Misee 3
3
Kanalanndo le simlacia
1O kon mí dimi aa:
«La yaŋ nilan, niaa simlacia cuavaa Yakɔb-a,
niaa simlacia Israɛlla.
Vɛ̀ɛ̀ o co niaa le óò bɛnda
mí niáà sina dɛnɛ sandaa tosaa le?
2Kɛ dɛnɛ sandaa nɛinun niaa ni,
mì la kaola dɛnɛ vɔɔndo.
La co lo vannda ɲɛm ndan poondiaa o laba háá
mì buu nda yáwlan a vision o paalan coo.
3Lekɛ́ndɛi, a co vanaa nia yáwlan solio,
má va visin ndan dioo,
má va nda paalan pesio,
má va nda kilikilio
mɛɛ vana kili vision
le vowvo o kpɛɛnɛi nin yɛ.
4Lelan, a koŋulnin Mɛlɛka o lani,
kɛ o mululnin nda le.
O mululnin nda mundoo,
le dɛnnda vɔɔnnda nda tosa lan.»
Le vanaa tɛɛnguu diom Hala-o a còòlan-nda
5«Ɲɛ Mɛlɛka dimi le vanaa-tɛɛngaa-diom halaa lacòòvaa
co vanaa ndɔa laasiaa-a-o co hoo ni:
‹Te vana ke nda dɔ́ɔ́ pɛ ɲɛ nda miaanun-ndo,
à dimi yoongu kɔlɲuloo.
Kɛ te vana ke nda mel nda ɲɛdiaa o sondo le,
à ciŋilan vana kon a sɛɛngianndo.›
6Lelan, ɲumndan ma co niaa tul,
niaa vanaa-tɛɛngaa-diom Hala-a.
Vana ci lɛnin levundu le.
Ɲumma bɛnduan ma co tolɔɔ niaa coo,
vana tɛɛnguu lɛnin sɔɔn co hunɔɔ yɔŋnɔn-ndon te.
Ɲɔɔ co yɔŋnɔn maa paale delaa,
mì ɲumndan ma tol niaa coo kpingbi.
7Vanaa dimi sɔɔn vaa siɔdii-a kpow a viannin hɔlla,
mì siɛmbulan la bii vanaa viamaa yavaa.
Kani Hala mulul lɛnin nda le.
8Kɛ ya ya, i co o piaa cá a yoomuan,
yoomuma fula Kɔl Hala-o o ba-an.
I nɔ dío a yoomuan le cuavaa Yakɔb
dɛnɛ vɔɔn ndaa cɔmndo,
a le Israɛlla haki ndaa cɔɔmullo.»
Misee tɛɛnguu diom Hala-o a tambii Yerusalɛm-nde o kɔɔ
9«Niaa sei! La yaŋnun sɔɛi he,
niaa simlacia co cuavaa Yakɔb-a coo-a.
Niaa simlacia cuavaa Israɛlla,
niaa nɔ nɛyɔn dɛnɛ sandaa
mí la va sandei tundɔɔ-a pɛɛn.
10Niaa co Siɔn tangullo a kooma vanndacieea nin,
mí la va Yerusalɛm tangullo a kɔlvesɛiyo-a.
11Vanaa ndɔa kialaa n'yamaa co luɛyɔɔninndo cɛlɔɔ
o yaman nda co kiolɔɔ-o nin.
Vanaa-solia-lasálàà ndaa co vannda pɛɛkoo
le salaa sɔlaa kínɛí.
Vanaa-tɛɛngaa-diom Hala-a ndaa bɛɛ,
le volion koni nda co nin sɔɔn vaa siɔdii dimio ni.
Nda yɛ, à co cɔnnɔnndo maa le Mɛlɛka nda co ni.
A co dimio aa: ‹Mɛlɛka co naa ikɛi,
dɛnɛ palaa kɛ́-kɛ̀ tulnin naa coo le.›
12Le dɛnnda niaala lan,
Siɔn vaanunnin maa iciɛɛ,
Yerusalɛm siŋnunnin bémbélan kposon,
mì pembii Cɛi-Hala-o i siŋnun yondoo#3.12 Sɔɔn mun dimin vɛlɛ o sɛbɛ Yeremi-o nin 26.18..»
Currently Selected:
Misee 3: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
