Hebreea 2

Sɔɛi dimin a cinda bɛndoo o kɔɔ-e

1Lelan, o bɛnda mì n handun kɔllo o sɔɔn naa n tuei-yon coo, yɔŋii naa n luɛi o sangaa nin. 2Mí sɔɛi Hala ndóò dimi sindɛ a sondo mɛlɛkaa-e cɔmnun kpendekele, vannda pum ndáà luei ndi yii le, a bii ndi le, má sɔla sanga ndáà bɛnda le sɔlaa-o. 3Nduyɛ, vɛ̀ɛ̀ naa naa n fula yɛnin o ken nin, te n luei sɔɛi cinda bɛndoo ho yii le? Maalii pila kandu sɔɛi ndɔɛi dimio ni, o kon kɔɔli, mí vanaa tuei sɔɛi cinda kon-nda peelul naa diomnde len. 4Mí Hala pila tɛnda seile toɲale ndalen o dɛnnda kaamaalan a o dɛnnda kɔndɔfilta súú-súù ka nda va tosaa lan nin, a mɛɛ nda va valta kɔltan sɔlaa mɛɛ ndóò hɛnan Hala yɛ.

Vana cɔ̀m naa nɛi cindaa-o

5Ceen co naa laci mì n va sɔɛi ndɔɛi dimio-o, o co mɛlɛkaa le Hala handu ndu bollen te. 6Kani maa mɛɛ vanndo pum dimi yɛ aa:

«Éé Hala, yɛɛ vanacieo co yɛ, mà loonun a ndu,

yɛɛ o co yɛ, mà handu ndu hɔlten coo?

7A dɔɔniaa ndu hiovɔɔ mɛlɛkaa coo le telen bingi,

má ke ndu biiloo a bɛɛlen,

8má kɛsi ndu ɲɔɔn kpow o labɛngunin.»

Te Hala kɛsi pɛ ɲɔɔn kpow vanacieo o labɛngunin, mɛɛ kon co dimio ni maa ɲɛ-ɲɛ lo le ndu kɛɔ tuisinndo o labɛngunin te. Kɛ nduyɛ, n co cɔu maa o co ɲɔɔn kpow le n tuisin sunsun vanacieo o labɛngunin te. 9Kɛ ɲɛ naa n co taasi dɔvɔɔ-o co ni maa, mí Yeesu ndóò dɔɔnian hiovɔɔ mɛlɛkaa coo le telen bingi, kɛ sunsun, o sɔla biiloo a bɛɛlen le sanga o sanga mó vu-o. Le kɛndɛi Hala-e, mó vu le vanndacieea kpow. 10Hala cɔw ceendo ni, le ndu o co ni. Nduyɛ o yeema mi cuavaa ndɔa bɔɔ-bɔɔ a sɔla biilu ndɔɔ a ndu latulu. Kani Yeesu co vana nda ciindiaa ni, mɛɛ mì ndóò sanga haliko mi Hala ndóò peelu ndu o dɛnndan kpow nin.

11Yeesu dindi vanndacieea le hakila ndalan. Vana dindi vannda-o a vanaa o dindi-a kpow, fuɲa pilɔɔ nda nɔ ni. Lelan, siɛmbula ve ndu le nda veeloo aa puapilɛa le. 12Mí Yeesu dimul Hala aa:

«Àá Hala! I dimulnin puapilɛa nia sɔɛi nɔmnde,

mì biilu nɔm vanaa laalannda kpow o hɔl.»

13Mó dimi vɛlɛ aa:

«Ya i dɔawnin tiindan nuu o Hala nin.»

Mó dimi vɛlɛ aa:

«Má cè ya naa cuavaa Hala yɔngu ya-a!»

14Le tùú cuavaa kan a co cuavaa n'falua a cuavaa kooma vanacieo-vo, mí Yeesu bɛɛ siŋnun maa nda, mó cua dialun ivanacieeyan. O kon mó pial ɲina vɔɔn nɔ kpaaya piɔ́mndo o ba-o o piɔ́m ndɔɔ nin. 15O ceen ndaa nin kpow, maa n'cɛ vanndacieea va ni, kani siòònde va nda a piɔ́mndo. Kɛ Yeesu vuo, mó baŋa nda. 16Kani o co le mɛlɛkaa mala le o hin te, kɛ vanaa fula o polale Abraham-nden nin-nda o hin mala ni. 17Lelan, mɛɛ mí ndóò vel puapilɛa ndɔa, haliko mi ndóò siŋnun bolle vanaa-solia-lasálàá, vana ikɛndɔɔ a vana lo o lediom coo o baala Hala-o nin-ndo, haliko mo sɔla malɔɔ lahakio le vannda kpow. 18A toɲa, Yeesu pila sanga taw, mó sɔla dɛɛniaa. Lelan o tiwba mo mala vanaa co o dɛɛniaa nin-nda.

Currently Selected:

Hebreea 2: BKG

Highlight

Copy

Compare