Misee 1
1
1Sɔɔn Mɛlɛka dimul Misee fula Moresɛt-o-on co mun ni. O palɛi Yotam, Ahas a Esekia a va masalen tosaa Yuda-o o dimul ndu mun ni. A Samari a á Yerusalɛm o kɔɔ o ce vundule len ni.
Mɛlɛka kɔngɔlan Israɛl a Yuda
2«Niaa sei! Niaa vannda súúlan kpow, la yaŋnun.
Yaŋnun, nɔm lɛŋnden a ɲɛ-ɲɛ co lenin.
Maalii, o co Mɛlɛka-o lonin
o calta ndɔla diandaalan nin
mò kɔɔsal niaa.
3Kani la tofa vɔ, Mɛlɛka co fulaa
o calta ndɔlan nin mò va tolɔɔ,
o co kɔlan a nɛwvo
o pembun co o lɛŋnden coo-on coo.
4Pembon co kɔlan a puusianndo ndu o labɛngunin,
bóltan la co kɔlan a tɛɛndiaa ndu laci
mɛɛ dukpaa tenga o yinndekɔɔ nuaa yɛ
a mɛɛ mɛnndan ma toal nɛɛ feke-fekea nuaa yɛ.
5Mun kpow n yɔŋnun le yɔŋnda vɔɔnnda cuavaa Yakɔb-a,
a le hakila yungu Israɛl-lo.
Nɛ̀ɛ́ vem yɛ Yakɔb Mɛlɛka simullo?
Vɛ̀ɛ̀ o co Samari le?
Nɛ̀ɛ́ vem yɛ Yuda balan lueiyo o piɔmnda sooloo?
Vɛ̀ɛ̀ o co Yerusalɛm te?
6Maalii dimi aa:
‹Lelan, i co Samari mingi bémbélan kposon,
mì mingi ndu yondo tɔalaa rɛsɛnndo,
mì pimbul powta ndɔlan o bóllo nin dí,
mì soli nɛɛ o kilan lɛŋ-nda ceen déŋ.
7Piɔmaa ndɔa kpow a piɔsinin,
mì ɲɛm nda ke ndu-on kpow n ŋɔɛ o yin.
I pesinin piɔmaa ndɔa nda sɛl kan-nda,
kani a sala suunda ndɔɔ o cuungiaa nda ni.
Le sala suunda pilɛ kon koni nda vanin vɛlɛ ni.›»
Dɛnɛ palaa tol Yerusalɛm coo
8«Lelan, ya Misee i cɛɛŋunnin, mì hiiliaa,
i balunin pelun fondo, mì kela kɔɔle fondo.
I cɛɛŋunnin maa tivoli,
mì hiiliaa maa soninkɔnɔ.
9Kani paw Samari-o co paw siangaa le,
o co kɔlan a pɛngɛlanndo háá Yuda,
o tiiya háá o diola luɛyaala
vanaa nia sondoo Yerusalɛm.
10La yóndà sɔɛi ken Kat le,
la kóŋùl Ako le dɛ!
Niaa vannda Bɛt-Leafra,
la yuulian o cundoo nin.
11Vanlaandua Safir,
la hiow kɔɔle fondo
mì siɛmbulan la bii nia.
Vanlaandua Saanan nda tɔ́ɔ́ndàn bɛɛ
ma faŋan o ciee nda co nin-ndo le.
Caŋndan la co Bɛt-Esɛl,
mò va maa lon malaa fulanin ni?
12Vannda Marɔt nda co ɲiiyaa le dɛnɛ kɛndɛ ndaa.
Kani dɛnɛ palaa Mɛlɛka tuisi-o
tiiya háá o diola luɛyaalan Yerusalɛm.
13Niaa vanaa co icali Lakis-a,
la baa soa o ɲɛla ɲaanannda soa nan-ndan.
La yɔŋnun vanaa lo o lediom coo le.
Maa Israɛlla niaa bɛɛ kela ni,
mì Yerusalɛmnda nda pɛɛkuu
dɛnnda vɔɔnndan niaa kɔɔli.
14Le hee, niaa Yudaa,
la bɛnda mì la sɛyan niaa Moresɛt-Kat.
Kobio Aksib yɛ, ndu vanin
tiindan huinin masaa Israɛlla-o ni.
15Niaa vanaa co icali Maresa-a bɛɛ,
Ya Mɛlɛka, i co niaa malɔɔ kuubanɔ celen o ba,
mì masaa latɔ́ɔ́a Israɛl
a kɔ vionnun o buululan Adulam nin pɔ́.
16La suingin yiinde o lebol,
la sendin tembeltan
le poaa niaa niaa kaola-a taw-va.
La sendin yungultan maa n'duàà,
kani a kɔanin a poaa niaa
o biyɔɔ nin niaa levil polon.»
Currently Selected:
Misee 1: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
