Yɔɛl 2
2
Paale Mɛlɛka len le co le tiiyaa
1La hɔŋ buloo o kobio Siɔn nin.
La hɔŋ ndu mì ɲɔɔ vɔnga o pembii nii diandɛi coo.
Niaa co icali o lɛŋnden nin-nda kpow,
la ɲiiya a siòònde.
Kani paale Mɛlɛka len le co le tiiyaa,
o lo cobe mì le tiiya.
2Paale maɲumnden
a paale ɲumma n'kpungbalen
paale len le vanin ni.
Paale yumbuyumbulen
a paale mɔ́m bɛndulen le vanin ni.
Le hunnin mɛ̀ɛ́-mɛ̀ɛ́ ɲɛ-tengaa paale siaa
tiw o pembon coo nuaa yɛ.
La tofa vɔ! Vanaa-mangalaa-isɔɔa ha,
a co sɛ́lɛ́ taw, a nɔ kpaayaa.
Kabi masindɛ, vanaa súú vaa lende fula vɔ le,
hali o nda kɔɔli, vanaa súú vaa lende
fula lɛnin le fɛɛn a fɛɛn te.
3Yinnden le co kɔlan a ɲɔɔn lomɔɔ nda laci,
yelenyelenndo co kɔlan a ɲɔɔn siowvo cuuloo#2.3 cuuloo: Ɲɔɔ lomɔɔ, te kon te ɲɔɔ ŋɔu kpede, ɲɛ-ɲɛ lò le. mungén nda kɔɔli.
Paandu, lɛŋnden le vannun maa nakɔɔ Edɛn,
kɛ kabi nda luɛi lenin,
le siŋnun lɛŋnde veselɛile imɔnɔlen.
Ɲɛ-ɲɛ helun nda le few.
4Vana ca nda ko aa soa ni.
Mɛ̀ɛ́-mɛ̀ɛ́ soa ɲaanun nuaa yɛ
vanaa kan ɲaanun ni.
5A co huuloo icilianciliannde o pembon tullo,
mí ɲɔɔ va tueinɔnndo
mɛ̀ɛ́-mɛ̀ɛ́ ɲɛla ɲaanannda cɔlua nan-ndan
la soaa nuaa yɛ.
Vana tuɛi nda ko isɔkɔsɔkɔɛi aa
yinnden le co bil vesɛiyo lomɔɔ ni,
vana tuɛi ko aa vanaa kpaayaa
co bɛɛndianndo le cɔwvo-a ni.
6Vanaa súúla celen a yɔŋnun nda laci
yoloma-yoloma a siòònde.
Hɔlla yɔŋnun nda yifidii a siòòŋii bɛnduei.
7A co kɔlan a kiltan maa kuubaa cɔw.
A co kpakio helɔɔ a kiltan maa vanaa cɔw.
Vana-vana co kɔlan o nɛi ndɔɔ coo sanaa.
Vana pilɛ bɛɛ mel nɛi ndɔɔ le kɔlan nɛɛ celen te.
8A co ŋovian mà kuindian te,
vana-vana co kɔlan o nɛi ndɔɔ coo ndu o hɔl sakpo.
A co keleŋaa o kɔɔn tɛɛn.
A co puusian te few.
9A keleŋa tiw o kobio nin cɔ́-cɔ́,
a co kiltan o kpakio coo,
a co helɔɔ o cɛilan coo,
a co luɛyɔɔ o diola pɔmbɔlan maa n'vui.
10Lɛŋnden le co nda ɲiiyaa laci,
halataalaa hiilun yongban-yongban.
Paalen a paangei piimiaa kpilo.
Loeon va diondɔɔ-on ɲum pɔ́lì.
11Mɛlɛka mal diom ndɔɔ kpélén vanaa cɔwva laci.
Vanaa ndɔa cɔwva co sɛ́lɛ́ taw-taw.
Kani vana co sɔɛi o dimi-e tosaa-o nɔ kpaayaa taw.
Bau paale Mɛlɛka len le co bɔɔ paale bɛndu.
Le co bɔɔ paale kpundɛle bɛndu.
Nɛ̀ɛ́ nɔla yɛnin mò yulu dɛnɛ kon paale len?
Veeloo le muungoo Mɛlɛka o ibuŋ
12Mɛlɛka dimi aa:
«Lelan nihau, la muungu ya o ibuŋ.
La muungu ya o ibuŋ a kɔlta niaalan kpow,
a sumndo biyɔɔ, a caŋndo a á cɛɛŋɔnndo.»
13La sɛ́ɛ́siàà volɔɔla niaala cuɛinanndan o laan te,
kɛ la sɛɛsiaa kɔlta niaalan,
mì la muungu Mɛlɛka Hala niaa o ibuŋ.
Kani o nɔ kɛndɛi a ɲííye taw.
O yala kɔl tuulu le, o nɔ canyɛi taw-taw.
O mangalà yiyanndo
mò mal dɛnɛ palaa ndóò kɔngɔlan le tuisio-o.
14Nɛ̀ɛ́-nɛ̀ sina yɛ te Mɛlɛka muungunin
mò mangala yiyanndo le?
