Yɔɛl 1
1
1Sɔɛi Mɛlɛka dimul Yɔɛl, po Petuɛl-lo-e co hee ni:
Kpundɛ tɛɛmbua
2«Niaa kaasoŋaa kɔlkalua,
la yaŋ nilan o sɔɛi he.
Niaa co icali o lɛŋnden nden nin-nda,
la tuei-yɔ!
Vɛ̀ɛ̀ dɛnɛ vaa nuaa tosan nin
o paale niaalen, te kon te o palɛi fuɲaa niaa?
3La dimul poaa niaa sɔɛi ken,
mì nda bɛɛ hun dimul poaa ndaa ndi,
mì poaa ndaa bɛɛ a dimul a nda vialunin-nda.
4Tɔlɔɔla paaleenda mɛi le tɛɛmbuuo lan,
mí sóónɔa tɛɛmbuu lan.
La sóónɔa mɛi le tɛɛmbuuo lan,
mí selennda tɛɛmbuu lan.
La selennda mɛi le tɛɛmbuuo lan,
mí dɛlua tɛɛmbuu lan.
5Niaa vanaa kolaa mamɔiya,
la tiondu mì la caŋ.
Niaa kol mɔiyan-nda, la ŋɔɔcian.
Kani mɔima n'rɛsɛmma sɛnɛiyan
ma puunun niaa o lasondo.
6Vanaa-mangalaa-isɔɔa pum hinul lɛŋnde nilen.
Vanaa kan nɔ kpaayaa taw,
a co sɛ́lɛ́, vana cii nda cɔm te.
Ciŋun ndan maa ciŋun yàlà piaandu n co ni,
ciŋun nda sɛɛsiaa ɲɔɔn-ndon
maa yaalela yàlà laandu n co ni.
7À cii nakɔla n'rɛsɛnnda nilan tɛɛmbuu,
a bɛɛsiaa voosui nii má yimi ndi.
À peenguu ndi tumndan má sɔam ndi.
Lɛɛndon muungu n'humbu fo-fo.
8Lelan, niaa yungu nuu,
la somisomin mɛɛ vanalanɔ felengoo
vownun volɔɔla biisilan
le pɔnɔ ndɔ ifelengiyaa caŋndo nuaa yɛ.
9Sálà kpeyanndo a sálà mamɔiyo
co lɛ solin o Cɛi-Mɛlɛka-o nin te.
Lelan, vanaa nia baalaa,
a co vanaa-solia-lasálàá-a co o mɔnɛi nin taw.
10Ciɛɔn cuu itambu, lɛŋnden le luɛi kɔsɔ,
kani maalon tambu,
mɔima n'rɛsɛmma sɛnɛiyan ma co lɛ le.
Hali cuɛilen tue bɛɛ le co lɛ le.
11Vanaa vàá co a mɔnɛi,
vanaa tɔalaa n'rɛsɛnnda co ŋɔɔcianndo le maalon a le ɔrse,
kani ɲɛ-ɲɛ va o ciɛɔn nin le kovɔɔ, o cuu itambu kpede.
12Nakɔla n'rɛsɛnndan la vesan sɛ́ɛ́n,
voosoei ɲɔfɔliaa.
Krenadiei, vawvan, pomiee
a yɔmnde yondoo nin kpow i vesa.
Kɔlkɛndɔɔ ɲum vanndacieea tɛɛn.»
Piɛilen a sumndo le Mɛlɛka tɛɛlɔnndo
13«Niaa vanaa-solia-lasálàá,
la vownun volɔɔla biisilan mì la caŋ taw.
Niaa co sálàlan solio o fonda-loamaa-lasálàá coo-a,
la hiiliaa hiko-hiko a caŋndo.
Niaa co baalaa tosaa le Hala nuu-a,
la hun lɔl a volɔɔla biisilan lekɔɔ.
Kani sálà co lɛ hunɔɔ o Cɛi-Hala niaa nin te,
sálà mamɔi co lɛ hunɔɔ lenin te.
14Lelan, la yonda le sumndo biyɔɔ,
la veelu vannda le bɔŋan lekaando tosaa.
La cuungiaa kaasoŋaa kɔlkalua
a vanaa co icali o lɛŋnden nden nin-nda kpow
o Cɛi-Mɛlɛka Hala niaa nin,
mì la koŋul Mɛlɛka o lani.»
Paale Mɛlɛka len
15«Kpòkóó dɛnɛ! Má cè paale bɛndu dɛ!
Paale Mɛlɛka len le co le tiiyaa.
Maa mɛɛ Vana-Kpaayaa-Kpow tuisi
kpundɛ tɛɛmbua bɛndoo vannda coo nuaa yɛ,
lende paale len le hunnin ni.
16Vɛ̀ɛ̀ o co naa o hɔl te nda puu baloo naa o ba le?
Vɛ̀ɛ̀ a tɛɛmbuu kɔlkɛndɔɔ a ɲaale va o Cɛi-Hala naa nin-ndo le?
17Kulun saŋnun-ndon co siɔu o puuloo bɛngu,
kondalan la connun fondo fúú,
bondonndan la koombiaa, kani malun co le vow lenin te.
18La tuei-yɔ mɛɛ cɔlua co somisominndo yɛ.
Nawva a visia velan a nawva-a
a sina nɛɛ nda kɔ le.
Kani a co lɛ bil puiyaa cɔ le.
Saa a cuinnda bɛɛ a co o sanga pilɛ kon nin.
Piɛile Yɔɛl, vana-tɛɛngaa-diom Hala-o len
19«Éé Mɛlɛka! Nɔm o lani ya co caŋndo nuaa ni.
Kani yinnden le cii bil puiyaa lomɔɔ o dɛɛlala vesɛilan nin,
le cii yɔmnde kpow lomɔɔ yondoo nin.
20Hali visia yondoa co mulinndo o nɔm ndo.
Kani mɛnndan ma vela o peelan kpow,
yinnden le cii bil puiyaa lomɔɔ o dɛɛlala vesɛilan nin.»
Currently Selected:
Yɔɛl 1: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
