔlɛiyo o kɔɔ

(Matie 19.1-12, Luke 16.18)

1Mí Yeesu bii nɛiyo le kɔlan a ba Yuda-o, a Yurdɛn peo leeloo. Mí sɛ́lɔ́ɔ́ cuungian vɛlɛ nɛɛ o va-a, maa mɛɛ o dema tosa yɛ, mó kandu nda vɛlɛ pɛɛkoo. 2Mí Faliisia hinul ndu a ɲuuniaalan le ndu kɔlɔɔ solio, má ɲuna ndu aa: «I co pá i cɛlnan le vanapɔnɔɔ laa ndɔ kɛɔ?» 3Mó mulul nda aa: «Yɛɛ nɛ Moise dimul lɛ niaa?» 4Má dimul ndu aa: «Moise cɛl mì vanapɔnɔɔ sɛva sɛbɛ lesei pialaa nɔu telen o co va laa ndɔ kɛw-vo.» 5Mí Yeesu ndu dimul nda aa: «Le nila kalula niaalan Moise sɛval niaa lende ni. 6Kɛ o ceendo cɔwnɔn-ndo, vanapɔnɔɔ nda vanalanɔɔ Hala toosiaa ni. 7Lelan vanapɔnɔɔ faŋannin fuɲa ndɔ a kala ndɔ, mò holnun laa ndɔ, 8mì vanaa ŋiɔŋaa kan cal o nɔ̀u nin, mà siŋnun dialle ndii pilɛ. O kon a co lɛ falun miuun te, kɛ ndii pilɛ. 9Lelan, vanacieo bɛnda mò siɛi ɲɛ Hala mɔɔsa-o le.» 10Telen nda va cɛinin-ndo, mí kaandennda cɔɔlu ndu sɔɛi ken ɲuna. 11Mó dimul nda aa: «Vana-vana kɛɛ pɛ laa ndɔ, mò yil o celen, ndu cua hakio a laa ndɔ tasoo le suunda o suunda-o. 12Te vanalanɔɔ kɛɛ pɛ pɔnɔ ndɔ, mò kɔ cal o nɔ celen, o suunda.»

Yeesu dɔw cuaambɔa pɔmbɔa duaa

(Matie 19.13-15, Luke 18.15-17)

13Mí vannda cuu ndu cuaambɔa pɔmbɔa le nda balan handɔɔ coo. Kɛ mí kaandennda va nda kuunaa. 14Yeesu cɔu lende, mó tambu kɔllo, mó dimul nda aa: «La mal cuaambɔa pɔmbɔa hunɔɔ o ya lo, la kuuna nda le, kani le vanaa co maa nda-a masale Hala len le co ni. 15I co niaa toɲaa dimul, vana-vana cɛl masale Hala len maa cuaambɔ pɔmbɔɔ le, ndu luei lenin te few.» 16O kon mó kɔɔmian nda, mó handu nda balan coo, mó dɔaw nda duaa.

Langbanɔ bolofaa

(Matie 19.16-30, Luke 18.18-30)

17Yeesu cɔnɔnndo kɔlan, mí langbanɔɔ pum ɲaanun ndu kɔɔli, mó kɔ baŋ vulan ndu o labɛngunin. Mó ɲuna ndu aa: «Kɔɔfanɔ kɛndɔɔ, yɛɛ ya tosa yɛ mì sɔla cinda fɛɛn-fɛɛndo?» 18Mí Yeesu dimul ndu aa: «Le yɛɛ n co yɛ ya veeloo aa ‹o kɛndɔɔ?› Vana-vana niŋ te, fɔ Hala ndu pilɛ kpé. 19A sina tɔŋndan aa: ‹Dii vana le, suunda le, yɔŋ levui le, timbul vana seile lakafa le, del vana coo le, biilu fuɲa nɔm a kala nɔm.›» 20Mí langbanɔɔ mulul ndu aa: «Kɔɔfa, kabi o cuaambɔyɛi nii nin, i bii nin sɔɔn mun kpow.» 21Mí Yeesu tofa ndu a kaolaa, mó dimul ndu aa: «Ɲɛ pilɛ lo vɔ nɔm le tosaa: Kɔ, mà pisi ɲɛm n nɔ-on kpede, mà ke vanaa bala fondoa, o kon a sɔlanin bolofaa o halataala. O kon kɔɔli a hin niko, a del-la kɔɔli.» 22Kɛ le sɔɛi ken, mí langbanɔɔ kɔannun a suumaa, kani bolofaa pila ndóò nɔ ni.

