Misee 2
2
Kɔngɔlanndo le vanaa del caanda coo-a
1«Dɛnɛ palaa co nda cum,
vanaa túù tuula vɔɔnndan,
ma yíì vannda dúmbúlan
o kpelela ndalan coo icɔl-la.
Paalen le sɛ dɔ́ɔ́ pɛ,
a peelu sɔɔn nda tuu mun-ndon.
2Yondolan lapum bɛɛ la hɛnan nda ni, a poonda.
Cɛilan lapum bɛɛ nda fula hɔlten ni, a hɛlu.
Delɔɔ nda del vanacieo coo a cɛi ndɔɔ kpow ni,
ma de ndu a kɛ́ ndɔɔ kpede.
3Lelan Mɛlɛka dimi ni aa:
‹I co kpundɛ bɛndoo tuisi vanaa kan coo.
La nɔlanin kɛsei solio lebɛngu le.
La cue lɛnin bollen lɔ́ɔ́-lɔ́ɔ̀ o kelaa nin te,
kani telen dɛnɛ palaa co o nɛi.›
4Paale len le hun tiiya pɛ,
vannda diminin taloo a niaa o sondo,
mà soli condii imɔnɛi aa:
‹Mbɔ̀ naa n cuu itambu!
Yondola naalan a ɲɛm nan cuu naa hiɔlɔn.
Yaamɔaa naa cii mun piɔvan.
Le yɛɛ nda co yɛ naa mun hiɔlɔɔ o ba?›
5Lelan, tuma yungu Mɛlɛka-o
vanin vɛlɛ lɛŋnden piɔwvo-o,
o niaa tɛɛn, vana-vana sɔlanin lelɛŋ te.›»
Vanaa-tɛɛngaa-diom Hala-a nɔ hiluma n'volian-nda
6«Vannda pum a co ya dimullo aa:
‹Pɛngi tombola fondoo ho!
Diɔmnde i co ni le dimio
aa n nɔla siɛmbula ndan kpakpalaa le.›
7Mò va maa dangaa co cuavaa Israɛlla coo ni?#2.7 Mò va maa dangaa co cuavaa Israɛlla coo ni: Vanaa pum a hivi fondaa ho aa: «Nuaa vana soaa ni, niaa yungu Yakɔb-o?».
Vɛ̀ɛ̀ Mɛlɛka sanga a biuvɔnndo ni?
Vɛ̀ɛ̀ lende o dema tosa ni?
Ya yɛ, vɛ̀ɛ̀ i dímì sɔɔn kɛndɛ
a vana co kela sandaa-o le?
8Kɛ niaa niaa, mí Mɛlɛka dimul niaa aa:
‹La co siŋnɔnndo yaamɔɔa le vanaa nia,
la co vanaa co fulaa o cɔwvo
má va hiovɔɔ a kɔlɲuloo-a volɔɔlan solio lekɔɔ.
9La co vanlaandua yungu nuu solio
o cɛila ndala nda kaola lan nin,
mì la va cuavaa ndaa biilu
ya yɔngu nda-o tuŋɔɔ le fɛɛn a fɛɛn.
10La cɔn mì la kɔɛ!
Kani lɛŋnden nden le co fonda pɛngia le,
le cuu nɔɔliaa a hakila niaalan.
Le hee, la sanganin taw-taw.›
11Vanaa caa còòlan bɛɛndiaa,
má va lan keiyo saŋɔɔ o hoeiye nin-nda
cɛn pɛ a dimul nda aa:
‹La co hunɔɔ mɔiyan sɔla,
mɔima nɛyaa-nɛyan pɛɛn.›
Vanaa-tɛɛngaa-diom Hala-a vaa lende
a bɛnda le vannda ha ni.»
Mɛlɛka mɔɔsiaanin Israɛlaa lonin yoomu-a
12Mí Mɛlɛka dimi aa:
«A toɲa, i mɔɔsiaanin niaa kpow,
niaa cuavaa Yakɔb-a pɛɛn.
I mɔɔsiaanin niaa nɛɛ pilɛ,
niaa Israɛlaa tɔ̀a lonin yoomu-a pɛɛn.
I mɔɔsiaanin niaa o hèéo nin maa n'saa,
maa cɔlua nda mal o bil puiyaa nin-nda,
mì la siŋnun vɛlɛ sɛ́lɛ́ bɛndoo sɔkɔ-sɔkɔ.
13Vana co niaa nɛiyo bulullo-o co kɔlan niaa laci.
La sɔla baŋaa, la co tɛɛngei bulio,
mì la va keiyo lon, mì la va fulaa.
Masa niaa co kɔlan niaa laci,
Mɛlɛka pɛɛn, o co simndan niaa laci-o.»
Currently Selected:
Misee 2: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
