Hebreea 3

Yeesu hiow Moise

1Lelan puapilɛa nia vanaa laalannda, niaa Hala veelu-a, la tofa Yeesu, ndu Hala vem le vaa bolle vanaa-solia-lasálàá ni, o naa n co sɔɛi ndɔɛi dimio-o. 2Mí Moise yɔŋnun sindɛ vana lo o lediom coo-o o Cɛi-Hala-o nin kpow. Lende koni Yeesu bɛɛ tosa Hala o hɔl ni, mí ndu Hala siinguu ndu bolle vanaa-solia-lasálàá. 3Kɛ Yeesu bɛnda mò sɔla biiloo hiovɔɔ Moise coo. Kani vana baŋ cɛiyo-o bɛnda mò sɔla bɛɛlen hiovɔɔ cɛi kon coo. 4Cɛi oo cɛi nɔ vana baŋ ndu-o, nduyɛ, vana cɔw ɲɛ-ɲɛ fee-o co Hala ni. 5Mí Moise ndu yɔŋnun vana lo o lediom coo-o o Cɛi-Hala-o nin kpow. Vana baalaa o va ni, ndóò bɛnda le vaa sei sɔɔn Hala va hunɔɔ dimi-on. 6Kɛ sunsun, Krista yɔŋnun po tosa vallo o sandei nin-ndo, ndu co Cɛi-Hala-o bollen ni. Te n lo pɛ kɔllo kɛsio o laalan naa n tiindan-ndo coo, mɛɛ naa n co cɛi ndɔ kon ni.

Pɛngio co le vanaa Hala-a

7Lelan maa mɛɛ Kɔl-Diandaa dimi yɛ aa:

«Te la tuei pɛ hau diom Hala-o,

8la kìndì nilan

maa mɛɛ o tosan sindɛ,

mí la simul ndu yɛ le.

O telen kon, mí la tiŋ ndu o lɛŋnde veselɛilen nin.

9Mí Hala dimi aa:

‹O lɛŋnde veselɛilen nden nin fuɲaa niaa mamaa tɔɔndan ya ni,

le sinaa ɲɛ yáà tosanin-ndo.

Nduyɛ, má sina ɲɛ ya tosa

10o vɔsilan belehiɔɔlu bɛngu-o.

O kon mí fula kɔllo a vannda ha,

mí dimi aa: Kɔlta ndalan la co ya kɔlan levil.

A sínà nɛila nilan te.

11Mí mɛnan a kɔltuwvo aa:

A lueinin o lɛŋnde ya toosial nda pɛngio len nin te few.›»

12Puapilɛa nia, la mandan, vana-vana nɔ kɔl dɛnɛ vɔɔndo a nila kalulan, mò mulul Hala nɔ yoomoo o ba-o kɔɔ le. 13Hau-hau, Hala co hiovɔɔ laci a sɔɛi o niaa lo. Lelan, la va lɔ́ɔ́-lɔ́ɔ̀ yoomuan lueinanndo vellaa-velle telen o co vɔ sɔɛi-yo. Haliko haki luei niaa o lapɔw nin te, vana kindi vɛlɛ lani o niaa tɛɛn mò kɛɛ le sɔɛi biyɔɔ le. 14Lelan te n hiow pɛ laci a simndan yili o tiindan naa tasoo nin, háá mi n tiiya o mɛɛlulan, mɛɛ n co va a yiinannda a Krista.

15O co o sɛvaa aa:

«Te la tuei pɛ hau diom Hala-o,

la kìndì nilan maa mɛɛ o tosan paandu mí la simul ndu yɛ le.»

16Ɔ́ɔ̀ vanaa ndáà tuei ndu kan sɔɛi kɛ má kɛɛ ndu diom-nda? Vanaa kɛ́-kɛ̀ Moise soli Esipte kpow. 17A nɛ̀ɛ́-nɛ̀aa Hala fula yɛ kɔllo o vɔsilan belehiɔɔlu bɛngu? A vanaa tosa hakio, má sɔla piɔ́mndo o lɛŋnde veselɛilen nin-nda. 18Hala cii mɛnan aa: «Le fɛɛn a fɛɛn, a lueinin o lɛŋnde ya toosial nda pɛngio len nin te few.» Le nɛ̀ɛ̀aa o mɛnan yɛ lende? Vɛ̀ɛ̀ o co le vanaa bii sɔɛi ndɔɛi le-a le? 19Ɛ̀ɛ̀ nduyɛ lekɛ́ndɛi, mí n ca maa a nɔla luɛyɔɔ o pɛngi kon nin te, le laalan nda kɛɛ-o.

Currently Selected:

Hebreea 3: BKG

Highlight

Copy

Compare