Yonas 4
4
Yonas tambu kɔl
1Yonas cɔu lende, mí mɔnɛi bii ndu, mó tuulu kɔl, 2mó dimul Mɛlɛka aa: «Àá Mɛlɛka! Hee ya va dimio lɔ́ɔ́ ya va vɔ o lɛŋnde nilen nin-ndo ni. Lelan yáà cɛn vɛlɛ le ɲaanɔnndo Tarsis ni. Kani yáà sina maa nɔm Hala, vana ikɛndɔɔ n co ni. A hiw ɲííye nɔu, a yala kɔl tuulu le, a faŋan o lediom coo le. A nɛi dɛnɛ palaa nɔm óò kɔngɔlan le vannda tuisio coo-o mangala le. 3Lelan, Mɛlɛka cua yoomu nuu, kani piɔ́mndo hiow nihau ya hɛnan a yoomoo.» 4Mí Mɛlɛka mulul ndu aa: «Vɛ̀ɛ̀ a nɔ pá dí ma tuulu kɔl?»
5O kon kɔɔli, mí Yonas faŋan Ninive ciee, mó kɔ calnun a ba paalen le can-ndo. Mó tangul kùùlen ndon, mó luɛi lenin o vunduan le ɲɛ óò yɔŋnunnin Ninive ciee-o cɔu. 6Mí Mɛlɛka Hala soli yɔmndo pum o lepilɔɔ, mí yɔm kon hiaw Yonas bollen le ndu vunduan yɔngoo haliko mi ndóò hini kɔl. Mí Yonas naŋ kɔl taw le yɔm kon. 7Kɛ diimandɔɔ idiiyo púŋ, mí Hala cuu dɛloo pum, mó dia yɔm kon, mí yɔmndo vesan sɛɛn. 8Paalen kaloo, mí Hala soli hoeyii vesɛiye a kpengii paalen le can-nde. Mí paalen le tuulu Yonas bollen, mí hɔlla hiŋ ndu, mó yeema piɔ́mndo, mó dimi aa: «Piɔ́mndo co fisa le ya a yoomoo.» 9Mí Hala ɲuna ndu aa: «Vɛ̀ɛ̀ a nɔ pá dí ma tuulu kɔl le yɔmndo ho?» Mí Yonas muli aa: «I nɔ dí mì tuulu kɔl háá mì kelun nande#4.9 nande: Vanndo tambu pɛ kɔl taw, mi mɔnɛi bii ndu háá mo yeema piɔ́mndo, ndu vana dimi ni aa: «fiɲɛ kelun nande.». 10O kon, mí Mɛlɛka dimul ndu aa: «Mɔnɛi co nɔm biyɔɔ le yɔmndo ho, kɛ nduyɛ a sanga le ndu le, o co nɔm te tɔl ndu le. O lepilɔɔ daama o vil icɔllo pum ni, mó vu icɔllo pilɔɔ. 11Nɔm yɛ, a yeema mì ya i tuinun Ninive kobi bɛndoo ho iɲíí le. Kobi bɛndu vannda hiow hoo le vaalan kɛmɛ a bidiin nin-ndo, vanaa sina bɛɛ haa pɛɛngulan dɛnɛ kɛndɔɔ a dɛnɛ vɔɔndo tɛɛn te-a. Cɔlua co vɛlɛ o kobio ho nin sɛ́lɔ́ɔ́ taw-taw.»
Currently Selected:
Yonas 4: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