23Ndóò mɛɛndianndo ndu pila balɔɔ, mó dimul kaandeŋaa ndɔa aa: «O kendu le vanaa bolofaa luɛyɔɔ o masale Hala len nin!» 24Mí kɔndɔfillo bii kaandennda a sɔɔn mun. Kɛ mí Yeesu miinguu ndi dimi aa: «Cuavaa nia, o kendu le luɛyɔɔ o masale Hala len nin dɛ! 25Ɲɔɔmɛɔ keiyo o tɛɛngii lesiɛndɛi nin hiow va bɛɛn-bɛɛn a vana bolofaa luɛyɔɔ o masale Hala len nin.» 26Mí kɔndɔfillo cɔɔlu kaandennda biyɔɔ, ma va dimulanndo aa: «Mɛɛ nɛ̀ɛ́ nɔla yɛnin cindaa sɔlaa o kon?» 27Mí Yeesu tofa nda, mó dimi aa: «Vanndacieea nɔla ken tosa le, kɛ i co lende a Hala le, kani ɲɛ-ɲɛ kindu a ndu Hala le.» 28Mí Piɛr cua sɔɛi, mó dimul ndu aa: «Naa naa, ɲɔɔn kpow naa n mɛi ni mí n del nɔm kɔɔli.» 29Mí Yeesu muli aa: «I co niaa toɲaa dimul, vana-vana mɛi pɛ cɛi ndɔɔ, puapilɛa ndɔa, yemaa ndɔa, kala ndɔ, fuɲa ndɔ, cuavaa ndɔa te kon te lɛŋnde ndɔlen le ya a le Yoongu kɛndɔɔ, 30ɲɛla lan kpede la mingulunnin ndu fɔ́ɔ́fɔ̀, kɛmɛlan a kɛmɛlan o ceendo coo nanu: cɛilan, puapilɛa, yemaa, kalla, cuawva a yondolan, yɛle tolaalen bɛɛ. O sɔlanin yoomu fɛɛn-fɛɛndo o ceen co naa laci-o nin. 31Vanaa tasea bɔɔ-bɔɔ a siŋnunnin vanaa mɛɛlaa, mì vanaa mɛɛlaa bɔɔ-bɔɔ a siŋnun vanaa tasea.»

Yeesu soo le piɔ́m ndɔɔ a tendul ndɔɔ

(Matie 20.17-19, Luke 18.31-34)

32A va nɛi-tɛɛn le helɔɔ Yerusalɛm, Yeesu va nda kɔlan laci. Kaandennda va buulanndo, siòònde va vanaa va kɔlan nda kɔɔli-a. Mí Yeesu sɔɔngun vɛlɛ kaandeŋaa ndɔa ikɛi, mó va nda ɲɛ yɔŋnunnin ndu-o dimullo. 33Mó dimul nda aa: «Má cè naa helɔɔ Yerusalɛ! À kɔ malnin Po vanacieo bolii vanaa-solia-lasálàá a vanaa pɛɛkaa latɔŋnda o ba. A kialunin yamɛi ndɔɛi, mà yaala ndu le piɔ́mndo sɔlaa, mà mal ndu vanaa sina Hala le-a o ba. 34A mamnin ndu, mà tufu ndu lɔluan coo. A soaŋnin ndu, mà dii ndu. Kɛ palɛi yaa o kon kɔɔli, o muungunin yoomu.»