Nɛ̀ɛ́ sina yɛ te o mɛinin duaa ndu kɔɔli
mì la nɔla le Mɛlɛka Hala niaa
sálàla kpeyanndan a sálàla mamɔilan solullo le?
15La hɔŋ buloo o kobio Siɔn nin.
La yonda le sumndo biyɔɔ a le bɔŋan lekaando tosaa.
16La cuungiaa vannda,
la veelu fàngà-kundaa,
la mɔɔsiaa vanaa yuuvɛiya,
la cuungiaa cuaambɔa pɔmbɔa nɛɛ pilɛ,
hali cɛlɛkpɛa lendea co vɔɛiyo-a, la cuungiaa nda.
Poombɔ piaandu cua lanɔɔ sɛnɛi-yo
bɛnda mò fula o ndu lo cɛinin,
mì cuaambɔ laandu cal o nɔu sɛnɛi-yo
bɛɛ fula o cɛi-kola-toandaa ndɔɔ nin.
17Vanaa-solia-lasálàá co Mɛlɛka baalaa tosallo-a
bɛnda mà sim o tongo-sɛmtɔɔ
a fonda-loamaa-lasálàá tɛɛn mà caŋ taw.
Mà piɛi nuaa aa:
«Éé Mɛlɛka! Tuinin vanaa nɔmnda iɲíí, yandi.
Tuisì vanaa co kɛ́ nɔmndo-a siɛmbulan te,
yɔŋii vanaa-mangalaa-isɔɔa mam nda.
Vɛ̀ɛ̀ ma tosa mì vannda ɲuna vanaa súúla celennda tɛɛn aa:
‹Kuɛɛ nɛ Hala ndaa co yɛ?›»
Muli Mɛlɛka-o a kpemala o yiilu vanaa ndɔa lan
18«Àá! Mɛlɛka fula diallon
o lɛŋnde ndɔlen kaolaa nin taw.
O tuinun vanaa ndɔa iɲíí.
19O mulul nda mó dimi aa:
‹I co niaa maalon, mɔiyan
a cuɛima ɲuluan yɔngu taw.
La dianin mì la pim ca.
I tuisi lɛnin niaa lasiɛmbu vanaa súúla celennda o hɔl te.
20I co yaamɔɔ fula a ba luaŋ-ndo-o faŋa niaa ikɛi polon.
A toɲa, i toawnin ndu o poli vesɛi niŋ tɔlɔɔ loo nin.
I viawnin vanaa cɔvaa co ndu laci-a
o mɛmma ihɛlma co a ba paalen le can-ndo-an nin,
mì viow vanaa cɔvaa co ndu kɔɔli-a kpengii mɛmma ihɛllan Mediteranee.
Lon nda solinin hoeyii ndɛi cun vɔɔnde ni.
Lon cun nda siovɛiyo tiwnin ni kpede.
Kani a tosa bɔɔ dɛnnda bɛndulan.
21Niaa vanaa co o lɛŋnden coo-a, la yɔŋ isiòòn te,
la dɔwnun ɲaale mì la naŋ kɔl.
Kani Mɛlɛka co sɔɔn bɛndon tosaa.
22Niaa visia yondoa, la buulan-ndɛ le.
Kani dɛɛlala co o lɛŋnde veselɛilen nin-ndan
la co vɛlɛ pui mì billo fula taw,
mì yɔmnde kom taw.
Voosoei a rɛsɛnndon yɔngunin vɛlɛ
kɔmnde bolofaale ndalen taw.
23Niaa cuawva Siɔn yɛ, la yo a kɔlkɛndɔɔ.
La dɔwnun ɲaale o Mɛlɛka Hala niaa nin.
Kani o yɔngunin niaa piɔɔ o telen ndɔɔ.
O tuisulnin niaa piɔɔ a vɔɔle pɔmbɔlen,
mò tuisul niaa vɛlɛ piɔɔ telen vaala taselan
maa mɛɛ ndóò tosa paandu yɛ.
24Kpelela lɔaa n'maltan
la vanin lapiaalan a baloo.
Fɛngɛlan la vanin lapiaalan a mɔiyan
mì kúŋndan la va lapiaalan a cuɛiyan.
25I mingulnin niaa ɲɔɔn peelul
le vɔsila sóónɔa, selennda,
dɛlua a paaleŋaa yáà tuisi niaa coo-a
tɛɛmbuu tɔlɔɔlan-ndan mangalaa.
26La vanin ɲɛdiaa dioo a pumndo,
la lisanin Mɛlɛka Hala niaa,
o tosa dɛnnda kaamaala bɛndulan le niaa-o pɛɛn.
Le fɛɛn a fɛɛn nin, siɛmbula bii lɛnin yungu nuu le.
27O kon, la sinanin maa i co Israɛlla tɛɛn.
La sinanin maa ya co Mɛlɛka ni, Hala niaa pɛɛn,
maa Hala celen co o ya kɔɔli le.
Le fɛɛn a fɛɛn nin, siɛmbula bii lɛnin yungu nuu le.»
Currently Selected:
Yɔɛl 2: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
