Misee 6
6
Mɛlɛka kɔɔsal vanaa ndɔa
1«La yaŋ ndɔ nilan mì la tuei ɲɛ Mɛlɛka dimi-o!
O vem ya aa ya cɔn le kɔɔsɔɔ,
aa ya tɛɛnguu diomndo ho pembun bɛndon
a pembun pɔmbɔn o hɔl.
2Pembon sei, la yaŋ nilan o yamɛi Mɛlɛka-e!
Niaa fondala lɛŋnden le kɛsi tumndo coo lan sei,
yamɛi hin kiolu Mɛlɛka nda yungu ndɔɔ tɛɛn!
Mɛlɛka luɛi kɔɔsɔɔ a Israɛlla.
3O dimul nda aa:
‹Niaa vanaa nia, yɛɛ nɛ ya yɔŋ yɛ niaa?
O yɛɛ nin ya saangiaa yɛ niaa?
La mulul-lɔ ya!
4Kani ya soli niaa o cɛlen nin
o lɛŋnde Esipte len nin ni,
mí heelu a niaa,
Ya vim niaa Moise, Aarɔn a Miriam,
le niaa simndan laci ni.
5Vanaa nia sei, la yiyan-ndɔ
mɛɛ Balak masaa Moab ndóò tuu
le niaa dɛnɛ vɔɔndo tosallo yɛ.
La loonun-ndɔ mɛɛ Balaam po Beɔr-o mulul ndu yɛ.
O kon kɔɔli, mí ya pila sim niaa laci
cɔnɔnndo Sitim háá Kilkal.
La co sina o kon maa dɛnɛ sandaa tuŋ
ya Mɛlɛka co niaa tosallo ni.›»
Kaannde kpeekpeilen
6«A yɛɛ kpeekpei ya fula yɛnin Mɛlɛka o hɔl?
A yɛɛ o ba ya baŋ yɛnin vulan Hala co coocoo-o o labɛngunin?
Bàà a navaa téndéa nɔ vosio pilɛ-a
ya fulanin ndu o hɔl ni
le sálàla loamaalan solio?
7Mɛlɛka cɛlnin pá saa kóndóa hali sɛ́lɛ́ bɛndoo?
O cɛlnin pá cuɛima lakongima cuu man kɔɔli le-an?
Vɛ̀ɛ̀ mì ke ndu po ni tasoo
haliko mo mal-la haki a kɔlvesɛi nuu?
Bàà mì ke ndu hɔ́ɔ́ ya solin o ipulu-o
le haki ni ya pila tosa-o?
8Niaa vanndacieea sei!
Kámáá a cɔm niaa dɛnɛ sandaa!
À cɔm niaa ɲɛ Mɛlɛka yeema mì vanndacieea tosa-o.
Ɲɛ kon co ni mì la kela kela sandaa,
mì la kaola lou o diomnden coo,
mì la kela ɲɛkɛndɛi o nɛila
Hala niaa cɔm niaa lan coo.»
Mɛlɛka kɔngɔlan vanaa lakafaa
9«Mɛlɛka co sɔɛi o vanaa co o kobio nin-nda lo. O ciindiaanin vanaa nɔ siòòŋii ndɔɛi-ya.
La yaŋ nilan o yondaa a dɛnɛ palaa co hunɔɔ-o o kɔɔ,
mì la yaŋ vana tuu le dɛnɛ kon tosaa-o nilan!
10Vɛ̀ɛ̀ ɲɛ-sɔlaa lakafaa co vɔ
o vana kɔlvesɛiyo lo cɛinin?
Vɛ̀ɛ̀ panila o dɔɔniaa lan la co vɔ ndu o ba?
Dɛnnda tɛ́ɛ́mbùù ya kɔllo lan la co lan ni.
11Vɛ̀ɛ̀ mì meilul vanaa co keiyo
ɲɛm pilan piondɔɔ o panila bɔɔfiɛilan nin-nda?
Bàà mì meilul nda
a ɲɛla tuvaala n'ɲɛla lakafalan nda o labɔlɔ?
12Vanaa bolofaa co o kobio ho nin-nda
kafalan kposon nda cal coo ni.
Còòlan tuŋ vanaa co icali lenin-nda
co keiyo hɔŋndo ni,
huiyo kínɛí nda co vannda a diɛɛmuei nda lasondo ni.
13Lelan ya bɛɛ, i kpukpanin niaa a sangaa,
mì tɛɛmbuu niaa le hakila niaalan.
14La vanin dio, kɛ la pimnin te.
Yiaan ma vanin niaa o ladembe.
La vanin baloo kɛsio nɛɛ pum le ndu mandaa,
kɛ la nɔlanin ndu manda le.
La manda yɛ pɛ ɲɛ pum,
i tosanin mì cɔwvo tɛɛmbuu ndu.
15La saŋnin, kɛ la kuwnin te,
la pesinin oliveon,
kɛ la solinnin kpeku a macuɛi le,
la vɔɔciaanin rɛsɛnndon,
kɛ la kolnin mɔima ndɔan te.
16La delnin tɔɔmaselela vɔɔnnda Ɔmri lan kɔɔli,
la delnin kelala yungu Akab po ndɔ lan kɔɔli.
O silala ndalan coo niaa co kelaa ni.
Lelan ya bɛɛ, i co hunɔɔ kobi niaa piɔlɔɔ vɔ́-vɔ́!
I tosanin mì vannda mam niaa vanaa co icali lenin-nda,
mì siɛmbula bii vanaa nia lan la bii niaa mɔ́ɔ̀yɔ̀ɔ̀.»
Currently Selected:
Misee 6: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