Piɛile poaa Sebede-a piɛi len

(Matie 20.20-28)

35Mí poaa ŋiɔŋaa Sebede-a, Nsaki nda Nsaŋ a sɔɔnguu Yeesu ikɛi, má dimul ndu aa: «Kɔɔfa, n yeema mà tosal naa ɲɛ naa n ɲunanin nɔm-ndo.» 36Mó dimul nda aa: «Yɛɛ niaa yeema yɛ mì tosal niaa?» 37Má dimul ndu aa: «Cɛl naa mì n kɔ va icali nɔm ikɛi o biilu nɔmndo nin, o pilɛ nɔm o ba kɛndɔɔ coo, o pilɔɔ nɔm o ba mɛllo coo.» 38Mí Yeesu dimul nda aa: «La sínà ɲɛ niaa co piɛiyo-o le. La nɔla pá kolɔɔ a taala kólaa ya co kolɔ̀ɔ̀-o? Te kon te la nɔla pá yinɔɔ ya sɔlanin-ndo sɔlaa?» 39Má mulul ndu aa: «N nɔla.» Mí Yeesu mulul nda aa: «Ì co toɲa maa la kolnin a taala kólaa ya kolnin-ndo, mì la nɔla yinɔɔ ya sɔlanin-ndo sɔlaa. 40Kɛ le calle ya o ba kɛndɔɔ coo a o ba mɛllo coo, o co ya le yɔngu vana fondala lan te, le vanaa la toosian-nda la co ni.»

41Kaandeŋaa tɔ́a tɔ̀a tueyɔɔ lende, má kandu kɔltan tambei a Nsaki nda Nsaŋ. 42Mí Yeesu veelu nda, mó dimul nda aa: «La sinà maa vanaa co vanaa-mangalaa-isɔɔa-a masalen tosaa coo-a co vanaa-mangalaa-isɔaa kan masalen tosaa coo a paa-kala, maa vanaa ndaa bɛndua bɛɛ a co nda kindilaa. 43Kɛ o co lende le i co niaa tɛɛn te. Vana-vana yeema pɛ le vaa vana bɛndoo niaa tɛɛn, ndu bɛnda mò siŋnun buɛi niaa. 44Vana-vana yeema pɛ le vaa vana tasoo niaa tɛɛn, ndu bɛnda mò siŋnun cɛɔ le niaa kpow. 45Kani Po vanacieo hín mì vana tosal ndu baala le, kɛ le vannda baalaa tosallo, a le yoomu ndɔɔ yɔngoo le vanaa bɔɔ-bɔɔ baŋaa.»

Yeesu singi Bartimee vana sumɛiyo

(Matie 20.29-34, Luke 18.35-43)

46Má tiiya Yeriko. Tuma Yeesu va faŋanndo ciee nda kaandeŋaa ndɔa a sɛ́lɛ́ bɛndoo kɔɔli-o, vana sumɛiyo pum va icali o nɛiyo dangalaa, diolan Bartimee, po Timee-o, o va vannda ɲɔɔn piɛiyo. 47Ndóò tueyɔɔ maa Yeesu fula Nasarɛt-o co hiovɔɔ ni, mó can yondaa aa: «Yeesu, Po David-o, tuinun ya iɲíí!» 48Vanaa bɔɔ-bɔɔ a va ndu yaalianndo haliko mi ndóò mei, kɛ mó va cɔɔloo yondaa aa: «Po David-o, tuinun ya iɲíí!» 49O kon mí Yeesu sim, mó dimi aa: «La veelu ndu.» Má veelu vana sumɛi kalaa, má dimul ndu aa: «Lueí yoomuan, cɔn, o co nɔm veeloo.» 50Mí vana sumɛiyo viaw doma ndɔ bɛndoo, mó can ɲaali, mó kɔa nɛɛ Yeesu va-a. 51Mí Yeesu ɲuna ndu aa: «Yɛɛ n yeema yɛ mì tosal nɔm?» Mí vana sumɛiyo dimul ndu aa: «Vana bɛndoo, tosa mì ce vɛlɛ maa paandu.» 52O kon mí Yeesu dimul ndu aa: «Kɔnnun. Laalan nɔmndo cii nɔm singi.» Fɔ́ɔ́fɔ̀, mó ca maa paandu, mó bii kɔlan Yeesu kɔɔli o nɛi.

Currently Selected:

Marke 10: BKG

Highlight

Copy

Compare